கார்த்தி நடிப்பில் கடந்த 2022ஆம் ஆண்டு வெளியாகி ரசிகர்கள் மத்தியில் நல்ல வரவேற்பை பெற்ற திரைப்படம் ‘சர்தார்’. பி.எஸ். மித்ரன் இயக்கிய அந்த படத்தில் கார்த்தி இரட்டை வேடத்தில் நடித்து அசத்தியிருந்தார். குறிப்பாக வயதான உளவாளியான சர்தார் கதாபாத்திரம் ரசிகர்களை வெகுவாக கவர்ந்தது. தண்ணீர் பிரச்சனையை மையமாக வைத்து ஒரு ஸ்பை த்ரில்லராக உருவான முதல் பாகத்தின் வெற்றியை தொடர்ந்து, அதன் அடுத்த அத்தியாயமாக தற்போது ‘சர்தார் 2’ வெளியாகியுள்ளது.

முதல் பாகத்தின் தொடர்ச்சியாக உருவாகியிருப்பதால், இப்படத்தின் மீது இயல்பாகவே மிகப்பெரிய எதிர்பார்ப்பு  இருந்தது. குறிப்பாக சர்தார் கதாபாத்திரத்தின் பின்னணி, அவர் சந்தித்த தியாகங்கள் மற்றும் அடுத்ததாக கார்த்தியின் வாழ்க்கையில் நடக்கப்போகும் சம்பவங்கள் என்னவாக இருக்கும் என்ற கேள்விகள் ரசிகர்கள் மத்தியில் இருந்தன. அந்த எதிர்பார்ப்பை ‘சர்தார் 2’ எந்த அளவுக்கு பூர்த்தி செய்திருக்கிறது என்பதை பார்க்கலாம். அதற்கு முன்பு முதல் பாகத்தின் கதையை சுருக்கமாக நினைவுபடுத்திக் கொள்வோம்.

‘சர்தார்’ முதல் பாகத்தில் நடந்தது என்ன?

சீனாவுடன் கைகோர்த்து ‘ஒன் நேஷன் ஒன் பைப்லைன்’ என்ற திட்டத்தை இந்தியாவில் கொண்டு வருகிறார் மகாராஜ் ரத்தோர். வெளிப்பார்வைக்கு இந்த திட்டம் மக்களுக்கு பயனளிப்பது போல தோன்றினாலும், அதன் பின்னணியில் மிகப்பெரிய சதி இருக்கிறது. இந்தியாவில் இருக்கும் மொத்த தண்ணீரையும் தனது கட்டுப்பாட்டுக்குள் கொண்டு வந்து, மக்களை தண்ணீருக்காக தவிக்க வைப்பதுதான் அவரது திட்டம். இந்த சதியை கண்டுபிடிக்கும் லைலா, வில்லன் கும்பலால் கொல்லப்படுகிறார். அவரது மரணத்தில் மர்மம் இருப்பதை கண்டறியும் விஜய பிரகாஷ், உண்மையை தேடி செல்கிறார்.

இதையும் படிங்க: ‘மண்டாடி’ விமர்சனம்.. சூரியின் ஆக்‌ஷன் அவதாரத்துக்கு மற்றொரு மைல்கல்..!! படகு போட்டி ரசிகர்களை சீட் எட்ஜில் உட்கார வைத்ததா..!

அப்போதுதான் இந்த சதியை முறியடிக்கக்கூடிய ஒரே நபர் சர்தார் என்பது தெரியவருகிறது. இந்தியாவால் பயிற்சி அளிக்கப்பட்ட தலைசிறந்த உளவாளியான சர்தார், நாட்டிற்காக தனது குடும்பத்தையே தியாகம் செய்தவர். ஆனால், அவரது தியாகம் தவறாக புரிந்துகொள்ளப்பட்டதால் தேசத்துரோகி என்ற பட்டத்தையும் அவர் சுமக்கிறார். மகாராஜ் ரத்தோரின் துரோகத்தால் சர்தாரின் குடும்பமே அழிக்கப்படுகிறது. 32 ஆண்டுகளாக சிறையில் இருக்கும் சர்தாரிடம் ‘Code Red’ எப்படியாவது சென்றடைய வேண்டும் என்று முயற்சிகள் நடைபெறுகின்றன. இறுதியில் அந்த தகவல் சர்தாரை சென்றடைய, சிறையிலிருந்து தப்பிக்கும் அவர் தனது மகன் விஜய பிரகாஷுடன் இணைந்து ‘ஒன் நேஷன் ஒன் பைப்லைன்’ திட்டத்தை முறியடிக்கிறார்.

