தெருநாய்கள் பிரச்சினை தொடர்பான வழக்கின் விசாரணை உச்ச நீதிமன்றத்தில் மீண்டும் நடைபெற்றது. நகர்ப்புறங்களிலும், கிராமப்புறங்களிலும் தெருநாய்கள் எண்ணிக்கை அதிகரித்து வருவதால் ஏற்படும் பாதுகாப்பு சிக்கல்கள் குறித்து நாடு முழுவதும் விவாதங்கள் நீடித்து வரும் நிலையில், இந்த வழக்கு மீண்டும் நீதிமன்றத்தின் கவனத்தை ஈர்த்துள்ளது.
குறிப்பாக, பள்ளி மாணவர்கள், முதியோர் மற்றும் மருத்துவமனைக்கு வரும் நோயாளிகள் மீது நடைபெறும் நாய் கடி சம்பவங்கள் சமூக அச்சத்தை அதிகரித்துள்ளன. இந்த வழக்கின் விசாரணையின் போது, உச்ச நீதிமன்ற அமர்வு முக்கியமான கருத்தை முன்வைத்தது. “ஒரு நாய் எப்போது கடிக்கும், எப்போது கடிக்காது என்பதை யாராலும் உறுதியாக கணிக்க முடியாது. நாயின் மனநிலையை மனிதர்கள் முழுமையாக புரிந்து கொள்ள இயலாது. வருமுன் காப்பதே சிறந்தது என்பதால், பள்ளிகள், மருத்துவமனைகள், குழந்தைகள் கூடும் இடங்கள் போன்ற பொது முக்கியத்துவம் வாய்ந்த பகுதிகளை ‘நாய்கள் இல்லாத இடங்களாக’ மாற்ற வேண்டும்” என நீதிபதிகள் வலியுறுத்தினர்.
இந்தக் கருத்து, பொதுமக்களின் பாதுகாப்பை முதன்மைப்படுத்தும் நோக்கில் சொல்லப்பட்டதாக நீதிமன்றம் குறிப்பிட்டது. உச்ச நீதிமன்றத்தின் இந்த கருத்து ஒருபுறம் பலரிடையே ஆதரவை பெற்றாலும், மற்றொரு புறம் கடும் விமர்சனங்களையும் எழுப்பியுள்ளது. குறிப்பாக, விலங்கு நல ஆர்வலர்கள் மற்றும் மனித உரிமை செயற்பாட்டாளர்கள், தெருநாய்கள் பிரச்சினைக்கு இது ஒருதலைப்பட்சமான அணுகுமுறை எனக் குற்றம்சாட்டி வருகின்றனர்.
இதையும் படிங்க: முன்னாள் எம்எல்ஏ-விடம் பணமோசடி செய்த நடிகர்..! புகாரின் பேரில் கைது செய்யப்பட அஜய் வாண்டையார்..!
அவர்களது கருத்துப்படி, முறையான தடுப்பூசி, கருத்தடை மற்றும் பராமரிப்பு திட்டங்களை செயல்படுத்தாமல், நாய்களை முழுமையாக ஒதுக்கும் மனநிலை சரியான தீர்வாக இருக்காது. இந்த நிலையில், நடிகையும், முன்னாள் நாடாளுமன்ற உறுப்பினருமான திவ்யா ஸ்பந்தனா (ரம்யா) தனது சமூக வலைதளப் பக்கத்தில் வெளியிட்ட பதிவு பெரும் சர்ச்சையை ஏற்படுத்தியுள்ளது. உச்ச நீதிமன்றத்தின் கருத்துக்கு எதிர்ப்பு தெரிவிக்கும் விதமாக அவர் இன்ஸ்டாகிராமில் பதிவிட்டிருந்த கருத்தில், “ஆண்களின் மனதையும் யாராலும் படிக்க முடியாது. ஓர் ஆண் எப்போது பாலியல் வன்கொடுமை அல்லது கொலை செய்வான் என்பது யாருக்கும் தெரியாது. அதற்காக அனைத்து ஆண்களையும் முன்கூட்டியே சிறையில் அடைக்க முடியுமா?” என கேள்வி எழுப்பியிருந்தார்.
நாய்களின் நடத்தை கணிக்க முடியாது என்பதற்காக அவற்றை பொது இடங்களில் இருந்து முற்றிலும் விலக்க வேண்டும் என்ற கருத்தை, மனிதர்களின் குற்றச் செயல்களுடன் ஒப்பிட்டு அவர் முன்வைத்த இந்த பதிவே இணையத்தில் பெரும் விவாதத்துக்கு வித்திட்டுள்ளது. சமூக வலைதளங்களில் இந்த பதிவு வைரலானதுடன், பலரும் ஆதரவும் எதிர்ப்பும் தெரிவித்து வருகின்றனர்.
