இந்திய ரயில்வேயின் டிக்கெட் முன்பதிவு முறையில் பெரிய மாற்றம் நிகழவுள்ளது. வரும் அக்டோபர் 1ம் தேதி முதல், பொது ரிசர்வேஷன் டிக்கெட்டுகளை ஆன்லைனில் புக் செய்யும் போது, முதல் 15 நிமிடங்களுக்குள் ஆதார் அங்கீகாரம் செய்யப்பட்ட IRCTC கணக்குகள் மட்டுமே அனுமதிக்கப்படும். இந்த முடிவு, டிக்கெட் புக் செய்வதில் ஏற்படும் தவறுகளையும், போலி கணக்குகளால் ஏற்படும் சிக்கல்களையும் தவிர்க்கும் நோக்கில் எடுக்கப்பட்டுள்ளது. ரயில்வே போர்டு இந்த விதிமுறையை அறிவித்துள்ளது.

இந்திய ரயில்வே கேட்டரிங் அண்ட் டூரிசம் கார்ப்பரேஷன் (IRCTC) இணையதளம் அல்லது மொபைல் ஆப் மூலம் டிக்கெட் புக் செய்யும் பயணிகள், பொது ரிசர்வேஷன் தொடங்கும் முதல் 15 நிமிடங்களுக்குள் ஆதார் இணைக்கப்பட்ட கணக்குகளைப் பயன்படுத்த வேண்டும். இது, பொதுமக்களுக்கு டிக்கெட் வசதியை சரியாக வழங்கவும், தவறான உறுப்பினர்களால் துஷ்பிரயோகம் செய்யப்படுவதைத் தடுக்கவும் உதவும் என்று அரசு தெரிவித்துள்ளது.

இதையும் படிங்க: ஆதாரை ஆவணமாக பரிசீலிக்க வேண்டும்.. தேர்தல் ஆணையத்திற்கு சுப்ரீம் கோர்ட் உத்தரவு..!!

"ரிசர்வேஷன் முறையின் நன்மைகள் பொதுமக்களை அடைய வேண்டும், தவறான உறுப்பினர்களால் துஷ்பிரயோகம் செய்யப்படக்கூடாது" என்று அரசு வட்டாரங்கள் கூறின. இது முதல் முறை அல்ல. கடந்த ஜூலை மாதம் முதல், தட்கல் டிக்கெட்டுகளுக்கு ஆதார் அங்கீகாரம் கட்டாயமாக்கப்பட்டது. அப்போது, ஆதார் இல்லாத கணக்குகளால் தட்கல் டிக்கெட் புக் செய்ய முடியவில்லை. இப்போது, இந்த விதி பொது ரிசர்வேஷனுக்கும் விரிவாக்கம் செய்யப்படுகிறது. 

பொது ரிசர்வேஷன் விண்டோ தினசரி அதிகாலை 12:20 மணி முதல் இரவு 11:45 மணி வரை செயல்படும், மேலும் டிக்கெட் 60 நாட்கள் முன்பு திறக்கப்படும். இருப்பினும், ரயில்வே நிலைய கவுண்டர்களில் (PRS) புக் செய்வதில் எந்த மாற்றமும் இல்லை. அங்கீகரிக்கப்பட்ட ஏஜெண்ட்கள் முதல் 10 நிமிடங்களுக்கு புக் செய்ய முடியாது.

இந்த மாற்றத்தால், போலி கணக்குகள் மூலம் பெருந்தொகை டிக்கெட்டுகளை புக் செய்வது தடுக்கப்படும். உண்மையான பயணிகளுக்கு அதிக வாய்ப்பு கிடைக்கும். ரயில்வே அதிகாரிகள், "இது ஈ-டிக்கெட்டிங் முறையை பாதுகாப்பானதாக்கும்" என்று கூறினர். CRISP மற்றும் IRCTC-வின் தொழில்நுட்ப மாற்றங்கள் தயாராக உள்ளன. 

பயணிகள், அக்டோபர் 1க்கு முன் தங்கள் IRCTC கணக்குகளை ஆதாருடன் இணைக்க வேண்டும். இல்லையெனில், முதல் 15 நிமிடங்களில் டிக்கெட் புக் செய்ய முடியாது. இந்த மாற்றம், ரயில்வேயின் டிஜிட்டல் பாதுகாப்பை வலுப்படுத்தும் ஒரு முக்கிய படியாகும். பயணிகள் இதைப் பற்றி விழிப்புணர்வு பெற வேண்டும்.

இதையும் படிங்க: விநாயகர் சதுர்த்தி ஸ்பெஷல்.. 380 கணபதி சிறப்பு ரயில்கள் இயக்கம்.. இந்திய ரயில்வே முடிவு..!!