தமிழக வெற்றிக் கழகம் (த.வெ.க.) தலைவரும், புதிய முதலமைச்சருமான ஜோசப் விஜய் கடந்த 10-ம் தேதி பதவியேற்ற நிலையில், அமைச்சரவை விரிவாக்கப் பணிகள் தீவிரமடைந்துள்ளன. அவருடன் என்.ஆனந்த், ஆதவ் அர்ஜூனா, கே.ஏ. செங்கோட்டையன் உள்ளிட்ட 9 பேர் ஏற்கனவே அமைச்சர்களாக பொறுப்பேற்றுள்ளனர். 

விக்கிரவாண்டியில் நடைபெற்ற த.வெ.க. மாநாட்டில் கூட்டணிக்கு ஆட்சியில் பங்கு அளிப்பதாக விஜய் அறிவித்ததை நிறைவேற்றும் வகையில், தேர்தலுக்குப் பின் இணைந்த காங்கிரஸ் கட்சிக்கு 2 அமைச்சர் பதவிகள் ஒதுக்கப்பட உள்ளன. அதேபோல், அ.தி.மு.க.வில் இருந்து பிரிந்து த.வெ.க. அரசுக்கு ஆதரவு அளித்த எஸ்.பி. வேலுமணி அணியினருக்கு 5 இடங்கள் வழங்க திட்டமிடப்பட்டுள்ளது. விடுதலை சிறுத்தைகள் கட்சிக்கும் ஒரு இடம் வழங்குவது குறித்து ஆலோசனை நடைபெற்று வருகிறது.

மொத்தம் 34 அமைச்சர்கள் கொண்ட அமைச்சரவையில், ஆளுங்கட்சியான த.வெ.க.வுக்கு 26 இடங்கள் கிடைக்கும் என எதிர்பார்க்கப்படுகிறது. அடுத்த 3 நாட்களுக்குள் அமைச்சரவை பட்டியலை இறுதி செய்ய முதலமைச்சர் ஜோசப் விஜய் தீவிர நடவடிக்கை எடுத்து வருகிறார். பதவியேற்பு விழா சென்னை கிண்டியில் உள்ள மக்கள் மாளிகையில் கவர்னர் அர்லேகர் முன்னிலையில் நடைபெறும்.

இதையும் படிங்க: ஆதவ் அர்ஜுனா கார் வேண்டாம்!! சொந்தக்காருக்கு மாறிய விஜய்! விமர்சனங்களால் திடீர் மாற்றம்!!

புதிய அரசின் முதல் சட்டசபை கூட்டம் விரைவில் கூட உள்ளது. கவர்னர் உரையுடன் தொடங்கும் இந்தக் கூட்டத்தில் 3 நாட்கள் நன்றி தெரிவிக்கும் தீர்மான விவாதம் நடைபெறும். அதைத் தொடர்ந்து 2026-27 நிதியாண்டுக்கான பட்ஜெட் தாக்கல் செய்யப்படும். கடந்த ஆட்சியில் பொது பட்ஜெட் மற்றும் வேளாண் பட்ஜெட் தனித்தனியே தாக்கல் செய்யப்பட்ட நிலையில், இம்முறை ஒரே பட்ஜெட்டாக இருக்குமா அல்லது தனியாக இருக்குமா என்பது இன்னும் தெளிவாகவில்லை.

பட்ஜெட் விவாதத்துக்குப் பிறகு துறைவாரியாக மானியக் கோரிக்கை விவாதங்கள் நடைபெறும். குறைந்தபட்சம் 40 நாட்கள் சட்டசபைக் கூட்டம் நடைபெறும் என்பதால், புதிய அரசு எப்படி செயல்படப் போகிறது என்பதில் பொதுமக்கள் மற்றும் அரசியல் வட்டாரங்கள் மிகுந்த எதிர்பார்ப்பில் உள்ளனர்.

இதையும் படிங்க: மதிய சாப்பாட்டிற்கு கூட வீட்டிற்கு செல்லாத விஜய்!! டிபன் பாக்சில் வரும் லஞ்ச்! அரசு அதிகாரிகளுக்கு முன்மாதிரி முதலமைச்சர்!