தமிழக நகராட்சி நிர்வாகத் துறை அமைச்சர் கே.நெ. நேருவுக்கு அமலாக்கத்துறை (ED) கொடுத்துள்ள நெருக்கடி, அரசியல் வட்டாரத்தில் பெரும் பரபரப்பை ஏற்படுத்தியுள்ளது. அலுவலர் மட்ட பணி நியமனங்களில் முறைகேடு நடந்ததாகக் கூறி, தமிழக டி.ஜி.பி.க்கு வழக்குப் பதிவு செய்யுமாறு அமலாக்கத்துறை கடிதம் எழுதியுள்ளது. இதனால் அமைச்சர் பதவிக்கே ஆபத்து ஏற்படலாம் என்ற அச்சத்தில், அமைச்சர் நேரு சீர்காழி சட்டநாதர் கோவிலில் சிறப்பு வழிபாடு நடத்தினார். 

அதேநேரம், தஞ்சாவூரில் நடந்த தி.மு.க. வாக்குச்சாவடி முகவர்கள் ஆலோசனைக் கூட்டத்தில், உயர்கல்வித்துறை அமைச்சர் ஆர்.எஸ். செழியன் பிரதமர் மோடி, உள்துறை அமைச்சர் அமித் ஷாவை கடுமையாக விமர்சித்தார். ஆனால் அமைச்சர் நேரு, பா.ஜ.க.வுக்கு எதிராக ஒரு வார்த்தை கூட பேசவில்லை என்பது குறிப்பிடத்தக்கது.

நகராட்சி நிர்வாகத் துறையில் அலுவலர் மட்டத்தில் பணி நியமனங்களை மேற்கொள்ளும் போது, முறைகேடுகள் நடந்ததாக அமலாக்கத்துறை கண்டறிந்துள்ளது. இதுதொடர்பாக தமிழக டி.ஜி.பி. அலுவலகத்திற்கு கடிதம் எழுதி, உரிய வழக்குப் பதிவு செய்யுமாறு அமலாக்கத்துறை கேட்டுக்கொண்டுள்ளது. இந்த விவகாரம் பூதாகரமாகி, அமைச்சர் பதவிக்கு சிக்கல் ஏற்படலாம் என்ற அச்சத்தில், அமைச்சர் நேரு சீர்காழி சட்டநாதர் கோவிலுக்கு சென்று சிறப்பு வழிபாடு செய்தார். இந்த நிகழ்வு, அரசியல் வட்டாரத்தில் பேசு பொருளாகியுள்ளது.

இதையும் படிங்க: தோல்விக்கு இப்போதே காரணம் தேடும் ஸ்டாலின்?! நெத்தியடி கேள்விகளால் நயினார் தாக்கு!

இதற்கிடையில், தஞ்சாவூர் மாவட்டத்தில் மத்திய மாவட்ட தி.மு.க. சார்பில் நேற்று (நவம்பர் 7) வாக்குச்சாவடி முகவர்கள் மற்றும் பூத் டிஜிட்டல் ஏஜன்ட் ஆலோசனைக் கூட்டம் நடைபெற்றது. இதில் அமைச்சர்கள் நேரு, செழியன் உள்ளிட்டோர் பங்கேற்றனர். 

கூட்டத்தில் பேசிய உயர்கல்வித்துறை அமைச்சர் செழியன், “பா.ஜ.க. வெற்றி பெற முடியாது என்ற நிலையில், கையில் எடுத்திருக்கும் ஆயுதம் தான் ஓட்டு திருட்டு. அடிமைகளை கையில் வைத்துக்கொண்டு, பிரதமர் மோடி, உள்துறை அமைச்சர் அமித் ஷா போன்றவர்கள் நம்மை வீழ்த்த நினைக்கின்றனர். 

இந்தியாவில் பிரதமரையே எதிர்க்கும் துணிவு வேறு எந்த மாநில முதல்வருக்கும் இல்லை. பல அரசியல் கட்சிகளும் பா.ஜ.க.வுக்கு அடிபணிந்த நிலையில், ‘மாநில உரிமையை கட்டிக் காப்போம்’ என பிரதமரையே எதிர்த்து வெற்றிக்கனி பறிப்பவர் முதல்வர் ஸ்டாலின்” என்று பா.ஜ.க.வை கடுமையாக விமர்சித்தார்.

ஆனால், அமைச்சர் நேரு தனது உரையில் பா.ஜ.க. அல்லது மோடி, அமித் ஷா பற்றி ஒரு வார்த்தை கூட பேசவில்லை. அவர், “வாக்காளர் பட்டியலில் சிறுபான்மையினர் ஓட்டுகளை விடுபடாமல் சேர்க்க வேண்டும். சிறுபான்மையினர் ஓட்டு அனைத்தும் தி.மு.க.வுக்கான ஓட்டுகள். ஆவணங்கள் இல்லாமல் பிற மாநில வாக்காளர்களை சேர்க்க அனுமதிக்கக் கூடாது. கட்சியினர் கண்ணும் கருத்துமாக செயல்பட்டு, தி.மு.க.வை இரண்டாவது முறையாக வெற்றி பெறச் செய்ய வேண்டும்” என்று மட்டுமே பேசினார். இதனால், ‘அமலாக்கத்துறை நெருக்கடியால் அமைச்சர் நேரு அமைதியாகிவிட்டார்’ என்று கூட்டத்தில் பங்கேற்ற கட்சியினர் கருத்து தெரிவித்தனர்.

அமைச்சர் நேரு மீதான அமலாக்கத்துறை நடவடிக்கை, தி.மு.க. அரசுக்கும் அழுத்தத்தை ஏற்படுத்தியுள்ளது. 2026 சட்டசபைத் தேர்தலுக்கு முன்னதாக, மத்திய அரசு நிறுவனங்களைப் பயன்படுத்தி எதிர்க்கட்சித் தலைவர்களை மிரட்டுவதாக தி.மு.க. தொடர்ந்து குற்றம்சாட்டி வருகிறது. இந்த விவகாரம், தமிழக அரசியலில் புதிய சர்ச்சையை ஏற்படுத்தியுள்ளது.

இதையும் படிங்க: பென்னாகரம் - சவுமியா Vs தர்மபுரி - ஸ்ரீகாந்தி!! பலம் காட்ட தயாராகும் ராமதாஸ் - அன்புமணி! களைகட்டும் குடும்ப அரசியல்!