தன்னைப் பற்றிய உண்மை உலகத்திற்கு தெரிய வேண்டும் என்ற எண்ணத்துடன் “Once a spy, Always a spy” என்று கூறிவிட்டு சர்தார் தனது பாதையில் செல்கிறார். இதன் தொடர்ச்சியாக போலீஸ் பணியில் இருந்து விலகும் விஜய பிரகாஷ், RAW உளவாளியாக இணைகிறார். இங்கிருந்துதான் இரண்டாம் பாகத்தின் கதை தொடங்குகிறது.

‘சர்தார் 2’ கதை என்ன?

படத்தின் ஆரம்பமே ஒரு புதிய மிஷனை அறிமுகப்படுத்துகிறது. RAW அமைப்பு ‘வால்ரஸ்’ என்கிற ஏஜென்ட்டை தேடி வருகிறது. அதே நேரத்தில் விஜய பிரகாஷும் அந்த ஏஜென்ட்டை தேடி செல்கிறார். மறுபுறம் எஸ்.ஜே. சூர்யாவின் ஆட்களும் வால்ரஸை தேடிக் கொண்டிருக்கிறார்கள்.

ஒரு கட்டத்தில் வால்ரஸ் இறந்துவிடுகிறார். ஆனால் இறப்பதற்கு முன்பு அவர் கத்தி வடிவில் இருக்கும் ஒரு சாவியை கார்த்தியிடம் கொடுக்கிறார். அந்த சாவி எதற்காக? அதன் பின்னால் இருக்கும் ரகசியம் என்ன? என்பதை கண்டுபிடிக்க கார்த்தி களமிறங்குகிறார். அப்போதுதான் இதுபோன்ற மேலும் இரண்டு சாவிகள் இருப்பது தெரியவருகிறது. இந்த மூன்று சாவிகளும் இணைந்தால்தான் மிகப்பெரிய ‘Bio Apocalypse’ உருவாக்கக்கூடிய ஒரு முக்கியமான விஷயத்தை திறக்க முடியும் என்பதும் தெரிய வருகிறது.

அந்த ஆபத்தான பொருளை தேடித்தான் எஸ்.ஜே. சூர்யாவும் வருகிறார். மனித குலத்தில் பாதி மக்களை அழிப்பதே அவரது நோக்கம் என்பதும் படிப்படியாக வெளிப்படுகிறது. இதைத் தொடர்ந்து கார்த்தியின் விசாரணை கடந்த காலத்தை நோக்கி செல்கிறது. இந்த கதை தற்போது தொடங்கவில்லை; 1981ஆம் ஆண்டிலேயே தொடங்கிவிட்டது என்ற உண்மையை அவர் கண்டுபிடிக்கிறார். அதைவிட முக்கியமாக, அந்த காலகட்டத்தில் மிகப்பெரிய பேரழிவு ஒன்று ஏற்படாமல் தடுக்க போராடியவர் தனது தந்தையான சர்தார் என்பதையும் அறிகிறார்.

ஆனால் நாட்டை காப்பாற்றிய சர்தாரால் அனைவரையும் காப்பாற்ற முடியவில்லை. Bio weapon கசிவால் ஒரு கிராமமே பாதிக்கப்படுகிறது. 3,000 பேர் வசித்த அந்த கிராமத்தில் சர்தார் கொண்டு வந்த மாற்று மருந்தின் மூலம் வெறும் 54 பேரை மட்டுமே காப்பாற்ற முடிகிறது. “அனைவரையும் காப்பாற்றுவேன்” என்று வாக்கு கொடுத்துவிட்டு அதை நிறைவேற்ற முடியவில்லை என்ற குற்ற உணர்ச்சி சர்தாரை உள்ளுக்குள் மிகப்பெரிய அளவில் பாதிக்கிறது. அப்படியானால் 1981ஆம் ஆண்டு தடுக்கப்பட்ட அதே பேரழிவை மீண்டும் உருவாக்க எஸ்.ஜே. சூர்யா ஏன் முயற்சி செய்கிறார்? அவரது பின்னணி என்ன? சர்தார் மீண்டும் அந்த Bio Apocalypse-ஐ தடுக்கிறாரா? என்பதே படத்தின் மீதிக்கதை.

சமூக பிரச்சனையை பேசும் இயக்குனர்

முதல் பாகத்தில் தண்ணீர் பிரச்சனை மற்றும் அதன் விளைவுகளை மையமாக வைத்து கதை சொன்ன பி.எஸ். மித்ரன், இரண்டாம் பாகத்தில் மருத்துவத் துறையுடன் தொடர்புடைய ஒரு முக்கியமான பிரச்சனையை கையில் எடுத்திருக்கிறார். குறிப்பாக ‘Colistin’ என்ற antibiotic-ன் பயன்பாடு மற்றும் அதன் எதிர்கால விளைவுகளை மையமாக வைத்து படம் பல விஷயங்களை பேசுகிறது. நாம் அன்றாட வாழ்க்கையில் சாதாரணமாக கடந்து செல்லும் ஒரு விஷயம், வருங்காலத்தில் மிகப்பெரிய அழிவை ஏற்படுத்தும் அளவுக்கு எப்படி மாறக்கூடும் என்பதை படம் விளக்க முயற்சி செய்கிறது.

