தமிழகத்தில் பாரதிய ஜனதா கட்சியின் அமைப்பு வலிமையை அதிகரிக்கும் நோக்கில், மத்திய உள்துறை அமைச்சர் அமித் ஷா நேரடியாக களமிறங்க உள்ளதாக தகவல்கள் வெளியாகியுள்ளன. வரும் நாடாளுமன்றத் தேர்தலை முன்னிட்டு தமிழகத்தில் கட்சியின் அடித்தளத்தை பலப்படுத்தும் நடவடிக்கைகள் தீவிரப்படுத்தப்பட்டுள்ளதாக பா.ஜ.க. வட்டாரங்கள் தெரிவிக்கின்றன.

மேற்கு வங்கத்தில் கட்சியின் அரசியல் வளர்ச்சிக்கு பிறகு, தமிழக அரசியலிலும் கூடுதல் கவனம் செலுத்தும் திட்டத்தை பா.ஜ.க. தேசிய தலைமையகம் வகுத்துள்ளதாக கூறப்படுகிறது. குறிப்பாக அடுத்த மக்களவைத் தேர்தலுக்கு இன்னும் கால அவகாசம் உள்ள நிலையில், மாநிலம் முழுவதும் கட்சி அமைப்பை வலுப்படுத்தும் முயற்சியில் அமித் ஷா நேரடியாக பங்கேற்க இருப்பதாக தகவல்கள் தெரிவிக்கின்றன.

இதன் முதல் கட்டமாக அடுத்த மாதம் இரண்டாவது வாரத்தில் அவர் சென்னை வருகை தர திட்டமிட்டுள்ளதாக கூறப்படுகிறது. இந்த பயணத்தின் போது தமிழக பா.ஜ.க. மாநில நிர்வாகிகள், மையக்குழு உறுப்பினர்கள் மற்றும் மாவட்ட தலைவர்களுடன் ஆலோசனை கூட்டங்களில் பங்கேற்க உள்ளதாக தகவல் வெளியாகியுள்ளது. கட்சியின் எதிர்கால செயல்திட்டங்கள், உறுப்பினர் சேர்க்கை இயக்கம் மற்றும் தேர்தல் முன்னேற்பாடுகள் குறித்து விரிவாக ஆலோசிக்கப்படலாம் என எதிர்பார்க்கப்படுகிறது.

இதையும் படிங்க: முக்கிய துறைகளை குறி வைக்கும் பாஜக! இலாகா ஒதுக்குவதில் நீடிக்கும் இழுபறி! புதுவை அரசியலில் புயல்!

அதனைத் தொடர்ந்து, இரண்டு மாதங்களுக்கு ஒருமுறை தமிழகத்தின் பல்வேறு பகுதிகளுக்கு அமித் ஷா பயணம் மேற்கொள்ளும் திட்டமும் பரிசீலனையில் இருப்பதாக கூறப்படுகிறது. சென்னை, கோயம்புத்தூர், ராமநாதபுரம் மற்றும் கன்னியாகுமரி உள்ளிட்ட முக்கிய பகுதிகளில் நடைபெறும் கூட்டங்களில் பங்கேற்று, பூத் கமிட்டி நிர்வாகிகளுடன் நேரடியாக கலந்துரையாட உள்ளதாக தகவல்கள் தெரிவிக்கின்றன.

இதற்கிடையில், மாநில பா.ஜ.க. தலைவர் நயினார் நாகேந்திரன் தலைமையில் கட்சி நிர்வாகிகள் பல்வேறு துறைகளில் செல்வாக்கு மிக்க நபர்களை சந்தித்து வருகின்றனர். பிரதமர் நரேந்திர மோடி தலைமையிலான மத்திய அரசின் கடந்த 12 ஆண்டுகால சாதனைகள் குறித்த தகவல்களை அவர்களிடம் எடுத்துரைக்கும் பணிகளும் நடைபெற்று வருகின்றன.

இந்த நிலையில், தமிழகத்திற்கு வருகை தரும் அமித் ஷா, சமூக, தொழில், கல்வி மற்றும் பல்வேறு துறைகளைச் சேர்ந்த முக்கிய பிரமுகர்களையும் நேரில் சந்தித்து கருத்துகளை கேட்டறிய உள்ளதாக கூறப்படுகிறது. இதன் மூலம் தமிழகத்தில் பா.ஜ.க.வின் அரசியல் செல்வாக்கை மேலும் விரிவுபடுத்தும் முயற்சி மேற்கொள்ளப்படுவதாக அரசியல் வட்டாரங்கள் மதிப்பிடுகின்றன.

இதையும் படிங்க: இந்தியாவின் பாதுகாப்பில் அமெரிக்கா உறுதி! உள்துறை அமைச்சர் அமித்ஷா உடன் US தூதர் சந்திப்பு!