மராட்டிய அரசு பெண்களின் நலனை மேம்படுத்துவதற்காக 'லாட்கி பகின்' (மஜ்ஹி லாட்கி பகின் யோஜனா) திட்டத்தை அறிமுகப்படுத்தியுள்ளது. இத்திட்டம், பொருளாதார ரீதியாக பின்தங்கிய பெண்களுக்கு நிதி உதவி வழங்குவதை நோக்கமாகக் கொண்டு, 2024ம் ஆண்டு ஆகஸ்ட் மாதம் தொடங்கப்பட்டது. 21 முதல் 65 வயதுடைய, ஆண்டு வருமானம் 2.5 லட்சத்திற்கு குறைவாக உள்ள பெண்கள் இதற்கு தகுதியுடையவர்கள்.

இத்திட்டத்தின் கீழ், பயனாளிகளுக்கு மாதந்தோறும் 1,500 ரூபாய் நேரடியாக வங்கிக் கணக்கில் செலுத்தப்படுகிறது, இது ஆண்டுக்கு 18,000 ரூபாயாக உயர்கிறது. இத்திட்டம் பெண்களின் நிதி சுதந்திரத்தை மேம்படுத்துவதுடன், அவர்களின் கல்வி, சுகாதாரம் மற்றும் வாழ்க்கைத் தரத்தை உயர்த்துவதை நோக்கமாகக் கொண்டுள்ளது. முதல் கட்டமாக, 1.8 கோடி பெண்கள் இதில் பயனடைந்துள்ளனர். 

இதையும் படிங்க: சோறு போட்ட நாங்க இப்ப பிச்சை எடுக்கிறோம்.. விபரீத முடிவுகளை கையிலெடுக்கும் விவசாயிகள்..!

தேர்தலையொட்டி அவசர கதியில் கொண்டு வரப்பட்டதால் இந்த திட்ட பயனாளர்கள் விவரங்கள் முறையாக ஆய்வு செய்யப்படவில்லை. தற்போது திட்டத்தில் முறைகேடாக நிதி உதவி பெற்று வரும் நபர்கள் கண்டறியப்பட்டு நீக்கப்பட்டு வருகின்றனர். இந்நிலையில் 'லாட்கி பகின் யோஜனா' திட்டத்தில் பெரும் முறைகேடு அம்பலமாகியுள்ளது. இத்திட்டத்தின் கீழ், பொருளாதாரத்தில் பின்தங்கிய பெண்களுக்கு மாதந்தோறும் நிதியுதவி வழங்கப்படுகிறது.

ஆனால், 14,298 ஆண்கள் பெண்களுக்கான இந்தத் திட்டத்தில் போலி ஆவணங்களைப் பயன்படுத்தி நிதியைப் பெற்று மோசடியில் ஈடுபட்டுள்ளனர். இதனால், மாநில அரசுக்கு சுமார் 21.44 கோடி ரூபாய் நிதி இழப்பு ஏற்பட்டுள்ளது. மேலும், இத்திட்டத்தில் சில பெண் அரசு ஊழியர்களும் தகுதியின்றி பயனடைந்திருப்பது விசாரணையில் தெரியவந்துள்ளது. இந்த மோசடி, அரசின் நலத்திட்ட நிர்வாகத்தில் உள்ள பலவீனங்களை வெளிப்படுத்தியுள்ளது. 

இதனையடுத்து, மகாராஷ்டிர அரசு இத்திட்டத்தை தற்காலிகமாக நிறுத்தி வைத்து, விசாரணையை தீவிரப்படுத்தியுள்ளது. இந்த முறைகேடு குறித்து எதிர்க்கட்சிகள் கடும் விமர்சனங்களை முன்வைத்துள்ளன. அரசியல் ஆதாயத்திற்காக இத்திட்டம் அவசரமாக அறிமுகப்படுத்தப்பட்டதாகவும், முறையான சரிபார்ப்பு இல்லாமல் நிதி விநியோகிக்கப்பட்டதாகவும் குற்றச்சாட்டுகள் எழுந்துள்ளன. 

இதற்கு பதிலளித்த துணை முதலமைச்சர் அஜித் பவார், பணத்தை திரும்பப்பெறுவதுடன், குற்றவாளிகள் மீது கடும் நடவடிக்கை எடுக்கப்படும் என உறுதியளித்துள்ளார். மேலும் இந்த மோசடி, நலத்திட்டங்களின் வெளிப்படைத்தன்மை மற்றும் பொறுப்புணர்வு குறித்த விவாதங்களை தூண்டியுள்ளது. மகாராஷ்டிர அரசு இனி இதுபோன்ற முறைகேடுகளைத் தடுக்க மேம்படுத்தப்பட்ட சரிபார்ப்பு முறைகளை அறிமுகப்படுத்த வேண்டிய அவசியம் ஏற்பட்டுள்ளது. இந்தச் சம்பவம், நாடு முழுவதும் நலத்திட்டங்களை செயல்படுத்துவதில் உள்ள சவால்களை மீண்டும் எடுத்துக்காட்டுகிறது. முறைகேடு செய்பவர்களுக்கு கடும் தண்டனை உறுதி செய்யப்பட வேண்டும் என பொதுமக்கள் கோரிக்கை விடுத்துள்ளனர்.

இதையும் படிங்க: நிர்வாணமா நிக்க வச்சு செக் பண்ணாங்க.. பள்ளி மாணவிகளிடம் குரூர முகம் காட்டிய 5 பேர் கைது..!