பட்டிமன்றப் பேராசான் சாலமன் பாப்பையாவின் மறைவுக்கு மக்கள் நீதி மய்யம் தலைவர் கமல்ஹாசன் தனது ஆழ்ந்த இரங்கலைத் தெரிவித்துள்ளார். பழந்தமிழ் இலக்கியங்களைப் பாமர மொழியில் விளக்குவது ஒரு தனித்த கலை என்றும், பட்டிமன்றம் என்ற ஊடக வடிவத்தின் மூலம் அந்தத் திறமையைச் சிகரத்திற்கு எடுத்துச் சென்று நிலைநாட்டியவர் சாலமன் பாப்பையா என்றும் அவர் உருக்கமாகக் குறிப்பிட்டுள்ளார். தனது நிறைவாழ்வில் மகத்தான பெருஞ்செயல்களைச் செய்து மறைந்துள்ள அவரது அழியாத புகழ் தமிழ் நிலத்தில் என்றென்றும் நிலைத்திருக்கும் என அவர் புகழாரம் சூட்டியுள்ளார்.

பேராசிரியர் சாலமன் பாப்பையாவின் இலக்கியப் பங்களிப்பை நினைவுகூர்ந்துள்ள கமல்ஹாசன், கடினமான செம்மொழி இலக்கியங்களை எளிய பாமர மக்களும் சுவைக்கும் வண்ணம் நகைச்சுவை இழையோட எடுத்துரைப்பதில் அவர் கைதேர்ந்தவராக விளங்கினார் என்றார். பட்டிமன்றப் பேச்சுக் கலையைத் தமிழ் பண்பாட்டுத் தளத்தில் புதிய பரிமாணத்திற்கு உயர்த்தியதுடன் நில்லாமல், தன்னைப்போலவே தலைசிறந்த பேச்சாளர்களாக நூற்றுக்கணக்கான மாணவர்களை உருவாக்கிய பெரும் ஆசானாக அவர் திகழ்ந்தார் என்று கமல்ஹாசன் நெகிழ்ச்சியுடன் தெரிவித்துள்ளார்.

இதையும் படிங்க: தமிழ்த்தாய் தன் அருந்தவ புதல்வனை இழந்துவிட்டாள்! சாலமன் பாப்பையா மறைவுக்கு ஸ்டாலின் உருக்கம்!

தமது வாழ்நாள் முழுவதும் தமிழுக்கும் தமிழ்ப் பேச்சுக்கலைக்கும் அரும்பணியாற்றி, ஒரு நிறைவாழ்வை வாழ்ந்து மறைந்திருக்கும் பேராசிரியரின் மறைவு தமிழ்ச் சமூகத்திற்கு ஈடுசெய்ய முடியாத இழப்பாகும் என்று அவர் குறிப்பிட்டுள்ளார். தலைமுறைகளைக் கடந்து மக்களைத் தமக்கே உரிய இயல்பான பேச்சால் ஈர்த்த பேராசிரியரின் பணிகளும், அவரது வரலாற்றுப் புகழும் எக்காலத்திலும் தமிழ் மக்களின் நெஞ்சங்களில் நிலைத்து நிற்கும் என்றும் கமல்ஹாசன் தனது இரங்கல் செய்தியில் தெரிவித்துள்ளார்.

இதையும் படிங்க: சாலமன் பாப்பையாவின் கடைசி ஆசை..! உருக்கமான உயில்... நாளை உடல் தகனம்..!!