ஒரு தரப்பினர், திவ்யா ஸ்பந்தனாவின் கருத்தை ஆதரித்து, “ஒரு சமூக பிரச்சினைக்கு அச்சத்தின் அடிப்படையில் தீர்வு காண்பது தவறு. மனிதர்களிடையே குற்றங்கள் நடைபெறுவதற்காக அனைத்து மனிதர்களையும் குற்றவாளிகளாக கருத முடியாதபோது, நாய்களையும் அதேபோல் பொதுவாக அபாயமாகக் கருதக் கூடாது” என வாதிடுகின்றனர். மேலும், “நாய்கள் மனிதர்களின் அலட்சியம், குப்பை மேலாண்மை குறைபாடு மற்றும் நகர்ப்புற திட்டமிடல் தவறுகளின் விளைவு” எனவும் அவர்கள் சுட்டிக்காட்டுகின்றனர்.
மற்றொரு தரப்பினர் இந்த ஒப்பீடே தவறானது எனக் கூறி கடுமையாக விமர்சிக்கின்றனர். “மனிதர்களையும் விலங்குகளையும் ஒரே அளவுகோலில் வைத்து பேசுவது பொருத்தமற்றது. பொதுப் பாதுகாப்பு தொடர்பான விஷயத்தில், உணர்ச்சிகளை விட நடைமுறை தீர்வுகள் முக்கியம்” என அவர்கள் கருத்து தெரிவிக்கின்றனர். குறிப்பாக, பள்ளிகள் மற்றும் மருத்துவமனைகள் போன்ற இடங்களில் சிறிய அசம்பாவிதம் கூட பெரிய விளைவுகளை ஏற்படுத்தும் என்பதால், நீதிமன்றத்தின் எச்சரிக்கை நியாயமானது என்றும் அவர்கள் கூறுகின்றனர். திவ்யா ஸ்பந்தனா, விலங்கு நல ஆர்வலராகவும், சமூகப் பிரச்சினைகள் மற்றும் பெண்களின் உரிமைகள் குறித்து தொடர்ந்து குரல் கொடுத்து வருபவராகவும் அறியப்படுகிறார்.
அவர் இதற்கு முன்பும் பல்வேறு அரசியல் மற்றும் சமூக விவகாரங்களில் தனது கருத்துகளை வெளிப்படையாக சமூக வலைதளங்களில் பகிர்ந்து வந்துள்ளார். அதனால், அவரது இந்த பதிவும் தனிப்பட்ட கருத்து வெளிப்பாடாகவே பார்க்கப்பட வேண்டும் என சிலர் கூறுகின்றனர். இதற்கிடையே, சட்ட வல்லுநர்கள் சிலர் இந்த விவகாரத்தை வேறு கோணத்தில் அணுகுகின்றனர். “உச்ச நீதிமன்றம் கூறிய கருத்து ஒரு நிரந்தர உத்தரவாக அல்ல.. அது இடைக்கால கவனிக்க வேண்டிய பரிந்துரையாக மட்டுமே பார்க்க வேண்டும். மாநில அரசுகள் மற்றும் உள்ளாட்சி அமைப்புகள் அறிவியல் ரீதியான முறையில் தெருநாய்கள் மேலாண்மை திட்டங்களை செயல்படுத்த வேண்டும்” என அவர்கள் தெரிவிக்கின்றனர்.
மொத்தத்தில், தெருநாய்கள் விவகாரம் மீண்டும் சமூகத்தின் மையக் கேள்வியாக மாறியுள்ளது. மனித பாதுகாப்பு, விலங்கு உரிமை, நகர்ப்புற நிர்வாகம் ஆகிய மூன்றின் சமநிலையை எப்படி ஏற்படுத்துவது என்பதே தற்போது முக்கிய சவாலாக உள்ளது. உச்ச நீதிமன்றத்தின் கருத்தும், அதற்கு எதிர்வினையாக எழுந்துள்ள திவ்யா ஸ்பந்தனாவின் பதிவு சார்ந்த விவாதங்களும், இந்த பிரச்சினைக்கு ஒரே தீர்வு இல்லை என்பதை மீண்டும் உணர்த்துகின்றன. வரும் நாட்களில், அரசுகள் மற்றும் சமூக அமைப்புகள் எடுக்கும் நடவடிக்கைகள் இந்த விவகாரத்தின் போக்கை தீர்மானிக்கும் எனக் கருதப்படுகிறது.
இதையும் படிங்க: சர்ச்சையில் சிக்கி தவிக்கும் 'ஜனநாயகன்'..! விஜய்க்கு ஆதரவாக கைகோர்க்கும் திரைபிரபலங்கள்..!