அமெரிக்காவின் தேசிய பாதுகாப்பு ஆலோசகர் ஜேக் சல்லிவன் கடந்த வாரம் இந்தியாவில் பயணம் மேற்கொண்டார். டெல்லி ஐஐடியில் நடைபெற்ற நிகழ்ச்சியில் அவர் பேசும்போது, “இந்திய அணுசக்தி நிறுவனங்களுக்கும் அமெரிக்க நிறுவனங்களுக்கும் இடையிலான ஒத்துழைப்பை தடுக்கும் விதிமுறைகளை அமெரிக்கா நீக்கும்" என்று கூறியிருந்தார்.

இந்நிலையில் பாபா அணுசக்தி ஆய்வு மையம், இந்திரா காந்தி அணுசக்தி ஆய்வு மையம் மற்றும் இன்டியன் ரேர் எர்த்ஸ் என்ற பொதுத்துறை சுரங்க நிறுவனம் மீதான கட்டுப்பாடுகளை அமெரிக்கா நீக்கியுள்ளது.

"அமெரிக்காவும் இந்தியாவும் அமைதியான அணுசக்தி ஒத்துழைப்பு மற்றும் அதனுடன் தொடர்புடைய ஆராய்ச்சி மேம்பாட்டு நடவடிக்கைகளை முன்னெடுத்து அதற்கான உறுதிப்பாட்டை பகிர்ந்து கொண்டதாகவும், கடந்த பல ஆண்டுகளாக அறிவியல் மற்றும் தொழில் நட்பு ஒத்துழைப்பு வலுப்படுத்தியது இரு நாடுகளுக்கும் அதன் கூட்டாளி நாடுகளுக்கும் பயனளித்து உள்ளது என்றும் அறிக்கை ஒன்றில் தெரிவிக்கப்பட்டுள்ளது. 

இதையும் படிங்க: இந்தியருக்கு 8 ஆண்டுகள் சிறை: வெள்ளை மாளிகை மீது தாக்குதல் நடத்த முயற்சி...

தொழில்துறை மற்றும் பாதுகாப்புக்கான வர்த்தக துறையின் துணைச் செயலாளர் ஆலன் ஸ்டீவ்ஸ் இந்த அறிக்கையை வெளியிட்டு இருக்கிறார். 

இந்தியா - அமெரிக்கா இடையே சிவில் அணுசக்தி ஒப்பந்தம் 16 ஆண்டுகளுக்கு முன் கையெழுத்தான நிலையில், அதை செயல்படுத்துவதை எளிதாக்கும் வகையில் ஜோ பைடன் நிர்வாகம் இந்த நடவடிக்கை எடுத்துள்ளது. 

மேலும் அமெரிக்காவின் 47-வது அதிபராக டொனால்டு ட்ரம்ப் பதவியேற்க இருக்கும் நிலையில் இந்த நடவடிக்கை மேற்கொள்ளப்பட்டுள்ளது.

இந்த அறிவிப்பில் 11 சீன நிறுவனங்களின் பட்டியலும் சேர்க்கப்பட்டது.

கூட்டு ஆராய்ச்சி மற்றும் மேம்பாடு, அறிவியல் தொழில்நுட்ப ஒத்துழைப்பு உள்ளிட்ட நவீன எரிசக்தி ஒத்துழைப்புக்கான தடைகளை இந்த நடவடிக்கை நீக்கும் என அமெரிக்கா கூறியுள்ளது. இந்தியா- அமெரிக்கா இடையே 3 ஆண்டு கால பேச்சுவார்த்தைக்கு பிறகு கடந்த 2005 ஜூலையில் சிவில் அணுசக்தி ஒப்பந்தம் கையெழுத்தானது.
 

இதையும் படிங்க: மோடி அரசில் 27% வீழ்ச்சி! டாலருக்கு எதிராக இந்திய ரூபாய் மதிப்பு ஏன் சரிகிறது?