திருச்சி அரியமங்கலம் பகுதியில் பல ஆண்டுகளாக மலைபோலக் குவிந்து கிடக்கும் திடக்கழிவுகளை அகற்றுவது தொடர்பாக, ஆளுங்கட்சியான தமிழக வெற்றிக் கழகத்தின் திருவெறும்பூர் தொகுதி சட்டமன்ற உறுப்பினர் திரு. நவல்பட்டு விஜி முன்வைத்துள்ள ஒரு யோசனை, தற்பொழுது தமிழக சுற்றுச்சூழல் ஆர்வலர்கள் மற்றும் அரசியல் வட்டாரத்தில் பெரும் விவாதப் புயலையும் சலசலப்பையும் கிளப்பியுள்ளது. துவாக்குடி அருகே உள்ள சுமார் 1,700 அடி ஆழமுள்ள ஒரு பாறைப் பள்ளத்தில் இந்தக் குப்பைகளைக் கொட்டினால் எந்தப் பாதிப்பும் ஏற்படாது எனத் தவெக எம்.எல்.ஏ விடுத்துள்ள கருத்துக்கு, பா.ஜ.க தேசிய மகளிர் அணி தலைவியும், கோவை தெற்கு சட்டமன்ற உறுப்பினருமான வானதி சீனிவாசன் இன்று கோட்டையை நோக்கி மிகக் கடுமையான கண்டன அறிக்கை ஒன்றை அதிரடியாக வெளியிட்டுள்ளார்.

தவெக எம்.எல்.ஏ நவல்பட்டு விஜியின் இந்த அதிரடி யோசனைக்குக் கண்டனம் தெரிவித்துள்ள வானதி சீனிவாசன், "திருச்சி துவாக்குடி பாறைப் பள்ளத்தில் ஆயிரக்கணக்கான டன் குப்பைகளைக் கொண்டு சென்று கொட்டுவது என்பது அந்தப் பகுதியின் ஒட்டுமொத்த இயற்கை வளத்தினையும் முற்றிலும் பாழாக்கும் ஒரு விபரீதச் செயலாகும். ஒரு மக்கள் பிரதிநிதியிடமிருந்து இப்படிப்பட்ட ஒரு முதிர்ச்சியற்ற, ஆபத்தான யோசனை வந்திருப்பது அதிர்ச்சியளிக்கிறது என்று சாடியுள்ளார்.

தொடர்ந்து சுற்றுச்சூழல் பாதிப்புகள் குறித்து எச்சரித்த அவர், ஆயிரக்கணக்கான டன் குப்பைகளை ஒரே இடத்தில், அதுவும் 1,700 அடி ஆழமுள்ள ஒரு பெரிய பள்ளத்தில் கொட்டும் போது, அந்தப் பகுதியின் நிலத்தடி நீர்வளம், மண்வளம் மற்றும் இயற்கையான நீர் வழித்தடங்கள் (Natural Drainage) ஆகியவை மிகக் கடுமையாகப் பாதிக்கப்படும் அபாயம் உள்ளது. மக்கும் குப்பைகள் கூட ஏதோ ஒரு காலகட்டத்தில் இயற்கையாக மண்ணோடு மண்ணாகக் கலந்துவிடும். ஆனால், அங்கு கொட்டப்படவுள்ள மக்காத பிளாஸ்டிக் பொருட்கள் மற்றும் அபாயகரமான நச்சு வேதிவழிக் கழிவுகள் (Toxic Waste) அனைத்தும் ஒன்று சேர்ந்து கொட்டப்படும் போது, அதன் கொடூரமான தாக்கம் மற்றும் சுற்றுச்சூழல் சீர்கேடு அடுத்த பல தலைமுறைகளுக்கு, பல ஆண்டுகள் நீடிக்கும் என வானதி சீனிவாசன்  தெரிவித்துள்ளார்.

இதையும் படிங்க: 50% முதல் 90% வரை தள்ளுபடி! ஏழை எளிய மக்களுக்காக மலிவு விலை மருந்தகங்களை அதிகரிக்க வானதி சீனிவாசன் வலியுறுத்தல்!

இத்தகைய ஆபத்தான நடைமுறைகளைத் தவெக அரசு உடனே கைவிட வேண்டும் என வலியுறுத்தியுள்ள வானதி சீனிவாசன், புதிய அரசு அமைந்த உடனே தமிழக அரசுக்கு பா.ஜ.க சார்பில் ஏற்கனவே நாம் அதிகாரப்பூர்வமாக முன்வைத்திருந்த 'கோரிக்கை எண் : 4'-ஐ முதலமைச்சர் ஜோசப் விஜய் உடனடியாகக் கையில் எடுக்க வேண்டும். அதாவது, குப்பைகளை ஒட்டுமொத்தமாகக் கொண்டு போய் எங்காவது கொட்டிப் புதைக்கும் பழைய காலத்து முறைகளை ஒழித்துவிட்டு, உலகத்தரம் வாய்ந்த நவீன திடக்கழிவு மேலாண்மை திட்டங்களை (Modern Solid Waste Management) தமிழகத்தின் அனைத்து மாநகராட்சிகளிலும் உடனடியாக முழுமையாகச் செயல்படுத்த வேண்டும் எனக் கேட்டுக்கொண்டுள்ளார்.

தூய்மை இந்தியாவின் நோக்கம் வெல்லட்டும்: மேலும், குப்பைகளை அறிவியல் பூர்வமாகப் பிரித்தெடுத்து, நவீனத் தொழில்நுட்பங்கள் மூலம் அவற்றை மறுசுழற்சி (Recycling) செய்யும் உன்னத முறைகளைக் கொண்டு வர வேண்டும். இதன் மூலமே பாரதப் பிரதமர் நரேந்திர மோடியின் கனவுத் திட்டமான 'தூய்மை இந்தியா' (Swachh Bharat) திட்டத்தின் உண்மையான நோக்கங்களைத் தமிழக மண்ணில் முழுமையாக நடைமுறைப்படுத்த முடியும் என்பதால், தமிழக அரசு இந்த விவகாரத்தில் போர்க்கால அடிப்படையில் துரித நடவடிக்கை எடுக்க வேண்டும் என அவர் தனது அறிக்கையின் இறுதியில் மிகக் கடுமையாகக் கோரிக்கை விடுத்துள்ளார்.

இதையும் படிங்க: 717 மதுக்கடைகள் மூடல் ஒரு நல்ல தொடக்கம்..!! CM விஜய்க்கு நன்றி.. வானதி சீனிவாசன் வரவேற்பு..!!