தமிழ் திரையுலகில் நீண்டகாலமாகப் புகைந்து கொண்டிருந்த நடிகர்களின் சம்பளப் பிரச்சினை, தற்போது தயாரிப்பாளர்கள் சங்கம் மற்றும் தென்னிந்திய நடிகர் சங்கம் இடையே ஒரு பெரும் போராக வெடித்துள்ளது. தயாரிப்பாளர்கள் சங்கம் முன்வைத்துள்ள ‘வருவாய் பகிர்வு’ திட்டத்தை ஏற்க நடிகர் சங்கம் மறுத்துள்ளதால், வரும் மே 1-ஆம் தேதி அறிவிக்கப்பட்டுள்ள அடையாள வேலைநிறுத்தம் உறுதியாகுமா என்ற கேள்வி எழுந்துள்ளது.
சினிமா தயாரிப்புச் செலவு தாறுமாறாக உயர்ந்து வருவதைக் கட்டுப்படுத்த, முன்னணி நடிகர்கள் ஒரு நிலையான சம்பளத்தைப் பெறுவதற்குப் பதிலாக, படத்தின் லாபத்தில் ஒரு குறிப்பிட்ட சதவீதத்தை (Revenue Sharing) ஊதியமாகப் பெற வேண்டும் என்ற புதிய முறையைத் தயாரிப்பாளர்கள் சங்கம் அறிமுகப்படுத்தியுள்ளது. "படம் வெற்றி பெற்றால் நடிகர்களுக்கு அதிக லாபம் கிடைக்கும், அதே சமயம் படம் தோல்வியடைந்தால் தயாரிப்பாளர் நஷ்டத்திலிருந்து தப்பிக்க இது உதவும்" என்பதே தயாரிப்பாளர்களின் வாதம்.
தயாரிப்பாளர்களின் இந்த அதிரடித் திட்டத்தை ஏற்கத் தென்னிந்திய நடிகர் சங்கம் திட்டவட்டமாக மறுத்துவிட்டது. "ஒவ்வொரு படத்திற்கும் வருவாய் பகிர்வு என்பது நடைமுறையில் சாத்தியமற்றது; இது சிறிய மற்றும் வளரும் நடிகர்களின் பொருளாதாரத்தைப் பாதிக்கும்" என நடிகர் சங்கம் தரப்பில் கூறப்பட்டுள்ளது. இதனால் இரு சங்கங்களுக்கும் இடையே தற்போது கடும் கருத்து மோதல்கள் நிலவி வருகின்றன.
இதையும் படிங்க: "தயாரிப்பாளர் சங்கத்தின் ஸ்ட்ரைக் அறிவிப்பு வேதனையளிக்கிறது": நடிகர் சங்கம் காரசாரப் பதில்!
இந்த விவகாரம் குறித்து அறிக்கை வெளியிட்டுள்ள தயாரிப்பாளர்கள் சங்கம், "நடிகர்களின் சம்பளத்தை முறைப்படுத்துவது காலத்தின் கட்டாயம். எங்களது வருவாய் பகிர்வுத் திட்டத்திற்கு ஒப்புதல் கொடுத்து பேச்சுவார்த்தைக்கு வந்தால் மட்டுமே, வரும் மே 1-ஆம் தேதி நடைபெறவிருக்கும் அடையாள வேலைநிறுத்தத்தை மறுபரிசீலனை செய்வோம்" எனத் தெரிவித்துள்ளது. இதனால் மே 1 முதல் படப்பிடிப்புகள் முடங்கும் அபாயம் ஏற்பட்டுள்ளது. திரையுலகின் இரு முக்கியத் தூண்கள் மோதிக்கொள்வதால், பல கோடி ரூபாய் மதிப்பிலான சினிமா திட்டங்கள் கேள்விக்குறியாகியுள்ளன.
இதையும் படிங்க: "தயாரிப்பாளர் சங்கத்தின் ஸ்ட்ரைக் அறிவிப்பு வேதனையளிக்கிறது": நடிகர் சங்கம் காரசாரப் பதில்!