தமிழக சட்டசபை தேர்தல் முடிவுகள் வெளியானதையடுத்து மாநில அரசியல் பரபரப்பான நிலையை எட்டியுள்ளது. எந்த ஒரு கட்சிக்கும் தெளிவான பெரும்பான்மை கிடைக்காத நிலையில், கூட்டணி அரசியல் முக்கியத்துவம் பெற்றுள்ளது.

தேர்தல் முடிவுகளின்படி, தமிழக வெற்றிக் கழகம் 108 இடங்களில் முன்னிலை பெற்றுள்ளது. அதேவேளை, திராவிட முன்னேற்றக் கழகம் (Dravida Munnetra Kazhagam) தலைமையிலான கூட்டணி 73 இடங்களிலும், அனைத்திந்திய அண்ணா திராவிட முன்னேற்ற கழகம் (All India Anna Dravida Munnetra Kazhagam) கூட்டணி 53 இடங்களிலும் வெற்றி பெற்றுள்ளது.

பெரும்பான்மை எட்ட வேண்டிய 118 எண்ணிக்கையை அடைய முடியாததால், தமிழக வெற்றிக் கழக தலைவர் விஜய் தற்போது கூட்டணி ஆதரவை திரட்டும் பணியில் தீவிரமாக ஈடுபட்டுள்ளார். இதற்காக, இந்திய தேசிய காங்கிரஸ் (Indian National Congress), விடுதலை சிறுத்தைகள் கட்சி (Viduthalai Chiruthaigal Katchi), கம்யூனிஸ்ட் கட்சிகள் (Communist Party of India, Communist Party of India (Marxist))மற்றும் பாட்டாளி மக்கள் கட்சி (Pattali Makkal Katchi) ஆகிய கட்சிகளுக்கு ஆதரவு கோரி கடிதம் அனுப்பப்பட்டதாக தகவல்கள் தெரிவிக்கின்றன.

இதையும் படிங்க: TVK+ CONGRESS..! வகுப்புவாத சக்திகளை விலக்கி வைக்கணும்..! டிமாண்ட் வைத்து கூட்டணிக்குள் நுழைந்த காங்கிரஸ்..!

இதில் காங்கிரஸ் கட்சி, தமிழக வெற்றிக் கழகத்திற்கு ஆதரவு வழங்க முன்வந்துள்ளது. இதேவேளை, அரசியல் சமன்பாட்டை மாற்றக்கூடிய முயற்சியாக, த.வெ.க. பொதுச்செயலாளர் புஸ்ஸி ஆனந்த், அதிமுக பொதுச்செயலாளர் எடப்பாடி பழனிசாமியை  (Edappadi K. Palaniswami) நேரில் சந்தித்து ஆதரவு கோரியதாகவும் தகவல்கள் வெளியாகியுள்ளன.

இந்நிலையில், அதிமுக மூத்த தலைவர் செங்கோட்டையன் (Sengottaiyan), சட்டமன்ற செயலாளரை சந்தித்து, புதிய எம்.எல்.ஏ.க்களுக்கு பதவிப்பிரமாணம் நடத்த தற்காலிக சபாநாயகர் தேர்வு குறித்து ஆலோசனை மேற்கொண்டார். இது அரசியல் சூழ்நிலையை மேலும் பரபரப்பாக்கியுள்ளது.

இதற்கிடையில், நீலாங்கரையில் உள்ள தனது இல்லத்தில் விஜய், பிரபல ஜோதிடர் ரிக்கி ரதன் பண்டித் (Ricky Rathan Pandit) சந்தித்ததாக தகவல்கள் வெளியாகியுள்ளன. ஆட்சியமைப்பதற்கான அடுத்த கட்ட நடவடிக்கைகள், குறிப்பாக பதவியேற்பு விழா நடைபெறும் நாள் மற்றும் நேரம் குறித்து ஆலோசிக்கப்பட்டதாக கூறப்படுகிறது.

விஜய் இன்று பிற்பகல் ஆளுநரை சந்தித்து ஆட்சியமைக்க உரிமை கோர உள்ள நிலையில், இந்த ஆலோசனைகள் அரசியல் வட்டாரங்களில் பெரும் கவனத்தை ஈர்த்துள்ளன. அடுத்த சில நாட்கள் தமிழக அரசியலின் திசையை தீர்மானிக்கும் முக்கிய காலமாக பார்க்கப்படுகிறது.

இதையும் படிங்க: திமுக அமைச்சர்களை வீழ்த்தியவர்களுக்கு அதே துறையில் மந்திரி பதவி! சிக்ஸர் அடித்து ஆடும் விஜய்!!