அமெரிக்க அதிபர் டொனால்ட் டிரம்ப், ஈரான் ஹார்முஸ் ஜலசந்தி வழியாக எண்ணெய் கப்பல்களின் போக்குவரத்தைத் தடுத்தால், இதுவரை நடத்திய தாக்குதல்களை விட 20 மடங்கு கடுமையான தாக்குதலைத் தொடுப்போம் என்று கடும் எச்சரிக்கை விடுத்துள்ளார். இது உலக அளவில் எண்ணெய் விலை ஏற்றத்துக்கு மத்தியில் பெரும் பதற்றத்தை ஏற்படுத்தியுள்ளது.

அமெரிக்கா-இஸ்ரேல் கூட்டணியின் தொடர் தாக்குதல்களால் ஈரான் பாதிக்கப்பட்ட நிலையில், ஹார்முஸ் ஜலசந்தியை ஈரான் தற்காலிகமாக முடக்கியுள்ளது. இதனால், உலகின் சுமார் 20 சதவீத எண்ணெய் விநியோகம் பாதிக்கப்பட்டுள்ளது. 1,000-க்கும் மேற்பட்ட கப்பல்கள், அதில் 2 லட்சம் கோடி ரூபாய் மதிப்பிலான கச்சா எண்ணெய் உள்ளிட்ட சரக்குகளுடன் வளைகுடா கடலில் சிக்கியுள்ளன. இதனால் உலகெங்கும் எண்ணெய் விலை உயர்ந்து வருகிறது.

இந்நிலையில், அதிபர் டிரம்ப் தனது சமூக வலைதள பதிவில் (Truth Social) கடுமையான எச்சரிக்கை விடுத்துள்ளார். "ஈரான் ஹார்முஸ் ஜலசந்தியில் எண்ணெய் ஓட்டத்தை நிறுத்தும் எந்த நடவடிக்கையும் எடுத்தால், அமெரிக்கா அவர்களை இதுவரை தாக்கியதை விட TWENTY TIMES HARDER (20 மடங்கு கடுமையாக) தாக்கும்.

இதையும் படிங்க: ரத்த வெறி கொண்ட பயங்கரவாத ஆட்சி! ஆயுதங்களை கீழ போடுங்க!! ஈரானை எச்சரிக்கும் அதிபர் ட்ரம்ப்!

எளிதில் அழிக்கக்கூடிய இலக்குகளை அழித்து, ஈரான் ஒரு நாடாக மீண்டும் எழுந்து நிற்பது சாத்தியமற்றதாக ஆக்கிவிடுவோம். மரணம், தீ மற்றும் பயங்கர பதற்றம் அவர்கள் மீது ஆதிக்கம் செலுத்தும். ஆனால் இது நடக்கக்கூடாது என்று நம்பி, பிரார்த்திக்கிறேன்" என்று அவர் குறிப்பிட்டுள்ளார்.

மேலும், இது சீனா உள்ளிட்ட ஹார்முஸ் ஜலசந்தியை அதிகம் பயன்படுத்தும் நாடுகளுக்கு அமெரிக்கா சார்பில் அளிக்கப்படும் "பரிசு" என்றும், இத்தகைய நடவடிக்கை பெரிதும் பாராட்டப்படும் என்றும் டிரம்ப் தெரிவித்துள்ளார். இந்த எச்சரிக்கை, ஈரான் மீதான போர் விரைவில் முடிவடையும் என்ற அவரது முந்தைய கூற்றுகளுக்கு மாற்றாக, மேலும் தீவிரமடையும் அபாயத்தை சுட்டிக்காட்டுகிறது.

ஈரான் தரப்பில் இதற்கு பதிலடி கொடுக்கும் வகையில், எண்ணெய் ஏற்றுமதியை முழுமையாக நிறுத்துவோம் என்று IRGC தளபதிகள் எச்சரித்துள்ளனர். இதனால் உலக சந்தையில் எண்ணெய் விலை மேலும் உயரும் அச்சம் எழுந்துள்ளது. இந்தியா உள்ளிட்ட பல நாடுகள் எண்ணெய் இறக்குமதியில் சிரமத்தை எதிர்கொள்ளும் நிலை உருவாகியுள்ளது.

இந்த பதிவு உலக அரசியல் வட்டாரத்தில் பெரும் கவனத்தை ஈர்த்துள்ளது. டிரம்பின் கடுமையான நிலைப்பாடு, ஹார்முஸ் ஜலசந்தி பிரச்சினையை மேலும் சிக்கலாக்கும் என ஆய்வாளர்கள் கருத்து தெரிவிக்கின்றனர். உலக நாடுகள் இப்போது இந்த பதற்றத்தின் அடுத்த கட்டத்தை உன்னிப்பாக கண்காணித்து வருகின்றன.

இதையும் படிங்க: 15 நாள்தான் டைம்! மோசமான விளைவுகள் காத்திருக்கு! ஜாக்கிரதை! ஈரானுக்கு கெடு விதித்தார் அதிபர் ட்ரம்ப்!