உலகெங்கும் உள்ள கால்பந்து ரசிகர்கள் மற்றும் விளையாட்டு ஆர்வலர்களின் நெடுநாள் எதிர்பார்ப்பு நிறைவேறியது. 2026 ஃபிஃபா உலகக் கோப்பை கால்பந்து தொடர் இந்திய நேரப்படி இன்று அதிகாலை 12.30 மணிக்கு பிரமாண்டமான கலை நிகழ்ச்சிகளுடன் தொடங்கியது. மெக்சிகோ நகரின் பிரம்மாண்ட மைதானத்தில் நடைபெற்ற இந்த தொடக்க விழா, பார்வையாளர்களை மெய்சிலிர்க்க வைத்தது. பாரம்பரிய இசை, நடனம், ஒளி-ஒலி அரங்கேற்றம் உள்ளிட்ட பல்வேறு கலாச்சார நிகழ்வுகள் ரசிகர்களுக்கு அற்புதமான அனுபவத்தை அளித்தன.

தொடக்கப் போட்டியில் சொந்த மண்ணில் விளையாடிய மெக்சிகோ அணி தென் ஆப்பிரிக்காவை எதிர்கொண்டது. ஆட்டம் தொடங்கிய முதல் 9 நிமிடங்களிலேயே மெக்சிகோ வீரர் ஜூலியன் அண்ட்ரே குவானிஸ் அற்புதமான கோல் மூலம் உலகக் கோப்பையின் முதல் கோலை பதிவு செய்தார். இந்த கோல் மைதானத்தை உற்சாகக் கொண்டாட்டத்தில் மூழ்கடித்தது. மெக்சிகோ அணி தொடக்கம் முதலே ஆதிக்கம் செலுத்தியது. 

ஆட்டத்தின் இரண்டாவது பாதியில், 67வது நிமிடத்தில் ரவுல் ஜெமிஸ் மற்றொரு சிறப்பான கோல் அடித்து மெக்சிகோவின் வெற்றியை உறுதி செய்தார். தென் ஆப்பிரிக்க அணியின் வீரர்கள் பல முயற்சிகளை மேற்கொண்டாலும், மெக்சிகோவின் பாதுகாப்பு அரணை உடைக்க முடியவில்லை. இறுதியில் 2-0 என்ற கணக்கில் மெக்சிகோ அணி அபார வெற்றி பெற்றது. சொந்த மண்ணில் முதல் போட்டியிலேயே வெற்றிக் கணக்கைத் தொடங்கிய மெக்சிகோ அணி, ரசிகர்களுக்கு பெரும் மகிழ்ச்சியை ஏற்படுத்தியுள்ளது.

இதையும் படிங்க: FIFA World Cup 2026: ஸ்பெயின் அணியில் ரியல்மாட்ரிட் வீரர்கள் மிஸ்ஸிங்..!! ரசிகர்களுக்கு ஷாக்..!!

இந்த வெற்றி மெக்சிகோ அணிக்கு மட்டுமின்றி, உலகக் கோப்பையை நடத்தும் மூன்று நாடுகளில் ஒன்றான மெக்சிகோவுக்கும் கௌரவத்தைப் பெற்றுத் தந்துள்ளது. கால்பந்து வரலாற்றில் மெக்சிகோ அணி எப்போதும் போட்டியின் ஆரம்பத்தில் வலுவான ஆட்டத்தை வெளிப்படுத்துவதாக பெயர் பெற்றுள்ளது. இம்முறை சொந்த மண்ணின் ஆதரவுடன் அவர்களின் செயல்பாடு இன்னும் உற்சாகமூட்டுவதாக உள்ளது.

உலகக் கோப்பை தொடரின் இரண்டாவது லீக் போட்டி இன்று காலை 7.30 மணிக்கு (இந்திய நேரப்படி) நடைபெற உள்ளது. இதில் தென்கொரியா மற்றும் செக் குடியரசு அணிகள் மோதுகின்றன. இரு அணிகளும் தங்களது வலிமையை நிரூபிக்க தயாராக உள்ளன. தென்கொரியா வேகமான தாக்குதல் ஆட்டத்துக்குப் பெயர் பெற்றது. செக் அணியோ உறுதியான பாதுகாப்பு மற்றும் எதிர்தாக்குதல் உத்திகளில் சிறந்து விளங்குகிறது. 

இப்போட்டியும் பெரும் எதிர்பார்ப்பை ஏற்படுத்தியுள்ளது. உலகக் கோப்பை கால்பந்து தொடர் இனி பல நாடுகளின் அணிகளுக்கு இடையே கடும் போட்டியை உருவாக்கும். ரசிகர்கள் அடுத்தடுத்த போட்டிகளுக்காக ஆவலுடன் காத்திருக்கின்றனர். மெக்சிகோவின் தொடக்க வெற்றி முழு தொடருக்கும் உற்சாகமான தொனியை அமைத்துள்ளது.
 

இதையும் படிங்க: FIFA World Cup 2026: கோப்பையை வெல்லும் அணிக்கு பரிசுத்தொகை எவ்வளவு தெரியுமா..??