சோனம் கபூர்  மற்றும் அவரது கணவர், தொழிலதிபர் Anand Ahuja ஆகியோர் மீண்டும் சர்ச்சையின் மையமாகி உள்ளனர். லண்டனின் பிரபலமான Notting Hill பகுதியில் அவர்கள் வாங்கிய சொகுசு மாளிகை மற்றும் அதனைச் சுற்றியுள்ள புதிய நடவடிக்கைகள் தற்போது அங்குள்ள குடியிருப்பாளர்களிடையே கடும் அதிருப்தியை ஏற்படுத்தி இருக்கின்றன. குறிப்பாக, தங்களது வீட்டில் பணியாற்றவுள்ள வேலைக்காரர்களுக்காக அருகிலுள்ள Hillcrest அபார்ட்மெண்டில் பல பிளாட்களை வாங்கியிருப்பது சமூக வலைதளங்களிலும், பிரிட்டிஷ் ஊடகங்களிலும் பெரிய விவாதமாக மாறியுள்ளது.

2018ஆம் ஆண்டு திருமணம் செய்து கொண்ட சோனம் கபூர் – ஆனந்த் அஹுஜா தம்பதியினர், இந்திய சினிமா மற்றும் தொழில்துறை உலகின் பிரபலமான ஜோடிகளில் ஒருவர் என கருதப்படுகிறார்கள். திருமணத்திற்குப் பிறகு பெரும்பாலும் லண்டனிலேயே வசித்து வரும் இந்த ஜோடி, 2023ஆம் ஆண்டு Notting Hill பகுதியில் சுமார் 200 ஆண்டுகள் பழமையான ஒரு பிரம்மாண்ட மேன்ஷனை வாங்கியதாக தகவல்கள் வெளியானது. அந்த வீடு மட்டும் சுமார் ரூ.270 கோடி மதிப்பில் வாங்கப்பட்டதாக கூறப்பட்டது.

அந்த மாளிகை வரலாற்றுச் சிறப்புமிக்க கட்டிட வடிவமைப்பைக் கொண்டதாக இருந்தாலும், அதனை இன்னும் அதிக வசதிகளுடன் கூடிய அல்ட்ரா-லக்சுரி வீட்டாக மாற்றுவதற்காக பல கோடி ரூபாய் செலவில் புதுப்பிப்பு பணிகள் நடைபெற்று வருகின்றன. உள்துறை வடிவமைப்பு முதல் தனிப்பட்ட ஜிம், வெப்பநிலை கட்டுப்பாட்டு வசதிகள், தனி பாதுகாப்பு அமைப்புகள் உள்ளிட்ட பல மாற்றங்கள் மேற்கொள்ளப்படுவதாக கூறப்படுகிறது.

இதையும் படிங்க: என்னைக்குமே old is gold-லே.. ஒரே டியூன்.. ஆனா இரண்டு பாட்டு..!! மீண்டும் ஃபார்மில் இசையமைப்பாளர் இளையராஜா..!

இந்நிலையில், அந்த மாளிகையில் எதிர்காலத்தில் பணியாற்றவுள்ள வேலைக்காரர்கள், பராமரிப்பு ஊழியர்கள் மற்றும் பாதுகாப்பு பணியாளர்கள் தங்குவதற்காக அருகில் உள்ள Hillcrest அபார்ட்மெண்டில் மொத்தம் ஐந்து பிளாட்களை இந்த தம்பதியினர் வாங்கியிருப்பதாக தகவல் வெளியாகியுள்ளது. இதற்காக அவர்கள் சுமார் 4 மில்லியன் பவுண்ட், இந்திய மதிப்பில் ரூ.51.4 கோடி வரை செலவிட்டதாக கூறப்படுகிறது.

ஆனால் இதுவே தற்போது சர்ச்சையின் முக்கிய காரணமாக மாறியுள்ளது. Hillcrest அபார்ட்மெண்டில் ஏற்கனவே வசித்து வரும் குடியிருப்பாளர்கள், “சொகுசு குடியிருப்பு பகுதிகள் மெதுவாக தனியார் அதிகார மையங்களாக மாறுகின்றன” என்று குற்றம்சாட்டி வருகின்றனர். குறிப்பாக, வேலைக்காரர்கள் quarters அமைப்பதற்காக பல பிளாட்களை வாங்குவது அந்த அபார்ட்மெண்டின் இயல்பான சமூக சூழலை மாற்றிவிடும் என்ற அச்சம் அங்குள்ளவர்களிடையே ஏற்பட்டுள்ளது.

