நாகை மாவட்டம் அவுரித்திடலில் அதிமுக பொதுச்செயலாளர் எடப்பாடி பழனிசாமி, அதிமுக மற்றும் கூட்டணி கட்சி வேட்பாளர்களை ஆதரித்து தீவிர பிரசாரம் மேற்கொண்டார். பிரசாரத்துக்குப் பின் அவர் உரையாற்றியபோது, திமுக தலைவர் மு.க.ஸ்டாலினின் விமர்சனங்களுக்கு கடும் பதிலடி கொடுத்தார்.

தேர்தல் பிரசாரம் தொடங்கியதிலிருந்து ஸ்டாலின் தன்னைப் பற்றி தொடர்ந்து விமர்சனம் செய்து வருவதாகக் குற்றம் சாட்டிய எடப்பாடி, “சாதனைகளைப் பற்றி பேசாமல், என்னை சாக்கடைக்கு ஒப்பிடும் அளவுக்கு தரம் தாழ்ந்து பேசுகிறார். வின்னர் படத்தில் வடிவேலு நடித்த கட்டதுறை கதாபாத்திரம் திருந்தாதது போலவே ஸ்டாலினின் பேச்சும் மாறவில்லை” என்று விளையாட்டாகச் சாடினார்.

மேலும், “சாக்கடையில் இருப்பவர்கள் அவர்களே. தீய சக்திகளை ஒழிக்க தொடங்கிய கட்சி அதிமுக. ஆனால், அதிமுக பாஜகவுக்கு அடிமை என்று ஸ்டாலின் பொய் பிரசாரம் செய்கிறார். எங்கள் கட்சியின் ஒரு தொண்டன் கூட யாருக்கும் அடிமையல்ல. குடும்பத்தில் யாருக்கு பதவியும் அதிகாரமும் கொடுப்பது என்பதே கருணாநிதியின் எண்ணமாக இருந்தது. எம்.ஜி.ஆர் மறைவுக்குப் பின் அதிமுக காணாமல் போகும் என்று அவர் எதிர்பார்த்தார்.

இதையும் படிங்க: "தேர்தலுக்காக பாஜக எத்தகைய செயலையும் செய்யும்!" - அதிகாரிகள் மாற்றம் குறித்து டி.கே.எஸ்.இளங்கோவன் விமர்சனம்!

ஆனால், எத்தனை வழக்குகள் போட்டாலும், மக்களின் துணையோடு நாங்கள் வென்று வலிமையாக உயர்ந்தோம். அடி வாங்க வாங்க எங்கள் கட்சி பலம் பெற்றது. ஒவ்வொரு தவறும் அதிமுகவுக்கு பலத்தை கொடுத்தது. எங்கள் இயக்கத்தை அழிக்க நினைத்தவர்கள் தாங்களே அழிந்து போனார்கள். அதிமுக தெய்வீக சக்தி கொண்ட கட்சி” என்று உறுதியாகக் கூறினார். 

எம்.ஜி.ஆர் மற்றும் ஜெயலலிதா போன்ற தலைவர்கள் தன்னலமின்றி எண்ணற்ற மக்கள் நலத் திட்டங்களை செயல்படுத்தினர் என்று நினைவுகூர்ந்த எடப்பாடி, “மக்களுக்காக உழைத்த அவர்களுக்கு நாங்களும் மக்களுமே உண்மையான வாரிசுகள்” என்றார். அதிமுக ஆட்சியில் காவிரி படுகைப் பகுதிகளை பாதுகாக்கப்பட்ட வேளாண் மண்டலமாக அறிவித்ததை சுட்டிக்காட்டினார்.

காவிரி பிரச்னையில் ஸ்டாலினின் அணுகுமுறையை கடுமையாக விமர்சித்த அவர், “மேகதாதுவில் அணை கட்டுவோம் என்று கர்நாடக அமைச்சர் சொன்னபோது ஸ்டாலின் அவருடன் பிரசாரம் செய்கிறார். அங்கு அணை கட்டப்பட்டால் நாகை உள்ளிட்ட காவிரி டெல்டா மாவட்டங்கள் பாலைவனமாக மாறிவிடும். ஸ்டாலின் தன்னை டெல்டாகாரன் என்று அழைக்கிறார். ஆனால், அவர் விவசாயிகளுக்கு நன்மை செய்பவரா? இல்லை, விவசாயிகளின் விரோதியே ஸ்டாலின்” என்று குற்றம் சுமத்தினார்.

இந்தப் பிரசாரத்தில் அதிமுகவின் பாரம்பரிய வலிமை, மக்கள் நலன் சார்ந்த கொள்கைகள் மற்றும் எதிர்க்கட்சியின் குறைபாடுகளை எடப்பாடி பழனிசாமி வலியுறுத்தினார். தமிழகத்தின் விவசாயம் மற்றும் நீர் பாதுகாப்பு போன்ற முக்கிய பிரச்னைகளில் அதிமுகவின் உறுதியான நிலைப்பாட்டை மக்களுக்கு நினைவூட்டினார்.

இதையும் படிங்க: அதிமுக வென்றால் 6 மாதத்தில் ஆட்சியை கலைப்பார்கள்! பாஜகவின் 'புது ஆட்டம்' குறித்து திருமாவளவன்  எச்சரிக்கை!