தமிழக மக்களின் நீண்டகால எதிர்பார்ப்பை நிறைவேற்றும் வகையில், புதிய முதலமைச்சர் ஜோசப் விஜய் பதவியேற்ற முதல் நாளிலேயே முக்கிய முடிவுகளை எடுத்துள்ளார். இதில் மிக முக்கியமானது, வீட்டு மின்சார பயன்பாட்டில் 500 யூனிட்டுக்கு குறைவாக பயன்படுத்தும் குடும்பங்களுக்கு அடுத்த இரண்டு மாதங்களுக்கு 200 யூனிட் மின்சாரம் இலவசமாக வழங்கும் திட்டம்.

முன்னாள் முதலமைச்சர் ஜெயலலிதா காலத்தில் அறிமுகப்படுத்தப்பட்ட 100 யூனிட் இலவச மின்சார திட்டம் தொடர்ந்து நடைமுறையில் இருந்து வரும் நிலையில், புதிய அறிவிப்பு மக்களுக்கு கூடுதல் பெரும் நிவாரணத்தை அளிக்கும் என எதிர்பார்க்கப்படுகிறது. இதற்கான அரசாணையை உடனடியாக வெளியிட்ட தமிழ்நாடு அரசு, செயல்பாட்டுக்கு தயாராக உள்ளது. 

தமிழ்நாடு மின்சார வாரியம் (TANGEDCO) வெளியிட்டுள்ள அறிவிப்பின்படி, புதிய திட்டம் கடந்த 10-ம் தேதி முதல் அமலுக்கு வந்துள்ளது. இதன் மூலம் சராசரி குடும்பத்துக்கு மாதத்துக்கு ரூ.235 வரை மின்கட்டணத்தில் சேமிப்பு ஏற்படும் என மின்வாரியம் தெரிவித்துள்ளது. 

இதையும் படிங்க: கல்வித்துறை சீர்கேடு..! எக்கச்சக்க பிரச்சனை..! புதுவை ரங்கசாமிக்கு திமுக அழுத்தம்..!

யூனிட் அடிப்படையில் சேமிப்பு விவரம்: 210 யூனிட் பயன்படுத்துபவர்களுக்கு பழைய கட்டணம் ரூ.282 ஆக இருந்த நிலையில், புதிய திட்டத்தில் ரூ.47 மட்டுமே செலுத்த வேண்டும். 250 யூனிட்டுக்கு ரூ.470-ல் இருந்து ரூ.235 ஆக குறையும். 300 யூனிட் பயன்படுத்துவோருக்கு ரூ.705-ல் இருந்து ரூ.470 ஆகவும், 400 யூனிட்டுக்கு ரூ.1175-ல் இருந்து ரூ.940 ஆகவும் கட்டணம் குறையும். 500 யூனிட் வரை இந்த சலுகை பொருந்தும். 500 யூனிட்டுக்கு மேல் பயன்படுத்துபவர்களுக்கு எந்த மாற்றமும் இல்லை.

இந்த திட்டம் குறிப்பாக நடுத்தர குடும்பங்கள், சிறு வியாபாரிகள் மற்றும் ஏழை மக்களுக்கு பெரும் உதவியாக அமையும். கோடை காலத்தில் மின் தேவை அதிகரிக்கும் சூழலில் இந்த அறிவிப்பு வரவேற்பை பெற்றுள்ளது. முதலமைச்சர் ஜோசப் விஜய் தனது முதல் மூன்று முக்கிய கோப்புகளில் கையெழுத்திட்டதில் இந்த மின்சார நிவாரணமும் ஒன்று என்பது குறிப்பிடத்தக்கது. இந்த நடவடிக்கை மக்கள் நலன் சார்ந்த அரசியலை அவர் முன்னெடுக்கும் என்பதை உறுதிப்படுத்துகிறது.

தமிழ்நாடு மின்சார வாரியம், இந்த திட்டத்தை சீராக செயல்படுத்த தேவையான ஏற்பாடுகளை செய்துள்ளதாகவும், பயனாளிகளின் மின்சார இணைப்புகளில் தானாகவே புதிய கட்டணம் பிரதிபலிக்கும் எனவும் தெரிவித்துள்ளது. மக்கள் தங்கள் மின் நுகர்வை கண்காணித்து பயன்படுத்துமாறு அறிவுறுத்தப்பட்டுள்ளனர்.

இந்த இரண்டு மாத கால திட்டத்திற்குப் பிறகு அரசு மேலும் நீண்டகால திட்டங்களை அறிவிக்கலாம் என எதிர்பார்ப்பு நிலவுகிறது. தற்போதைய அறிவிப்பு மட்டுமே மின்கட்டண சுமையை கணிசமாகக் குறைத்து, மக்களின் வாழ்வாதாரத்தை மேம்படுத்தும் என பொருளாதார நிபுணர்கள் கருத்து தெரிவித்துள்ளனர்.

இதையும் படிங்க: எடப்பாடி மீது கட்சி தாவல் சட்டம்.? அரசியலில் பரபரப்பு... அதிமுகவில் கலகக்குரல்..!!