திரைக்கதை மன்னன் கே.பாக்யராஜ் கடந்த வாரம் காலமானது தமிழ் திரையுலகையே உலுக்கிய சம்பவமாக மாறியுள்ளது. சுமார் ஐந்து தசாப்தங்களாக திரைக்கதை, இயக்கம், நடிப்பு என பல துறைகளில் தனக்கென அழியாத முத்திரையைப் பதித்த பாக்யராஜின் மறைவு, ரசிகர்களுக்கு மட்டுமல்லாமல் அவருடன் பணியாற்றிய கலைஞர்களுக்கும் ஈடு செய்ய முடியாத இழப்பாக அமைந்துள்ளது. அவரது மறைவையொட்டி திரையுலகின் பல்வேறு பிரபலங்கள் நேரில் அஞ்சலி செலுத்தியதோடு, அவருடனான நினைவுகளையும் பகிர்ந்து வருகின்றனர்.
அந்த வகையில், இயக்குநரும் நடிகருமான ஆர்.பார்த்திபன் சமீபத்தில் அளித்த பேட்டி தற்போது சமூக வலைதளங்களில் பரவலாக பேசப்பட்டு வருகிறது. தனது குருவான பாக்யராஜின் மறைவு முதல் இறுதிச் சடங்கு வரை நடந்த பல சம்பவங்களை அவர் மிகுந்த உணர்ச்சியுடன் பகிர்ந்துகொண்டதோடு, அந்த நாட்களில் தனக்கு வந்த ஒரு அதிர்ச்சிகரமான குறுஞ்செய்தி பற்றியும் முதன்முறையாக வெளிப்படையாக பேசியுள்ளார்.
பாக்யராஜின் உதவி இயக்குநராக தனது திரைப்பயணத்தைத் தொடங்கிய பார்த்திபன், பின்னர் தனித்துவமான படைப்புகளின் மூலம் தமிழ் சினிமாவில் முன்னணி இயக்குநராக உயர்ந்தவர். தனது வாழ்க்கையிலும், திரைப்பயணத்திலும் பாக்யராஜின் பங்களிப்பு மிகப்பெரியது என்பதை பல மேடைகளில் அவர் ஏற்கனவே கூறியிருந்தார். அதனால், அவரது மறைவுக்குப் பிறகு குடும்ப உறுப்பினரைப் போல அனைத்து ஏற்பாடுகளிலும் அருகில் இருந்து உதவியதாகவும், இறுதி ஊர்வலம் வரை பல பொறுப்புகளை ஏற்றதாகவும் அவர் தெரிவித்தார்.
இதையும் படிங்க: பாக்யராஜ் இறுதிச்சடங்கு எப்போது?... கண்ணீரை கட்டுப்படுத்த முடியாமல் அழுது கொண்டே அறிவித்த பார்த்திபன்...!
ஆனால், அந்த நேரத்திலேயே தன்னை மிகவும் மனவேதனைக்குள்ளாக்கிய ஒரு சம்பவம் நடந்ததாக பார்த்திபன் கூறியிருப்பது பலரையும் அதிர்ச்சியடையச் செய்துள்ளது. பாக்யராஜிடம் உதவி இயக்குநராக இருந்தவர்களில் ஒருவரிடமிருந்து தனக்கு மிகவும் கடுமையான குறுஞ்செய்தி வந்ததாக அவர் தெரிவித்தார்.
அந்தச் செய்தியில், "நீதான் பாக்யராஜை பெத்து வளர்த்து, நீயே பாக்யராஜை புதைத்துவிட்டு வந்தது மாதிரி நடந்துக்கிற. அக்கம் பக்கத்தில் இருப்பவர்களையும் கொஞ்சம் அனுசரிக்கணும் இல்லையா? மற்றவர்களையும் கூப்பிட்டு ஒரு வேலை சொல்லியிருக்கணும் இல்லையா? இப்படி அக்கம் பக்கத்தில் இருப்பவர்களை அனுசரிக்காததால்தான் நீ பொண்டாட்டி, பிள்ளை இல்லாமல் கஷ்டப்படுற. கூடிய சீக்கிரம் பாரு, நீ செத்துப்போயிடுவ. உனக்கு கூட்டமே வராது" என்று மிகவும் கடுமையான வார்த்தைகள் இடம்பெற்றிருந்ததாக பார்த்திபன் கூறினார்.
இந்தச் செய்தியைப் படித்தபோது மிகவும் வேதனையாக இருந்ததாகக் கூறிய அவர், அதற்கு எந்தவித பதிலும் அனுப்பவில்லை என்றும் தெரிவித்தார். மாறாக, அந்த குறுஞ்செய்தியை நடிகர் சாந்தனு பாக்யராஜ்-விடம் காட்டியதாகவும், அதற்குப் பிறகும் அமைதியாக இருப்பதையே தேர்வு செய்ததாகவும் கூறினார்.