லண்டனின் சில உள்ளூர் மீடியா நிறுவனங்களுக்கு பேட்டி அளித்த குடியிருப்பாளர்கள், “இந்த விஷயம் குறித்து வெளியில் பேச வேண்டாம் என்று பண பலத்தை பயன்படுத்தி அழுத்தம் கொடுக்கப்படுகிறது” என குற்றம்சாட்டியுள்ளனர். “அவர்கள் மிகப்பெரிய பணக்காரர்கள். அவர்களுக்கு எதிராக திறந்தவெளியில் பேசுவதற்கு கூட சிலர் பயப்படுகிறார்கள்,” என்று பெயர் வெளியிட விரும்பாத ஒருவர் கூறியதாக தகவல்கள் வெளியாகியுள்ளன.

மேலும், ஒரே அபார்ட்மெண்டில் பல பிளாட்களை வாங்கியதால், நிர்வாக முடிவுகளில் அந்த தம்பதியினரின் மறைமுக செல்வாக்கு அதிகரித்து வருவதாகவும் சிலர் குற்றஞ்சாட்டியுள்ளனர். அபார்ட்மெண்ட் பராமரிப்பு, பாதுகாப்பு விதிமுறைகள், பொதுப் பயன்பாட்டு வசதிகள் போன்ற விஷயங்களில் அவர்கள் அதிக ஆதிக்கம் செலுத்தக்கூடும் என்ற அச்சம் இருப்பதாகவும் கூறப்படுகிறது.

சமூக வலைதளங்களிலும் இந்த விவகாரம் குறித்து கலவையான எதிர்வினைகள் வெளியாகி வருகின்றன. சிலர், “தங்களது ஊழியர்களுக்காக தனியாக வசதி செய்து கொடுப்பது தவறில்லை” என்று ஆதரவு தெரிவித்துள்ளனர். ஆனால் மற்றொரு தரப்பு, “சாதாரண குடியிருப்பு வளாகங்களை பணக்காரர்களின் தனிப்பட்ட விரிவாக்கமாக மாற்றுவது ஏற்றுக்கொள்ள முடியாது” என்று விமர்சித்து வருகின்றனர்.

இதுவரை சோனம் கபூர் அல்லது ஆனந்த் அஹுஜா தரப்பில் இருந்து இந்த சர்ச்சை குறித்து எந்த அதிகாரப்பூர்வ விளக்கமும் வெளியாகவில்லை. எனினும், பிரிட்டிஷ் டேப்லாய்டு ஊடகங்கள் இந்த விவகாரத்தை தொடர்ந்து கவனித்து வருவதால், வரும் நாட்களில் மேலும் புதிய தகவல்கள் வெளியாகலாம் என எதிர்பார்க்கப்படுகிறது.

இந்த சம்பவம், உலகின் முக்கிய நகரங்களில் பணக்கார பிரபலங்கள் பெருமளவில் சொத்துக்கள் வாங்குவதால் ஏற்படும் சமூக மற்றும் குடியிருப்பு சமநிலைக் கேள்விகளை மீண்டும் முன்னிறுத்தி உள்ளது. குறிப்பாக லண்டன் போன்ற நகரங்களில் வீட்டு விலைகள் ஏற்கனவே அதிகரித்து வரும் சூழலில், செல்வந்தர்கள் பெரிய அளவில் குடியிருப்புகளை வாங்குவது பற்றிய விவாதம் மீண்டும் தீவிரமடைந்துள்ளது.

இதையும் படிங்க: ஃபேமஸான நிகழ்ச்சி.. பிரமாண்டமான செட்..!! ஆனால் சரிந்து விழுந்த மேடை.. மக்களுக்கு என்ன ஆச்சி.. ஜீ தமிழ் ஷோவுக்கு வந்த திடீர் சோதனை..!