தமிழகத்தில் விடுபட்ட வாக்காளர்கள் மற்றும் 18 வயது பூர்த்தியடைந்த முதல்முறை இளம் வாக்காளர்களைத் தவறாமல் வாக்காளர் பட்டியலில் சேர்க்கும் வகையில் மாநிலம் தழுவிய சிறப்பு முகாம்கள் நடத்தப்படவுள்ளதாகத் தமிழ்நாடு தலைமைத் தேர்தல் அதிகாரி அர்ச்சனா பட்நாயக் அதிகாரப்பூர்வமாக அறிவித்துள்ளார்.

இந்தியத் தேர்தல் ஆணையத்தின் வழிகாட்டுதலின்படி, சிறப்புத் தீவிரத் திருத்தப் பணிகள் (SIR) வெற்றிகரமாக நிறைவடைந்துள்ள மாநிலங்களில், வாக்காளர் பட்டியலைப் பிழையின்றிச் செம்மைப்படுத்தவும், தகுதியுள்ள எந்தவொரு குடிமகனும் விடுபட்டுவிடக் கூடாது என்பதை உறுதி செய்யவும் ஆணையம் கூடுதல் அறிவுறுத்தல்களை வழங்கியுள்ளது.

இதன்படி, கடந்த செப்டம்பர் 29-ஆம் தேதியன்று இந்தியத் தேர்தல் ஆணையம் அனுப்பியுள்ள அதிகாரப்பூர்வ கடிதத்தின் அடிப்படையில், தமிழகம் முழுவதும் விடுபட்ட வாக்காளர்கள் மற்றும் புதிய வாக்காளர்களைக் கண்டறிந்து பதிவு செய்வதற்கான சிறப்பு முகாம்களைத் தீவிரமாக ஒருங்கிணைக்க விரிவான ஏற்பாடுகள் செய்யப்பட்டு வருகின்றன.

இதையும் படிங்க: SIR விவகாரத்தில் தவெக–காங்கிரஸ் இடையே வெடித்த கருத்து மோதல்! கூட்டணிக்குள் சலசலப்பு!

இப்பணிகளைச் செம்மையாக முன்னெடுப்பது தொடர்பாக, அனைத்து மாவட்டத் தேர்தல் அலுவலர்களான மாவட்ட ஆட்சியர்கள் மற்றும் வாக்காளர் பதிவு அலுவலர்களுடன் தலைமைத் தேர்தல் அதிகாரி அர்ச்சனா பட்நாயக் தலைமையில் காணொளிக் காட்சி வாயிலாக உயர்மட்ட ஆலோசனைக் கூட்டம் இன்று நடைபெற்றது.

இக்கூட்டத்தில் உரையாற்றிய அர்ச்சனா பட்நாயக், அனைத்து மாவட்டங்களிலும் வாக்காளர் பதிவு அலுவலர்கள் மற்றும் வாக்குச்சாவடி நிலை அலுவலர்களை (BLO) நேரடியாகக் களத்தில் ஈடுபடுத்தி, வாக்குச்சாவடி வாரியாக முழுமையான ஆய்வுகளை மேற்கொள்ள வேண்டும் என உத்தரவிட்டார்.

குறிப்பாக, கல்லூரி மாணவ மாணவியர், 18 வயது நிறைந்த இளம் வாக்காளர்கள் மற்றும் முகவரி மாற்றம் காரணமாகப் பட்டியலில் விடுபட்ட பொதுமக்களைக் குறிவைத்து இந்தச் சிறப்பு முகாம்கள் நடத்தப்பட வேண்டும் என்று வலியுறுத்தினார்.

பொதுமக்கள் தங்களின் பெயர்களை வாக்காளர் பட்டியலில் சேர்ப்பது, திருத்தங்கள் மேற்கொள்வது மற்றும் நீக்கம் செய்வது தொடர்பான படிவங்களை இந்த முகாம்களில் நேரடியாக எளிதாகச் சமர்ப்பிக்கத் தேவையான அனைத்து உட்கட்டமைப்பு வசதிகளையும் செய்து தர வேண்டும் எனவும் அவர் அறிவுறுத்தியுள்ளார்.

இதையும் படிங்க: SIR விவகாரத்தில் தேர்தல் ஆணையர்களுக்குள் மோதல்? தேர்தல் கமிஷன் வெளியிட்ட அதிரடி விளக்கம்!