புதுச்சேரி அரசியலில் முக்கிய திருப்பமாக, என்.ஆர்.காங்கிரஸ் தலைமையிலான தேசிய ஜனநாயக கூட்டணி மீண்டும் ஆட்சியை கைப்பற்றியுள்ளது. தேர்தல் முடிவுகள் வெளியாகியதைத் தொடர்ந்து பதினைந்தாவது சட்டப்பேரவை கலைக்கப்பட்டு, புதியதாக தேர்வு செய்யப்பட்ட 30 சட்டமன்ற உறுப்பினர்களின் பட்டியல் அரசு இதழில் அதிகாரப்பூர்வமாக வெளியிடப்பட்டது.
இதையடுத்து, முதலமைச்சர் ரங்கசாமி இன்று காலை துணைநிலை ஆளுநர் கைலாஷ்நாதனை நேரில் சந்தித்து தனது ராஜினாமா கடிதத்தை வழங்கினார். காலை 11.25 மணியளவில் நடைபெற்ற இந்த சந்திப்பு புதுச்சேரி அரசியலில் பெரும் கவனத்தை ஈர்த்தது. ராஜினாமாவை பெற்றுக்கொண்ட துணைநிலை ஆளுநர், புதிய அரசு பதவியேற்கும் வரை காபந்து முதலமைச்சராக தொடருமாறு ரங்கசாமியிடம் கேட்டுக்கொண்டதாக தகவல்கள் தெரிவிக்கின்றன.
சந்திப்புக்குப் பிறகு செய்தியாளர்களை சந்தித்த ரங்கசாமி, “புதிய அரசு அமைய வேண்டிய நடைமுறையின் ஒரு பகுதியாக முதலமைச்சர் பதவியை ராஜினாமா செய்து ஆளுநரிடம் வழங்கியுள்ளேன். தேசிய ஜனநாயக கூட்டணியின் ஆலோசனை கூட்டம் முடிந்ததும் ஆட்சியமைக்க உரிமை கோரி அதிகாரப்பூர்வமாக கடிதம் அளிக்கப்படும்” என்று தெரிவித்தார்.
இதையும் படிங்க: புதுச்சேரி முதல்வர் ரங்கசாமி பாணியை பின்பற்றும் விஜய்!! திருச்செந்தூர் வழிபாடு முதல் பதவியேற்பு வரை!!
இதற்கிடையில், தமிழக அரசியல் குறித்தும் ரங்கசாமி கருத்து தெரிவித்துள்ளார். அதிக இடங்களில் வெற்றி பெற்றிருந்தாலும் தவெக தலைவர் விஜய் ஆட்சி அமைப்பதில் சிரமங்களை சந்தித்து வருவது குறித்து செய்தியாளர்கள் கேள்வி எழுப்பினர். அதற்கு பதிலளித்த ரங்கசாமி, “விஜய்க்கு எனது வாழ்த்துகள். மிக விரைவில் அவர் பதவியேற்பார். ஆட்சி அமைப்பார் என்ற நம்பிக்கை இருக்கிறது” என்று கூறினார்.
ரங்கசாமியின் இந்த கருத்து தற்போது தமிழக அரசியல் வட்டாரங்களிலும் பரபரப்பை ஏற்படுத்தியுள்ளது. குறிப்பாக, தவெக ஆட்சியமைப்பு குறித்து பல்வேறு அரசியல் தலைவர்கள் கருத்து தெரிவித்து வரும் நிலையில், புதுச்சேரி முதலமைச்சரின் இந்த ஆதரவு பேச்சு முக்கியமாக பார்க்கப்படுகிறது.
புதுச்சேரியில் புதிய அரசு அமைக்கும் பணிகளும், தமிழகத்தில் தவெக ஆட்சியமைப்பை சுற்றிய அரசியல் நகர்வுகளும் ஒரே நேரத்தில் வேகமெடுத்து வருவதால், தென்னிந்திய அரசியல் களம் மேலும் சூடுபிடித்துள்ளது.
இதையும் படிங்க: புதுச்சேரி முதல்வர் ரங்கசாமி பாணியை பின்பற்றும் விஜய்!! திருச்செந்தூர் வழிபாடு முதல் பதவியேற்பு வரை!!