சென்னையில் நடைபெற்ற தனியார் விருது வழங்கும் விழா ஒன்றில் கலந்துகொண்டு பேசிய தமிழக வாழ்வுரிமைக் கட்சித் தலைவர் வேல்முருகன், தமிழக வெற்றிக் கழகத் தலைவரும் நடிகருமான விஜய் குறித்துப் பேசியுள்ள கருத்துகள் அரசியல் வட்டாரத்தில் பெரும் பரபரப்பை ஏற்படுத்தியுள்ளன.

விழா மேடையில் பேசிய வேல்முருகன், கடந்த காலங்களில் விஜய் நடித்த 'கத்தி' திரைப்படத்திற்கு எழுந்த எதிர்ப்புகள் குறித்து நினைவுகூர்ந்தார். "கத்தி படத்தை நான் எதிர்த்தபோது, இன்றைக்கு தமிழ்நாட்டின் முதல்வர் வேட்பாளராக முன்னிறுத்தப்பட்டிருக்கின்ற விஜய் அவர்களுடைய மேலாளர் என்னிடம் வந்து பேரம் பேசினார்" என்று அவர் பகிரங்கமாகக் குற்றம் சாட்டினார்.

அந்தப் பேச்சுவார்த்தையின் போது தமக்கு மிகப் பெரிய தொகையை நன்கொடையாக வழங்க முன்வந்ததாகவும் அவர் தெரிவித்தார். கட்சியின் வளர்ச்சிக்கு ஒரு பெரிய தொகையைத் தருவதாகக் கூறினார்கள்.

இதையும் படிங்க: தமிழக சட்டமன்றத் தேர்தல் 2026: தவெக வேட்பாளர்களுடன் விஜய்..!! நாளை முக்கிய மீட்டிங்..!!

அதுமட்டுமன்றி, கட்சியின் நிர்வாகிகள் அனைவருக்கும் புதிய வாகனங்கள் வாங்கித் தருவதாகவும் அந்த மேலாளர் உறுதி அளித்தார். ஆனால், "இதுவரை யாரிடமும் அப்படி லஞ்சமோ, கமிஷனோ வாங்காதவன் நான்" என்று கூறி அந்தப் பேரத்தைத் தான் நிராகரித்துவிட்டதாக வேல்முருகன் அவ்விழாவில் பெருமையுடன் குறிப்பிட்டார்.

தேர்தல் முடிவுகள் வெளியாக இன்னும் சில தினங்களே உள்ள நிலையில், ஒரு முதல்வர் வேட்பாளராகக் கருதப்படும் விஜய் குறித்து வேல்முருகன் வெளியிட்டுள்ள இந்தப் பழைய விவகாரம் சமூக வலைதளங்களில் விவாதப் பொருளாகியுள்ளது. இது குறித்துத் தமிழக வெற்றிக் கழகத் தரப்பிலிருந்து இதுவரை எந்தவொரு அதிகாரப்பூர்வ விளக்கமும் அளிக்கப்படவில்லை.

இதையும் படிங்க: மே 4ம் தேதி எலக்ஷன் ரிசல்ட்..!! அன்னைக்கு விஜய் சென்னையிலேயே இருக்க மாட்டாராம்..!! எங்க போறாரு தெரியுமா..??