அந்த விஷயத்தை வெறும் சீரியஸான வசனங்களால் மட்டும் சொல்லாமல், எஸ்.ஜே. சூர்யா, யோகி பாபு, நிழல்கள் ரவி ஆகியோரை வைத்து உருவாக்கப்பட்ட காட்சிகளில் நகைச்சுவையையும் சிந்தனையையும் ஒன்றாக கலந்து கொடுத்திருப்பது சிறப்பு. ஒரு பக்கம் சிரிக்க வைத்தாலும், இன்னொரு பக்கம் அந்த காட்சியின் பின்னணியில் இருக்கும் ஆபத்தை ரசிகர்கள் உணரும்படி செய்திருக்கிறார் இயக்குனர்.

கார்த்தி மீண்டும் மிரட்டல்

கார்த்தி மீண்டும் சர்தார் மற்றும் விஜய பிரகாஷ் என இரண்டு வேடங்களிலும் சிறப்பாக நடித்துள்ளார். குறிப்பாக சர்தார் இடம்பெறும் பிளாஷ்பேக் காட்சிகள் ரசிகர்களுக்கு மிகப்பெரிய விருந்தாக அமைந்துள்ளன. அவரது இடைவேளை என்ட்ரி மற்றும் ஆக்‌ஷன் காட்சிகள் திரையரங்கில் நல்ல வரவேற்பை பெறும் வகையில் உருவாக்கப்பட்டுள்ளன. வயதான சர்தார் கதாபாத்திரத்தின் உடல்மொழியையும், அனுபவம் வாய்ந்த உளவாளியின் நிதானத்தையும் கார்த்தி மீண்டும் சிறப்பாக வெளிப்படுத்தியிருக்கிறார். விஜய பிரகாஷ் கதாபாத்திரத்தில் ஸ்பை மிஷனில் ஓடும் காட்சிகளிலும் அவர் தனது பங்குக்கு நியாயம் செய்துள்ளார்.

எஸ்.ஜே. சூர்யா – வில்லனாக வேற லெவல்

படத்தின் மற்றொரு மிகப்பெரிய பலம் எஸ்.ஜே. சூர்யா. வில்லன் கதாபாத்திரங்களில் ஏற்கனவே தனது தனித்துவமான நடிப்பை நிரூபித்துள்ள அவர், ‘சர்தார் 2’விலும் ஒவ்வொரு காட்சியிலும் தனது முத்திரையை பதித்துள்ளார். அவரது வசன உச்சரிப்பு, உடல்மொழி, பார்வை என அனைத்திலும் ஒரு வித்தியாசமான வில்லத்தனம் தெரிகிறது. குறிப்பாக யோகி பாபு மற்றும் நிழல்கள் ரவியுடன் அவர் இடம்பெறும் காட்சிகள் திரையரங்கில் கைதட்டல்களை பெற்றதாக சொல்லலாம். அந்த காட்சிகளில் நகைச்சுவையும் வில்லத்தனமும் கலந்திருப்பது எஸ்.ஜே. சூர்யாவின் நடிப்புக்கு கூடுதல் பலம்.

மாளவிகா மோகனன் முதல் மற்ற நடிகர்கள் வரை

மாளவிகா மோகனன் படத்தில் ஏஜென்ட் கதாபாத்திரத்தில் நடித்துள்ளார். ஆக்‌ஷன் காட்சிகளிலும், கதையின் முக்கியமான பகுதிகளிலும் அவர் தனது இருப்பை அழுத்தமாக பதிவு செய்கிறார். நாசர், ஆஷிகா ரங்கநாத், அவினாஷ், பாபு ஆண்டனி, யோகி பாபு, நிழல்கள் ரவி உள்ளிட்ட அனைவரும் தங்களுக்கு கொடுக்கப்பட்ட கதாபாத்திரங்களின் தன்மையை புரிந்து கொண்டு நடித்துள்ளனர். குறிப்பாக யோகி பாபு மற்றும் நிழல்கள் ரவி இடம்பெறும் பகுதிகள் படத்தின் சீரியஸ் தன்மைக்கு நடுவில் நகைச்சுவை உணர்வை கொண்டு வருகின்றன.

