தமிழக காவல்துறையின் தலைமை இயக்குநர் (டிஜிபி) சங்கர் ஜிவால், 35 ஆண்டுகளுக்கும் மேலான தனது புகழ்பெற்ற பணியை முடித்துக்கொண்டு, வரும் ஆகஸ்ட் 31ம் தேதி அன்று ஓய்வு பெறுகிறார். 1990-ஆம் ஆண்டு ஐபிஎஸ் தேர்வில் வெற்றி பெற்று, உத்தரகாண்ட் மாநிலத்தைச் சேர்ந்த இவர், தமிழகத்தில் தனது பணியை 1993-இல் மன்னார்குடியில் உதவி காவல் கண்காணிப்பாளராகத் தொடங்கினார். 

பின்னர், சேலம் மாவட்ட காவல் கண்காணிப்பாளர், சென்னை காவல் ஆணையர் உள்ளிட்ட முக்கிய பதவிகளை வகித்தார். 2023 ஜூன் 30ஆம் தேதி டிஜிபியாகப் பொறுப்பேற்றார். சங்கர் ஜிவாலின் பதவிக்காலத்தில், தமிழகத்தில் சட்டம்-ஒழுங்கைப் பராமரிப்பதில் முக்கிய பங்காற்றினார். அவரது அமைதியான மற்றும் முறையான காவல் பணி அணுகுமுறை பலரால் பாராட்டப்பட்டது. சென்னை காவல் ஆணையராக இரண்டு ஆண்டுகள் பணியாற்றிய இவர், இரண்டு முறை குடியரசுத் தலைவர் பதக்கம் பெற்றுள்ளார்.

இதையும் படிங்க: NO PLASTICS... மரங்களின் மாநாட்டில் தயவு செஞ்சு விதிகளை கடைப்பிடிங்க! சீமான் அறிவுறுத்தல்

இருப்பினும், 2021-இல் திமுக ஆட்சிக்கு வந்த பிறகு, 25 காவல் மரணங்கள் நிகழ்ந்ததாக எழுந்த குற்றச்சாட்டுகள், குறிப்பாக சிவகங்கையில் கோவில் பாதுகாவலர் மரணம் தொடர்பாக மதுரை உயர் நீதிமன்றத்தின் கடுமையான விமர்சனங்களை எதிர்கொண்டது. இவை அவரது பதவிக்காலத்தில் சர்ச்சைகளாக அமைந்தன.

ஜிவாலின் ஓய்வைத் தொடர்ந்து, தமிழக அரசு புதிய டிஜிபியை நியமிக்கும் முயற்சியில் ஈடுபட்டுள்ளது. சீமா அகர்வால், சந்தீப் ராய் ரத்தோர், வெங்கட்ராமன் உள்ளிட்ட ஒன்பது மூத்த ஐபிஎஸ் அதிகாரிகளின் பெயர்கள் யுபிஎஸ்சிக்கு அனுப்பப்பட்டுள்ளன. இதில், வெங்கட்ராமன் புதிய டிஜிபியாக நியமிக்கப்படலாம் என தகவல்கள் தெரிவிக்கின்றன. மேலும், ஜிவால் புதிதாக உருவாக்கப்படவுள்ள தீயணைப்பு சேவைகள் ஆணையத்தின் தலைவராக நியமிக்கப்படுவார் எனவும் தெரிகிறது.

2026-இல் நடைபெறவுள்ள சட்டமன்றத் தேர்தலையொட்டி, புதிய டிஜிபியின் நியமனம் முக்கியத்துவம் வாய்ந்ததாக உள்ளது. சட்டம்-ஒழுங்கு, சைபர் குற்றங்கள் மற்றும் சமூக நல்லிணக்கத்தைப் பேணுவதில் புதிய டிஜிபி முக்கிய பொறுப்புகளை எதிர்கொள்ளவுள்ளார். சங்கர் ஜிவாலின் பணி, தமிழக காவல்துறையில் நீடித்த தாக்கத்தை ஏற்படுத்தியுள்ளது, மேலும் அவரது ஓய்வு ஒரு முக்கிய அத்தியாயத்தின் முடிவை குறிக்கிறது.

இந்நிலையில் தமிழ்நாடு காவல்துறையின் மூத்த ஐபிஎஸ் அதிகாரியான ஜி. வெங்கட்ராமன், இன்று சென்னையில் உள்ள தலைமைச் செயலகத்தில் முதலமைச்சர் மு.க. ஸ்டாலினை சந்தித்தார். தற்போது கூடுதல் டைரக்டர் ஜெனரல் ஆஃப் போலீஸ் (ஏடிஜிபி) பதவியில் இருக்கும் வெங்கட்ராமன், காவல்துறையின் சைபர் கிரைம் பிரிவை வழிநடத்தி வருகிறார். 

மத்திய அரசின் பரிந்துரைப் பட்டியல் வராத நிலையில், இடைக்கால ஏற்பாடாக ஜி. வெங்கட்ராமன் புதிய பொறுப்பு டிஜிபியாக நியமிக்கப்பட வாய்ப்புள்ளதாக தகவல்கள் தெரிவிக்கின்றன. அந்த வகையில் அவர் முதல்வர் ஸ்டாலினை சந்திக்க தலைமைச் செயலகத்திற்கு வருகை தந்துள்ளார். அது போல் இன்று பணி ஓய்வு பெறும் சங்கர் ஜிவாலும், முதல்வரை சந்திக்க சென்றுள்ளார். பொதுவாக டிஜிபி நியமனத்தின் போது புதிய டிஜிபியும் ஓய்வு பெறும் டிஜிபியும் தலைமைச் செயலகத்திற்கு செல்வது வழக்கம்.

1994-ஆம் ஆண்டு பயிற்சி பெற்ற ஐபிஎஸ் அதிகாரியான ஜி. வெங்கட்ராமன், தமிழ்நாடு காவல்துறையில் மின்னணு ஆளுமை (இ-கவர்னன்ஸ்) முன்னெடுப்புகளில் முக்கிய பங்காற்றியுள்ளார். முன்னதாக, இன்ஸ்பெக்டர் ஜெனரல் ஆஃப் போலீஸ் (நிர்வாகம்) பதவியில் இருந்தபோது, காவல்துறை தலைமையகத்தில் பேப்பர்லெஸ் கோப்பு மேலாண்மை முறையை அறிமுகப்படுத்தி, தொழில்நுட்ப மயமாக்கலுக்கு வித்திட்டார்.  

முதல்வர் ஸ்டாலின் வரும் 30-ஆம் தேதி (நாளை) வெளிநாடு செல்லவுள்ள நிலையில், அதற்கு முன்னதாக புதிய டிஜிபி குறித்த அறிவிப்பு இன்று வெளியாகிறது. தமிழகத்தில் சட்டம் ஒழுங்கு நிலை குறித்து எதிர்க்கட்சிகள் விமர்சித்து வரும் நிலையில், புதிய டிஜிபி நியமனம் என்பது முக்கியத்துவம் வாய்ந்ததாகப் பார்க்கப்படுகிறது.

இதையும் படிங்க: ஆப்கான் மீது பாக்., டிரோன் தாக்குதல்!! தரைமட்டமாக்கப்பட்ட வீடுகள்.. போருக்கு அச்சாரமா?