கர்நாடக மாநில வனத்துறையினரால் அப்பாவித் தமிழர்கள் மூவர் சுட்டுக் கொல்லப்பட்ட கோரச் சம்பவத்தை சாதாரணமாகக் கடந்து செல்லாமல், இதற்கு காரணமானவர்கள் மீது உடனடியாக கொலை வழக்குப் பதிவு செய்து கர்நாடக அரசு மிகக் கடுமையான தண்டனை பெற்றுத் தர வேண்டும் என்று தேசிய முற்போக்கு திராவிட கழகத்தின் (தேமுதிக) பொதுச்செயலாளர் பிரேமலதா விஜயகாந்த் ஆவேசமாக வலியுறுத்தியுள்ளார்.

இதுகுறித்து அவர் வெளியிட்டுள்ள கண்டன அறிக்கையில், கர்நாடக மாநிலம் ஹானூர் அருகே உள்ள மரிமங்கலம் வனப்பகுதியில் மான் வேட்டையில் ஈடுபட்டதாகக் கூறி, கர்நாடக வனத்துறையினர் நடத்திய கொடூர துப்பாக்கிச் சூட்டில் தமிழகத்தைச் சேர்ந்த அந்தோணிசாமி, ஜான் ரோஸ் பீட்டர் மற்றும் ஜெபஸ்டின் டேவிட் குமார் ஆகிய மூவர் பலியாகியிருக்கும் சம்பவம் மிகுந்த அதிர்ச்சியையும், நெஞ்சை உலுக்கும் வேதனையையும் ஏற்படுத்தியுள்ளது என்று சுட்டிக்காட்டியுள்ளார்.

வேட்டையில் ஈடுபட்டதாகவும், வனத்துறை அலுவலர்களைத் தாக்கியதாகவும் கூறப்படும் குற்றச்சாட்டுகள் ஒருபுறமிருக்க, மூன்று பேரின் இன்னுயிரைப் பறிக்கும் அளவிற்கு கண்மூடித்தனமாகத் துப்பாக்கிச் சூடு நடத்தப்பட்டிருப்பது பல்வேறு சந்தேகங்களையும் கேள்விகளையும் எழுப்புகிறது. மனித உயிர்களின் மதிப்பைச் சிறிதும் கருத்தில் கொள்ளாமல் நிகழ்த்தப்பட்டுள்ள இந்தக் காட்டுமிராண்டித்தனமான செயலை தேமுதிக வன்மையாகக் கண்டிக்கிறது. சட்டத்தை நிலைநாட்ட வேண்டிய பொறுப்பில் உள்ள வனத்துறையினர் தங்களது அதிகாரத்தைத் தவறாகப் பயன்படுத்தி அப்பாவி உயிர்களைப் பறித்திருந்தால், அவர்கள் மீது பாரபட்சமின்றி உடனடியாகக் கொலை வழக்குப் பதிவு செய்து வெளிப்படையான விசாரணை நடத்தப்பட வேண்டும் எனத் தெரிவித்துள்ளார்.

இதையும் படிங்க: காவிரியில் தமிழகத்திற்கு நீர் திறப்பு கிடுகிடு உயர்வு: கபினி அணையிலிருந்து 13,600 கன அடியாக அதிகரிப்பு!  

மேலும், துப்பாக்கிச் சூட்டில் அநியாயமாக உயிரிழந்த மூவரின் குடும்பங்களுக்கும் உரிய இழப்பீட்டுத் தொகையை உடனடியாக வழங்க தமிழக அரசு நடவடிக்கை எடுப்பதுடன், அவர்களின் குடும்பங்களில் தகுதியான ஒருவருக்கு அரசு வேலை வழங்கி வாழ்வாதாரத்தை உறுதி செய்ய வேண்டும் என்றும் கோரிக்கை விடுத்துள்ளார். எல்லைப் பகுதிகளில் வாழும் தமிழர்களின் உயிருக்கும், உடைமைக்கும் முழுமையான பாதுகாப்பை உறுதி செய்ய வேண்டிய கடமை இரு மாநில அரசுகளுக்கும் உண்டு என்றும், எனவே தமிழ்நாடு அரசு இனியும் காலம் தாழ்த்தாமல் இவ்விவகாரத்தில் உடனடியாகத் தலையிட்டு கர்நாடக அரசிடம் உரிய முறையில் நீதி கேட்க வேண்டும் என்றும் அவர் தனது அறிக்கையில் திட்டவட்டமாக வலியுறுத்தியுள்ளார்.

இதையும் படிங்க: கர்நாடக வனத்துறை சுட்டுக் கொன்ற 3 தமிழர்கள்: சிபிஐ விசாரணை வேண்டும் என இந்திய கம்யூனிஸ்ட் கட்சி வலியுறுத்தல்!