ஆக்‌ஷன் மற்றும் டெக்னிக்கல் அம்சங்கள்

‘சர்தார் 2’வின் ஆக்‌ஷன் காட்சிகள் படத்தின் முக்கியமான பலங்களில் ஒன்று. ஸ்பை த்ரில்லருக்கு தேவையான வேகம் மற்றும் பிரமாண்டத்தை கொடுக்கும் வகையில் சண்டைக்காட்சிகள் அமைக்கப்பட்டுள்ளன. ஒளிப்பதிவும் படத்தின் கதைக்கு தேவையான சூழலை உருவாக்குகிறது. கடந்த கால காட்சிகள் முதல் நவீன கால ஸ்பை மிஷன் வரை வெவ்வேறு உலகங்களை திரையில் கொண்டு வர கேமரா வேலை உதவியுள்ளது.

சாம்.சி.எஸ்-ன் பின்னணி இசையும் ஆக்‌ஷன் மற்றும் த்ரில்லர் காட்சிகளுக்கு தேவையான பலத்தை கொடுக்கிறது. குறிப்பாக சர்தார் வரும் காட்சிகளில் பின்னணி இசை ரசிகர்களை உற்சாகப்படுத்தும் வகையில் அமைந்துள்ளது. பாடல்கள் பெரிதாக மனதில் நிற்கவில்லை என்றாலும், பின்னணி இசை படத்தின் ஒட்டுமொத்த அனுபவத்தை உயர்த்துகிறது.

சில குறைகள் இருந்தாலும்…

படம் சொல்ல வரும் விஷயம் சுவாரஸ்யமானதாகவும் முக்கியமானதாகவும் இருந்தாலும், அதன் நீளம் சற்று குறைக்கப்பட்டிருக்கலாம் என்ற எண்ணம் சில இடங்களில் ஏற்படுகிறது. குறிப்பாக சில காட்சிகள் மற்றும் விளக்கங்கள் இன்னும் சுருக்கமாக இருந்திருந்தால் படத்தின் வேகம் அதிகரித்திருக்கும்.

அதேபோல் முதல் பாகத்தில் சர்தார் கதாபாத்திரத்துடன் உருவான எமோஷனல் கனெக்ட் எந்த அளவுக்கு ரசிகர்களை பாதித்ததோ, அதே அளவுக்கு இரண்டாம் பாகத்தில் அந்த உணர்வுப்பூர்வமான தாக்கம் இன்னும் கொஞ்சம் வலுவாக இருந்திருக்கலாம். ஆனால், இவை படத்தின் மொத்த அனுபவத்தை முற்றிலும் பாதிக்கும் அளவுக்கு பெரிய குறைகளாக தெரியவில்லை.

மொத்தத்தில்…

‘சர்தார் 2’ முதல் பாகத்தின் வெற்றியை தொடர்ந்து உருவாக்கப்பட்ட ஒரு பிரமாண்டமான ஸ்பை த்ரில்லராக ரசிகர்களை திருப்திப்படுத்துகிறது. கார்த்தியின் இரட்டை வேட நடிப்பு, சர்தார் பிளாஷ்பேக் காட்சிகள், எஸ்.ஜே. சூர்யாவின் மிரட்டல், மாளவிகா மோகனனின் ஏஜென்ட் கதாபாத்திரம், ஆக்‌ஷன் காட்சிகள், சாம்.சி.எஸ்-ன் பின்னணி இசை மற்றும் தொழில்நுட்ப அம்சங்கள் படத்தின் முக்கியமான பலங்கள்.

கதையின் மையமாக இருக்கும் Colistin மற்றும் எதிர்கால Bio Apocalypse தொடர்பான கருத்தை இயக்குனர் பி.எஸ். மித்ரன் சுவாரஸ்யமான முறையில் சொல்லியிருக்கிறார். சில இடங்களில் நீளம் மற்றும் எமோஷனல் கனெக்ட் சற்று குறைவாகத் தோன்றினாலும், பரபரப்பான ஸ்பை மிஷன், சர்தாரின் பிளாஷ்பேக் மற்றும் ஆக்‌ஷன் காட்சிகள் அந்த குறைகளை சமாளிக்கின்றன. மொத்தத்தில், சர்தாரின் மிஷன் இந்த முறையும் வெற்றிகரமாக நிறைவேறுகிறது. கார்த்தியின் ஸ்பை யுனிவர்ஸில் இன்னொரு விறுவிறுப்பான அத்தியாயமாக ‘சர்தார் 2’ ரசிகர்களை கவரும்.

இதையும் படிங்க: மீண்டும் ஒரே இடத்தில் விஜய் – அஜித்..!! லண்டனில் அரங்கேறப் போகும் அந்த அரிய சந்திப்பு.. ரசிகர்களின் நீண்ட நாள் ஆசை நிறைவேறுமா..!