தமிழகத்தில் அரசுப் பணிகளுக்கான நேரடி நியமனங்களில் வயது உச்சவரம்பை தற்போதைய விதிகளில் உள்ளதை விட கூடுதலாக 5 ஆண்டுகள் உயர்த்தி மாண்புமிகு தமிழ்நாடு முதலமைச்சர் திரு. சி. ஜோசப் விஜய் அவர்கள் உத்தரவிட்டுள்ளார். பல்லாயிரக்கணக்கான போட்டித் தேர்வர்கள் மற்றும் இளைஞர்களின் நீண்ட நாள் கோரிக்கையை ஏற்று பிறப்பிக்கப்பட்டுள்ள இந்த உத்தரவு இன்று முதல் உடனடியாக நடைமுறைக்கு வந்துள்ளது.
மாநில அரசுப் பணிகளுக்குத் தயாராகி வரும் தேர்வர்கள் மற்றும் வேலைவாய்ப்பை எதிர்நோக்கியுள்ள இளைஞர்கள், கொரோனா காலகட்ட இழப்புகள் மற்றும் தேர்வு அறிவிப்பு காலதாமதம் உள்ளிட்ட காரணங்களைச் சுட்டிக்காட்டி வயது வரம்பைத் தளர்த்த வேண்டும் எனத் தொடர்ந்து அரசுக்குக் கோரிக்கை விடுத்து வந்தனர். அவர்களின் கோரிக்கைகளைத் தாயுள்ளத்தோடு பரிசீலித்த முதலமைச்சர், போட்டித் தேர்வர்களின் எதிர்கால நலனைக் கருத்தில் கொண்டு, நேரடி நியமனப் பணிகளுக்கான உச்ச வயது வரம்பை 5 ஆண்டுகள் உயர்த்தி உத்தரவு பிறப்பித்துள்ளார்.
இந்த வயது வரம்பு உயர்வானது இடஒதுக்கீட்டுப் பிரிவினரான பிற்படுத்தப்பட்டோர் (BC), பிற்படுத்தப்பட்டோர் முஸ்லிம் (BCM), மிகவும் பிற்படுத்தப்பட்டோர் மற்றும் சீர்மரபினர் (MBC & DNC), ஆதிதிராவிடர் (SC), பழங்குடியினர் (ST) மற்றும் ஆதரவற்ற விதவைகளுக்கு ஏற்கனவே அரசு விதிகளின்படி வழங்கப்பட்டு வரும் வயதுச் சலுகையோடு கூடுதலாகவே அமையும் எனத் தெரிவிக்கப்பட்டுள்ளது.
இதையும் படிங்க: அரசு அவுட்சோர்சிங் பணியாளர் நியமனம்: அயல்நாட்டு வேலைவாய்ப்பு நிறுவனம் மூலம் மட்டுமே நியமிக்க தமிழக அரசு ஆணை!
இதன்படி மாற்றி அமைக்கப்பட்ட புதிய வயது வரம்பு விவரங்கள் வெளியிடப்பட்டுள்ளன. குரூப்-1 தேர்வைப் பொறுத்தவரை, பொதுப் பிரிவினருக்கான வயது வரம்பு 32-லிருந்து 37 ஆகவும், ஒதுக்கீட்டுப் பிரிவினருக்கு 37-லிருந்து 42 ஆகவும் உயர்த்தப்பட்டுள்ளது. மாற்றுத்திறனாளிகளில் பொதுப் பிரிவினருக்கு 42-லிருந்து 47 ஆகவும், ஒதுக்கீட்டுப் பிரிவினருக்கு 47-லிருந்து 52 ஆகவும் அதிகரிக்கப்பட்டுள்ளது. இதேபோல் குரூப்-2 மற்றும் குரூப்-2ஏ தேர்வுகளில் பொதுப் பிரிவினருக்கான வயது வரம்பு 30-லிருந்து 35 ஆகவும், மாற்றுத்திறனாளி பொதுப் பிரிவினருக்கு 40-லிருந்து 45 ஆகவும் தளர்த்தப்பட்டுள்ளது. இத்தேர்வுகளில் ஒதுக்கீட்டுப் பிரிவினருக்கு ஏற்கனவே உள்ள நடைமுறைப்படி உச்ச வயது வரம்பு ஏதுமில்லை என்பது தொடரும்.
மேலும் குரூப்-4 தேர்வுகளில் குறைந்தபட்சக் கல்வித் தகுதிக்கு மேல் கூடுதல் தகுதி பெற்றவர்களுக்கு ஏற்கனவே உச்ச வயது வரம்பு இல்லை என்ற நிலை தொடரும் நிலையில், பள்ளி இறுதித் தகுதி மட்டுமே கொண்டவர்களில் பொதுப் பிரிவினருக்கு 30-லிருந்து 35 ஆகவும், பிற்படுத்தப்பட்ட மற்றும் மிகவும் பிற்படுத்தப்பட்ட பிரிவினருக்கு 32-லிருந்து 37 ஆகவும், ஆதிதிராவிடர், பழங்குடியினர் மற்றும் ஆதரவற்ற விதவைகளுக்கு 35-லிருந்து 40 ஆகவும் வயது வரம்பு தளர்த்தப்பட்டுள்ளது. மாற்றுத்திறனாளிகளிலும் இந்தப் பிரிவுகளுக்கு முறையே 45, 47 மற்றும் 50 என வயது வரம்புகள் மாற்றி அமைக்கப்பட்டுள்ளன.
இன்று (30.10.2026) முதல் நடைமுறைக்கு வரும் இந்த வயது உச்சவரம்புத் தளர்வு அடுத்த ஐந்து ஆண்டுகள் வரை செயல்பாட்டில் இருக்கும் எனச் செய்தி மக்கள் தொடர்புத் துறை வெளியிட்டுள்ள அறிக்கையில் தெரிவிக்கப்பட்டுள்ளது. தமிழக அரசின் இந்த அதிரடி முடிவின் மூலம், வயது வரம்பு முடிவடையும் தருவாயில் இருந்த பல்லாயிரக்கணக்கான கிராமப்புற மற்றும் நகர்ப்புறப் போட்டித் தேர்வர்கள் பெரும் நிம்மதியும் புதிய வாய்ப்பும் பெற்றுள்ளனர்.
இதையும் படிங்க: விபி-ஜி ராம்-ஜி திட்டம்: 25 நாட்கள் கூடுதல் வேலை, ரூ. 100 கோடி ஒதுக்கீடு... தமிழ்நாடு அரசு!