2026 காமன்வெல்த் விளையாட்டுப் போட்டியில் இந்தியாவுக்கான பதக்கக் கணக்கை தொடங்கி வைத்த பெருமை, மாற்றுத்திறனாளிகளுக்கான பளுதூக்குதல் பிரிவில் வெண்கலப் பதக்கம் வென்ற ஜாண்டு குமாருக்கு கிடைத்துள்ளது. அவரது இந்த சாதனைக்கு நாடு முழுவதும் பாராட்டுகள் குவிந்து வரும் நிலையில், பிரதமர் நரேந்திர மோடியும் வாழ்த்து தெரிவித்து அவரது முயற்சியை பாராட்டியுள்ளார்.

28 வயதான ஜாண்டு குமார், பாரா பளுதூக்குதல் போட்டியில் சிறப்பான ஆட்டத்தை வெளிப்படுத்தி வெண்கலப் பதக்கத்தை கைப்பற்றினார். இதன் மூலம் 2026 காமன்வெல்த் விளையாட்டில் இந்தியாவின் முதல் பதக்கத்தை வென்ற வீரர் என்ற பெருமையையும் அவர் பெற்றுள்ளார். அவரது வெற்றி இந்திய விளையாட்டு ரசிகர்களிடையே உற்சாகத்தை ஏற்படுத்தியுள்ளது.

இந்த வெற்றியைத் தொடர்ந்து பிரதமர் நரேந்திர மோடி சமூக வலைதளத்தில் வெளியிட்ட வாழ்த்து பதிவில், காமன்வெல்த் போட்டியில் இந்தியாவின் பதக்கப் பட்டியலை தொடங்கி வைத்த ஜாண்டு குமாரின் சாதனை மிகவும் பாராட்டத்தக்கது என்று குறிப்பிட்டார். வெண்கலப் பதக்கம் வென்றதற்காக அவருக்கு மனமார்ந்த வாழ்த்துகளை தெரிவித்த அவர், இந்த வெற்றி அவரது அளவற்ற மனவலிமை, கடின உழைப்பு மற்றும் தளராத உறுதியின் அடையாளம் என்றும் புகழாரம் சூட்டினார்.

இதையும் படிங்க: ஜிம்பாப்வேவை வீழ்த்தியது இந்தியா! 18 பந்துகளில் அரைசதம் அடித்து வைபவ் சூர்யவன்ஷி சாதனை!

மேலும், ஒவ்வொரு சவாலையும் தன்னம்பிக்கையுடன் எதிர்கொண்டு சர்வதேச அரங்கில் இந்தியாவை பெருமைப்படுத்தியுள்ள ஜாண்டு குமார், எண்ணற்ற இந்தியர்களுக்கு ஊக்கமளிக்கும் முன்னுதாரணமாக திகழ்கிறார் என்றும் பிரதமர் மோடி தனது பதிவில் குறிப்பிட்டுள்ளார். அவரது சாதனை எதிர்காலத்தில் மேலும் பல வீரர்கள் சர்வதேச அளவில் சாதிக்க உத்வேகமாக அமையும் என்றும் அவர் நம்பிக்கை தெரிவித்துள்ளார்.

இதற்கிடையில் காமன்வெல்த் விளையாட்டுப் போட்டியில் இந்திய வீரர், வீராங்கனைகள் பல்வேறு பிரிவுகளில் தொடர்ந்து களமிறங்கி வருகின்றனர். ஜிம்னாஸ்டிக்ஸ், லான் பவுல்ஸ், குத்துச்சண்டை, நீச்சல் மற்றும் 3X3 வீல்சேர் கூடைப்பந்து உள்ளிட்ட போட்டிகளில் இந்திய அணி இன்று தனது திறமையை வெளிப்படுத்த உள்ளது. இந்த போட்டிகளில் மேலும் பல பதக்கங்களை இந்தியா வெல்லும் என்ற எதிர்பார்ப்பு ரசிகர்கள் மத்தியில் அதிகரித்துள்ளது.

கிளாஸ்கோவில் நடைபெற்று வரும் இந்த காமன்வெல்த் விளையாட்டில் இந்திய வீரர்களின் செயல்பாடு மீது விளையாட்டு ரசிகர்கள் தீவிர கவனம் செலுத்தி வருகின்றனர். முதல் பதக்கத்தை வென்று இந்தியாவின் பயணத்தை வெற்றிகரமாக தொடங்கி வைத்துள்ள ஜாண்டு குமாரின் சாதனை, நாட்டின் பதக்க வேட்டைக்கு உற்சாகமான தொடக்கமாக பார்க்கப்படுகிறது.

இதையும் படிங்க: சீனா ஓபனில் பி.வி.சிந்து அதிர்ச்சி தோல்வி..!! பழிக்குப் பழி வாங்கிய சீன வீராங்கனை!