தமிழகத்தில் 2026 சட்டமன்றத் தேர்தல் கடந்த ஏப்ரல் 23-ஆம் தேதி நடைபெற்ற நிலையில், வாக்கு எண்ணிக்கை வரும் மே 4-ஆம் தேதி (திங்கட்கிழமை) நடைபெற உள்ளது. இதனையொட்டி, தமிழக வெற்றிக் கழகம் (தவெக) தலைவர் நடிகர் விஜய், தேர்தல் முடிவுகள் சாதகமாக அமைய வேண்டும் என்பதற்காக ஆன்மீக பயணத்தை மேற்கொண்டுள்ளார்.

இன்று அதிகாலை சுமார் 5 மணியளவில் திருச்செந்தூர் சுப்பிரமணிய சுவாமி கோயிலுக்கு வந்தடைந்த விஜய், கடலில் இறங்கி சிறப்பு வழிபாடு செய்தார். பின்னர், மலர்களை அர்ச்சித்து முருகனை மனமுருகி வேண்டினார். கோயில் நிர்வாகம் சார்பில் திரிசூலதாரர்கள் அவருக்கு பூரண கும்ப மரியாதை அளித்து உற்சாக வரவேற்பு கொடுத்தனர். மேலும், வேல் ஒன்றை பரிசாக வழங்கி சிறப்பித்தனர்.

கோயிலுக்குள் நுழைந்த விஜய், முருகப் பெருமான், வள்ளி, தெய்வானை, சண்முகர், தட்சிணாமூர்த்தி, பெருமாள் மற்றும் சத்ரு சம்ஹார மூர்த்தி உள்ளிட்ட பரிவார தெய்வங்களை வணங்கினார். இந்த தரிசனத்தின்போது தவெக பொதுச் செயலாளர் ஆனந்த் மற்றும் ரூட் தயாரிப்பு நிறுவனத் தலைவர் ஜெகதீஷ் ஆகியோர் அவருடன் இருந்தனர். விஜய்யின் வருகையை அறிந்து, ஆயிரக்கணக்கான ரசிகர்களும் தொண்டர்களும் அதிகாலையிலேயே கோயில் பகுதியில் திரண்டதால் அங்கு பரபரப்பான சூழல் நிலவியது.

இதையும் படிங்க: "நமது வாக்கு - நமது உரிமை".. ஜனநாயகக் கடமை ஆற்றுவதைத் தவிர்க்காதீர்..!! தவெக தலைவர் விஜய் வேண்டுகோள்..!!

தவெக சார்பில், எதிரிகளை வீழ்த்தி தேர்தல் முடிவுகள் சிறப்பாக அமைய வேண்டும் என்பதற்காக சத்ரு சம்ஹார யாகமும் இன்று திருச்செந்தூர் முருகன் கோயிலில் நடைபெற்றது. இந்த யாகம் எதிர்மறை சக்திகள், தடைகள் மற்றும் எதிரிகளிடமிருந்து பாதுகாப்பு அளிக்கும் சக்தி வாய்ந்த வழிபாடாகக் கருதப்படுகிறது. திருச்செந்தூர் பயணத்தைத் தொடர்ந்து, விஜய்யின் அடுத்த ஆன்மீக பயணம் குறித்த தகவலும் வெளியாகியுள்ளது. 

தேர்தல் முடிவுகளுக்கு முன்பாக, வரும் மே 3-ஆம் தேதி மராட்டிய மாநிலத்தில் உள்ள ஷீரடி சாய்பாபா கோயிலுக்கு சென்று வழிபாடு நடத்த உள்ளதாக தெரிவிக்கப்பட்டுள்ளது. முன்னதாகவே, ‘தி கோட்’ பட வெளியீடு மற்றும் தவெகவின் முதல் மாநாட்டுப் பணிகளுக்கு இடையில் விஜய் ஷீரடி சென்று சாய்பாபாவை தரிசனம் செய்திருந்தார் என்பது குறிப்பிடத்தக்கது.

தவெக தலைவரான விஜய், ஷீரடி சாய்பாபா கோயிலுக்கு பலமுறை சென்று வழிபாடு செய்துள்ளார். குறிப்பாக, 2024 ஏப்ரல் மாதம் சாய்பாபா சந்நிதியில் அவர் எடுத்த புகைப்படம் சமூக ஊடகங்களில் வைரலாக பரவியது. சாய்பாபா மீதான அவரது பக்தி ஆழமானது என்பதை இந்த பயணங்கள் உணர்த்துகின்றன.

தேர்தல் முடிவுகளுக்கு முன்னதாக ஆன்மீகத்தில் ஈடுபடும் விஜய்யின் இந்த நடவடிக்கைகள், அவரது தொண்டர்கள் மற்றும் பக்தர்களிடையே பெரும் எதிர்பார்ப்பையும் உற்சாகத்தையும் ஏற்படுத்தியுள்ளது. தமிழக அரசியல் களத்தில் புதிய அத்தியாயத்தை எழுதும் முயற்சியில் ஈடுபட்டுள்ள விஜய், பக்தி மற்றும் அரசியலை இணைத்து தனது பயணத்தைத் தொடர்கிறார்.

இதையும் படிங்க: விசில் சத்தம் காதை கிழிக்கப்போகுது..!! 21ம் தேதி நந்தனத்தில்.. பிரம்மாண்ட பொதுக்கூட்டத்தில் பேசும் விஜய்..!!