புழல் மத்திய சிறையில் முதல் வகுப்பு வசதிகளுடன் அடைக்கப்பட்டுள்ள முன்னாள் பள்ளிக் கல்வித்துறை அமைச்சர் அன்பில் மகேஷ் பொய்யாமொழிக்கு, நீதிமன்ற உத்தரவின்படி பல சிறப்பு ஏற்பாடுகள் செய்யப்பட்டுள்ளன. தனியார் பள்ளிகளுக்கு அரசு அங்கீகாரம் மற்றும் பல்வேறு அனுமதிகள் பெற்றுத் தருவதாகக் கூறி சுமார் 100 கோடி ரூபாய் வசூலித்ததாக எழுந்த வழக்கில் கைது செய்யப்பட்ட இவர், நவம்பர் 6 ஆம் தேதி வரை நீதிமன்றக் காவலில் உள்ளார்.

முதல் வகுப்பு கைதியாக தனி அறையில் தங்க வைக்கப்பட்டுள்ள அன்பில் மகேஷுக்கு கட்டில், மெத்தை, நாற்காலி, மேஜை மற்றும் மின்விசிறி ஆகியவை வழங்கப்பட்டுள்ளன. அறைக்குள்ளேயே கழிப்பறை வசதி உள்ளது. நீதிமன்றக் காவலில் இருப்பதால் சாதாரண உடை அணிந்துகொள்ள அனுமதி உண்டு. ஆனால் ஏசி இல்லாததால் இரவில் தூங்குவதில் சிரமம் ஏற்படுவதாகவும், புழல் பகுதியில் கொசுத் தொல்லை அதிகமாக இருப்பதால் கொசு விரட்டி வழங்கப்பட்டுள்ளதாகவும் சிறை அதிகாரிகள் தெரிவிக்கின்றனர்.

உடல்நிலையைக் கருத்தில் கொண்டு (குறிப்பாக கணைய அழற்சி தொடர்பான பிரச்சினை) எண்ணெய் இல்லாத உணவு வழங்க நீதிமன்றம் உத்தரவிட்டுள்ளது. அதன்படி சாதம், ரசம், வேகவைத்த காய்கறிகள் ஆகியவை தினசரி கொடுக்கப்படுகின்றன. முதல் வகுப்பு கைதிகளுக்கான விதிமுறைப்படி வாரத்தில் சில நாட்கள் கோழிக்கறி குழம்புடன் உணவு கிடைக்கும். இரவு உணவாக சப்பாத்தி அல்லது கஞ்சி வழங்கப்படுகிறது. வெளியிலிருந்து உணவு கொண்டுவர அனுமதி இல்லை.

இதையும் படிங்க: டிடா சரவணனை சிறையில் அடைக்க மறுப்பு... காவல்துறையை வெளுத்து வாங்கிய நீதிபதி... நீதிமன்றத்திற்குள் நடந்தது என்ன?

பொழுதுபோக்குக்காக செய்தித்தாள்கள், புத்தகங்கள் படிக்கவும், சிறை நூலகத்தைப் பயன்படுத்தவும் அனுமதி உண்டு. நேற்று நடைப்பயிற்சி மேற்கொண்டார். பாதுகாப்பு காரணமாக மற்ற கைதிகள் அவரைச் சந்திக்க முடியாது. குடும்பத்தினர், வழக்கறிஞர்கள் மற்றும் நண்பர்கள் வாரத்தில் இரண்டு முறை சந்திக்கலாம்.

இதற்கிடையே அவரது ஜாமீன் மனு இன்று சென்னை ஊழல் தடுப்பு சிறப்பு நீதிமன்றத்தில் விசாரணைக்கு வருகிறது. மத்திய குற்றப்பிரிவு போலீசார் ஐந்து நாள் காவல் கோரி மனு தாக்கல் செய்துள்ளனர். ஏற்கனவே உயர்நீதிமன்றம் முன்ஜாமீன் மறுத்த நிலையில், இன்றைய விசாரணை முக்கியத்துவம் பெறுகிறது. திமுக தரப்பில் எதிர்க்கட்சித் தலைவர் உதயநிதி ஸ்டாலின் உள்ளிட்டோர் சிறையில் அவரைச் சந்தித்து ஆதரவு தெரிவித்துள்ளனர்.
 

இதையும் படிங்க: CM விஜய் தலைமையில் அமைச்சரவை கூட்டம்..! நிர்வாக மாற்றங்களா.? முக்கிய ஆலோசனை.!!