ஓமன் நாட்டின் முக்கியத் தொழில் நகரமான சோஹர் (Sohar) பகுதியில் நடத்தப்பட்ட திடீர் ட்ரோன் தாக்குதலில், அங்கு பணியிலிருந்த இரண்டு இந்தியர்கள் உயிரிழந்துள்ளதாகவும், பத்து பேர் காயமடைந்துள்ளதாகவும் இந்திய வெளியுறவு அமைச்சகம் (MEA) இன்று உறுதிப்படுத்தியுள்ளது. மேற்கு ஆசியாவில் நிலவி வரும் போர்ப் பதற்றத்திற்கு மத்தியில், அமைதியான நாடாகக் கருதப்படும் ஓமனிலும் இத்தகைய தாக்குதல் நடத்தப்பட்டிருப்பது சர்வதேச அளவில் அதிர்ச்சியை ஏற்படுத்தியுள்ளது.

சோஹர் துறைமுகப் பகுதிக்கு அருகே நடத்தப்பட்ட இந்தத் தாக்குதலில் சிக்கி இரண்டு இந்தியப் பணியாளர்கள் சம்பவ இடத்திலேயே உயிரிழந்தனர். அவர்களது உடல்களைத் தாயகம் கொண்டு வர மஸ்கட்டில் உள்ள இந்தியத் தூதரகம் ஓமன் அதிகாரிகளுடன் இணைந்து பணியாற்றி வருகிறது.

தாக்குதலில் காயமடைந்த 10 இந்தியர்களில், 5 பேர் லேசான காயங்களுடன் முதலுதவிக்குப் பிறகு மருத்துவமனையில் இருந்து வீடு திரும்பியுள்ளனர். மீதமுள்ள 5 பேர் தீவிர சிகிச்சைப் பிரிவில் அனுமதிக்கப்பட்டுத் தொடர்ந்து கண்காணிக்கப்பட்டு வருகின்றனர். அவர்களுக்குத் தேவையான அனைத்து மருத்துவ உதவிகளையும் இந்தியத் தூதரகம் உறுதி செய்துள்ளது.

இதையும் படிங்க: ஓமன் அருகே எண்ணெய் கப்பல் மீது ட்ரோன் தாக்குதல்.. இந்திய மாலுமி பலி! 16 இந்தியர்கள் மீட்பு!

ஈரானுக்கும் அமெரிக்க-இஸ்ரேல் படைகளுக்கும் இடையே போர் தீவிரமடைந்துள்ள சூழலில், வளைகுடா நாடுகளில் உள்ள முக்கியக் கட்டமைப்புகளை இலக்காகக் கொண்டு ஏவப்படும் ட்ரோன்கள் திசைமாறி அல்லது திட்டமிட்டு ஓமன் மீது விழுந்திருக்கலாம் எனக் கருதப்படுகிறது.

ஓமனிலுள்ள இந்தியத் தூதரகம், அங்குள்ள இந்தியக் குடிமக்கள் தேவையற்ற பயணங்களைத் தவிர்க்குமாறும், பாதுகாப்பு விதிமுறைகளை முறையாகப் பின்பற்றுமாறும் அறிவுறுத்தியுள்ளது. மேலும், அவசர உதவிக்கு +968 24671034 என்ற ஹெல்ப்லைன் எண்ணைத் தொடர்பு கொள்ளலாம் எனத் தெரிவிக்கப்பட்டுள்ளது.

மரணமடைந்த இந்தியர்களின் குடும்பங்களுக்குத் தேவையான அனைத்து இழப்பீடு மற்றும் உதவிகளை வழங்க அரசு முன்னுரிமை அளிக்கும் என வெளியுறவு அமைச்சக செய்தித் தொடர்பாளர் ரந்தீர் ஜெய்ஸ்வால் தெரிவித்துள்ளார்.

இதையும் படிங்க: கலவர பூமியாக மாறிய மெக்சிகோ..!! பாதுகாப்பா இருங்க.. இந்தியர்களுக்கு மத்திய அரசு அறிவுறுத்தல்..!!