"அந்த நேரம் யாருடனும் வாதாட வேண்டும் என்ற எண்ணமே எனக்கு இல்லை. என் மனதில் இருந்தது பாக்யராஜ் சார் மட்டும்தான். அதனால் அந்தச் செய்திக்கு நான் எந்தப் பதிலும் அனுப்பவில்லை," என்ற அவரது வார்த்தைகள் பேட்டியில் உணர்ச்சிகரமான தருணமாக அமைந்தன.
இதனுடன், பாக்யராஜின் இறுதி அஞ்சலியில் தான் செய்த ஒரு வித்தியாசமான செயலையும் பார்த்திபன் பகிர்ந்துகொண்டார். வழக்கமாக அனைவரும் மலர் மாலைகள் அணிவித்து மரியாதை செலுத்திய நிலையில், தன்னால் வேறுபட்ட முறையில் குருவுக்கு அஞ்சலி செலுத்த வேண்டும் என்று எண்ணியதாக அவர் கூறினார்.
"நள்ளிரவில் ஒரு ஆர்ட் டைரக்டரை தொடர்புகொண்டு ஒரு சிறப்பு பேட்ஜ் தயாரிக்கச் சொன்னேன். அதில் 'அன்புடன் உங்கள் கே. பாக்யராஜ்' என்று அவர் கையொப்பமிடும் பாணியை அப்படியே வடிவமைத்து ஒரு அட்டையை உருவாக்கினோம். அந்த அட்டையை அவரது உடலின் மீது வைத்தேன். இறுதிச் சடங்கின் போது சாந்தனு கற்பூரம் ஏற்றி மரியாதை செலுத்தியபோதும் அந்த அட்டை அங்கேயே இருந்தது. பின்னர் அவரது உடல் தகனத்திற்காக எடுத்துச் செல்லப்பட்டபோதும் அந்த அட்டை அவருடனேயே சென்றது," என்று கண்ணீருடன் நினைவுகூர்ந்தார்.
பார்த்திபனின் இந்த உருக்கமான நினைவுகள் பலரது மனதையும் நெகிழச் செய்துள்ளன. சமூக வலைதளங்களில் அவரது பேட்டியின் வீடியோ வேகமாகப் பரவி வரும் நிலையில், பலரும் அவரது உணர்வுகளைப் பாராட்டி கருத்துகளை பதிவிட்டு வருகின்றனர். அதேசமயம், இறுதிச் சடங்கு போன்ற துயரமான சூழலிலும் ஒருவருக்கு இவ்வளவு கடுமையான குறுஞ்செய்தி அனுப்பப்பட்டது ஏன் என்ற கேள்வியையும் பலர் எழுப்பியுள்ளனர்.
அந்தக் குறுஞ்செய்தியை அனுப்பிய நபரின் பெயரை பார்த்திபன் வெளியிடவில்லை. இதனால், அது யாராக இருக்கலாம் என்ற ஊகங்களும் சமூக வலைதளங்களில் பரவி வருகின்றன. இருப்பினும், இதுகுறித்து அவர் எந்தவித குற்றச்சாட்டையும் முன்வைக்காமல், அந்தச் சம்பவத்தை மட்டும் பகிர்ந்திருப்பது குறிப்பிடத்தக்கதாக பார்க்கப்படுகிறது.
பாக்யராஜின் மறைவு தமிழ் சினிமாவுக்கு மிகப்பெரிய இழப்பாகக் கருதப்படும் நிலையில், அவரது இறுதி நாட்களைச் சுற்றிய நினைவுகள், அவருடன் நெருக்கமாக பணியாற்றியவர்களின் அனுபவங்கள் தொடர்ந்து வெளிவந்து கொண்டிருக்கின்றன. அவருடைய திரைப்பங்களிப்பைப் போலவே, அவரை நேசித்தவர்களின் மனதிலும் அவர் விட்டுச் சென்ற நினைவுகள் நீண்ட காலம் நிலைத்திருக்கும் என்பதே தற்போது திரையுலகினரின் ஒருமித்த கருத்தாக உள்ளது.
இதையும் படிங்க: என் குடும்பத்தை அப்யூஸ் பண்ண விஜய் ரசிகர்கள்..!! ”தம்பி தப்பு” கமெண்டும் வைரலாக்கிட்டாங்க.. என்ன சமூகம் இது - நட்டி நடராஜ் வேதனை..!