தமிழக வாழ்வுரிமைக் கட்சித் தலைவர் வேல்முருகன், நொய்யல் மற்றும் தென்பெண்ணை ஆறுகளில் நுரை பெருக்கெடுப்பதற்கு பொதுமக்கள் பயன்படுத்தும் சோப்பு மற்றும் ஷாம்புதான் காரணம் என்று சுற்றுச்சூழல் அமைச்சர் ராஜிவ் தெரிவித்த கருத்தைக் கடுமையாகக் கண்டித்துள்ளார். தேசிய பசுமைத் தீர்ப்பாயப் பதிவுகளில் தென்பெண்ணை ஆற்றின் மாசுபாட்டுக்கு சுத்திகரிக்கப்படாத கழிவுநீர் மற்றும் தொழிற்சாலைக் கழிவுகள் தொடர்பான விவரங்கள் தெளிவாக இடம்பெற்றுள்ள நிலையில், அமைச்சர் பொதுமக்களின் அன்றாட உபயோகப் பொருட்களை மட்டும் காரணமாகக் கூறுவது எந்த ஆய்வின் அடிப்படையில் என்று அவர் கேள்வி எழுப்பியுள்ளார்.

கழிவுநீர் கலப்பு தொடர்பாகத் தீர்ப்பாயத்தில் பதிவுகள் இருக்கும்போது, அந்தக் கழிவுகளைக் கணக்கில் கொள்ளாமல் சோப்பு மற்றும் ஷாம்புவை மட்டும் சுட்டிக்காட்டுவது ஏன் என்றும் அவர் வினவியுள்ளார். நொய்யல் ஆற்றின் நுரைக்கு சோப்பு மற்றும் ஷாம்புதான் முக்கியக் காரணம் என்றால், அமைச்சர் எந்த நீர்மாதிரியை ஆய்வு செய்து இந்த முடிவுக்கு வந்தார் என்று வேல்முருகன் கேட்டுள்ளார். ஆற்றில் கலக்கும் தொழிற்சாலைக் கழிவுநீரின் ரசாயனக் கூறுகள் என்ன என்பதை அரசு வெளியிட வேண்டும் என்றும், சோப்பு மற்றும் ஷாம்புவே காரணம் என்றால் கழிவுநீர் சுத்திகரிப்பு நிலையங்களின் செயல்பாடு குறித்து அரசு மேற்கொண்ட ஆய்வு முடிவுகள் என்ன என்றும் அவர் கேள்வி எழுப்பியுள்ளார். நொய்யல் பகுதியில் பல ஆண்டுகளாகப் பேசப்படும் சாயப்பட்டறைக் கழிவுநீர் பிரச்சினைக்கு அரசின் தற்போதைய நிலைப்பாடு என்ன என்பதையும் அவர் கேட்டுள்ளார்.

தென்பெண்ணையில் கர்நாடகப் பகுதிகளில் இருந்து கழிவுநீர் மற்றும் தொழிற்சாலைக் கழிவுகள் வருவதாக தேசிய பசுமைத் தீர்ப்பாயப் பதிவுகளில் குறிப்பிடப்பட்டுள்ள நிலையில், அதற்கான தடுப்பு நடவடிக்கைகள் எங்கே என்றும் அவர் வினவியுள்ளார். ஒருபுறம் கழிவுநீர் தொடர்பான பிரச்சினையை அரசு அமைப்புகளே பதிவு செய்கின்றன. மறுபுறம் பொதுமக்களின் குளியல் சோப்பு மற்றும் ஷாம்புவை மட்டும் காரணமாகக் கூறுவது எந்த அறிவியல் அடிப்படையில் என்று வேல்முருகன் கேள்வி எழுப்பியுள்ளார். ஆற்றில் நுரை உருவாகும் காரணத்தைத் தீர்மானிக்கும் முழுமையான நீரியல் மற்றும் ரசாயன ஆய்வு அறிக்கையை அரசு மக்களிடம் வெளியிடத் தயாரா என்றும் அவர் கேட்டுள்ளார். மாசுபாட்டின் மூலத்தைக் கண்டறிந்து நடவடிக்கை எடுப்பதுதான் அரசின் கடமை.

இதையும் படிங்க: இது உலகமகா கண்டுப்பிடிப்பு! நோபல் பரிசே கொடுக்கலாம்! அமைச்சர் ராஜீவ் பேச்சுக்கு செல்லூர் ராஜு விமர்சனம்!

பொதுமக்களின் அன்றாடப் பயன்பாட்டைச் சுட்டிக்காட்டுவது எப்படித் தீர்வாகும் என்று அவர் சுட்டிக்காட்டியுள்ளார். தமிழ்நாட்டின் ஆறுகள் மக்களின் குடிநீர், விவசாயம் மற்றும் வாழ்வாதாரம் ஆகியவற்றுடன் நேரடியாக இணைந்தவை என்பதால், காரணத்தை அறிவியல் தரவுகளால் நிரூபிக்காமல் எந்த ஒரு தரப்பினர் மீதும் பழியைச் சுமத்தாமல், ஆற்றில் கலக்கும் ஒவ்வொரு கழிவின் மூலத்தையும் அரசு வெளிப்படையாகக் கண்டறிய வேண்டும் என்று அவர் வலியுறுத்தியுள்ளார். அமைச்சர் தெரிவித்துள்ள கருத்தைத் திரும்பப் பெறுவதோடு, அதற்கு உரிய வருத்தம் தெரிவிக்க வேண்டும் எனத் தமிழக வாழ்வுரிமைக் கட்சியின் சார்பில் வேல்முருகன் வலியுறுத்தியுள்ளார்.

இதையும் படிங்க: ஐந்து தொகுதி இடைத்தேர்தல்! அன்பில் மகேஷ் கைதால் திமுகவுக்கு பின்னடைவு! தவெக கையில் அஸ்திரம்!