கரூர் வேலுசாமிபுரத்தில் கடந்த ஆண்டு செப்டம்பர் 27ம் தேதி நடைபெற்ற தமிழக வெற்றிக் கழக மக்கள் சந்திப்பு நிகழ்ச்சியில் ஏற்பட்ட கூட்ட நெரிசலில் 41 பேர் உயிரிழந்த துயரச் சம்பவத்திற்கு வரும் 27 ஆம் தேதியுடன் ஒரு ஆண்டு நிறைவடைகிறது. 

இந்நிலையில், அந்த 41 பேரின் நினைவாக அமைக்கப்படவுள்ள நினைவுச்சின்னத்திற்கு அடிக்கல் நாட்டும் நிகழ்ச்சியும், அஞ்சலி செலுத்தும் நிகழ்ச்சியும் ஒரே இடத்தில் நடைபெறும் என்று தகவல்கள் வெளியாகியுள்ளன. இதில் முதலமைச்சர் விஜய் கலந்துகொண்டு அடிக்கல் நாட்டி, உயிரிழந்தோருக்கு அஞ்சலி செலுத்த உள்ளதாகக் கூறப்படுகிறது.

2025 செப்டம்பர் 27ம் தேதி கரூர் வேலுசாமிபுரத்தில் தவெக தலைவர் விஜய் பங்கேற்ற பொதுக்கூட்டத்தின் போது ஏற்பட்ட நெரிசலில் சிக்கி 41 பேர் உயிரிழந்தனர். இந்தச் சம்பவம் மாநிலம் முழுவதும் பெரும் அதிர்ச்சியை ஏற்படுத்தியது. சட்டமன்றத் தேர்தலில் தவெக வெற்றி பெற்று முதலமைச்சராக விஜய் பதவியேற்ற பிறகு, கடந்த ஜூலை 10 ஆம் தேதி முதல்முறையாக கரூருக்கு வருகை தந்தார். 

இதையும் படிங்க: எந்தக் குற்றவாளியையும் தப்பவிடக்கூடாது.. ஜெம் வீரமணி வழக்கில் காவல்துறைக்கு CM விஜய் நேரடி உத்தரவு..!!

அப்போது உயிரிழந்தோரின் குடும்பங்களைச் சேர்ந்த 31 பேருக்கு கருணை அடிப்படையில் அரசுப் பணி ஆணைகளை வழங்கி ஆறுதல் கூறினார். அதே நிகழ்ச்சியில், இறந்த 41 பேரின் நினைவாக வேலுசாமிபுரத்தில் தவெக சார்பில் நினைவுச்சின்னம் அமைக்கப்படும் என்று அறிவித்தார். இதற்கிடையே, மதுராந்தகம் மற்றும் தாராபுரம் சட்டமன்றத் தொகுதிகளுக்கான இடைத்தேர்தல் வரும் அக்டோபர் 6ம் தேதி நடைபெற உள்ளது. 

இந்த இடைத்தேர்தலில் போட்டியிடும் தவெக வேட்பாளர்களை ஆதரித்து முதலமைச்சர் விஜய் நான்கு நாட்கள் பிரசாரம் செய்ய உள்ளார். அதில் செப்டம்பர் 26ம் தேதி தாராபுரத்தில் பிரசாரம் செய்துவிட்டு, அடுத்த நாள் 27ம் தேதி கரூருக்கு வருகை தர திட்டமிட்டுள்ளதாகத் தகவல் கிடைத்துள்ளது. அன்றைய தினம் கரூரில் நினைவுச்சின்ன அடிக்கல் நாட்டல் மற்றும் அஞ்சலி நிகழ்ச்சிகள் ஒரே இடத்தில் நடத்தப்படவுள்ளன.

இதற்கான இடத் தேர்வுப் பணிகள் தொடங்கியுள்ளன. முதலமைச்சராகப் பதவியேற்ற பிறகு இது விஜயின் இரண்டாவது கரூர் வருகையாக அமையும் என்பது குறிப்பிடத்தக்கது. இந்த நிகழ்ச்சிகள் உயிரிழந்தோரின் நினைவைப் போற்றும் வகையில் நடைபெறும் என எதிர்பார்க்கப்படுகிறது.

இதையும் படிங்க: "வெற்றிப்பயணம் வரலாறு படைக்கட்டும்"..! துப்பாக்கிச் சுடும் போட்டியில் வெள்ளிப்பதக்கம்..! இளவேனிலுக்கு CM விஜய் வாழ்த்து.!!