ஜப்பானில் நடைபெற்று வரும் 20வது ஆசிய விளையாட்டுப் போட்டிகளில் இந்திய ஸ்குவாஷ் வீரர்கள் பதக்கம் வென்று நாட்டுக்கும் தமிழ்நாட்டுக்கும் பெருமை சேர்த்துள்ளனர்.
குறிப்பாக, தமிழகத்தைச் சேர்ந்த முன்னணி வீராங்கனை ஜோஷ்னா சின்னப்பா மற்றும் தமிழக வீரர் வேலவன் செந்தில்குமார் இணைந்து கலப்பு இரட்டையர் பிரிவில் வெண்கலப் பதக்கம் வென்றனர். இந்த சாதனைக்கு தமிழக முதல்வர் விஜய் பாராட்டு தெரிவித்துள்ளார்.
ஆசிய விளையாட்டின் ஸ்குவாஷ் கலப்பு இரட்டையர் பிரிவில் ஜோஷ்னா சின்னப்பா-வேலவன் செந்தில்குமார் ஜோடி அரையிறுதிக்கு முன்னேறியது. அங்கு ஹாங்காங் ஜோடியிடம் போராடி தோல்வியடைந்ததால் இந்திய அணிக்கு வெண்கலப் பதக்கம் கிடைத்தது. இதன் மூலம் ஜோஷ்னா சின்னப்பா தனது ஆசிய விளையாட்டு பதக்க எண்ணிக்கையில் மேலும் ஒரு பதக்கத்தைச் சேர்த்துள்ளார்.
இதையும் படிங்க: டிவியும் இல்லை, ஸ்மார்ட்போனும் இல்லை! மகள் தங்கம் வென்ற செய்தியை ரேஷன் கடையில் அறிந்த தாய்!
இந்த வெற்றியைத் தொடர்ந்து, ஜோஷ்னா சின்னப்பா மற்றும் வேலவன் செந்தில்குமார் ஆகிய இருவருக்கும் தலா ரூ.30 லட்சம் ஊக்கத்தொகை வழங்கப்படும் என்று தமிழக அரசு அறிவித்துள்ளது. தமிழக விளையாட்டு வீரர்களின் சர்வதேச சாதனைகளை ஊக்குவிக்கும் வகையில் இந்த அறிவிப்பு வெளியிடப்பட்டுள்ளது.
ஜோஷ்னா சின்னப்பா இந்திய ஸ்குவாஷ் வரலாற்றில் முக்கிய இடம் பிடித்துள்ள வீராங்கனையாக உள்ளார். 2026 ஆசிய விளையாட்டுப் போட்டி அவருக்கு ஏழாவது தொடர்ச்சியான ஆசிய விளையாட்டு போட்டியாக அமைந்துள்ளது. இதன் மூலம் ஏழு ஆசிய விளையாட்டுப் போட்டிகளில் பங்கேற்ற முதல் இந்தியர் என்ற சிறப்பையும் அவர் பெற்றுள்ளார்.
இதற்கிடையே, ஷமீனா ரியாஸ் உள்ளிட்ட தமிழகத்தைச் சேர்ந்த வீராங்கனைகளும் இந்திய பெண்கள் ஸ்குவாஷ் அணியில் இடம்பெற்றுள்ளனர். இந்திய பெண்கள் அணி போட்டியிலும் பதக்கத்தை உறுதி செய்துள்ளது. ஷமீனா ரியாஸ் இந்த ஆண்டு முதன்முறையாக ஆசிய விளையாட்டில் பங்கேற்றுள்ளார்.
தமிழக வீரர்களின் இந்த சாதனை, சர்வதேச அளவில் ஸ்குவாஷ் விளையாட்டில் தமிழகத்தின் பங்களிப்பை மீண்டும் கவனத்திற்கு கொண்டு வந்துள்ளது. இளம் வீரர், வீராங்கனைகள் தொடர்ந்து சர்வதேச போட்டிகளில் சாதிக்க இது ஊக்கமாக அமையும் என்று தமிழக அரசு தெரிவித்துள்ளது.
இதையும் படிங்க: ஆசிய விளையாட்டில் அசத்தும் இந்தியா! இன்று ஒரேநாளில் 4 தங்கம்!! பதக்க பட்டியலில் அதிரடி முன்னேற்றம்!