தமிழக சட்டமன்றத் தேர்தலில் நாம் தமிழர் கட்சியின் (நா.த.க.) ஓட்டு சதவீதம் கணிசமாகக் குறைந்துள்ளது. விஜய் மற்றும் தவெக-வுக்கு எதிராக தீவிர பிரசாரம் செய்ததே இந்தப் பின்னடைவுக்கு முக்கிய காரணம் எனக் கூறப்படுகிறது.

நா.த.க. தலைமை ஒருங்கிணைப்பாளர் சீமான் 2016-ல் அரசியலுக்கு வந்ததில் இருந்து தனித்துப் போட்டியிட்டு வருகிறார். 2016 சட்டமன்றத் தேர்தலில் 1.10 சதவீதம் மட்டுமே பெற்ற அக்கட்சி, படிப்படியாக வளர்ந்து 2024 லோக்சபா தேர்தலில் 8.22 சதவீதம் ஓட்டுகளைப் பெற்று அங்கீகரிக்கப்பட்ட கட்சியாக உருவெடுத்தது. ஆனால் இந்த சட்டமன்றத் தேர்தலில் ஓட்டு சதவீதம் 4 சதவீதமாகக் குறைந்துள்ளது. பல தொகுதிகளில் கட்சி வேட்பாளர்கள் டெபாசிட் இழந்துள்ளனர்.

புதிதாக உருவான தவெக மற்றும் அதன் தலைவர் விஜய்யை ஆரம்பம் முதலே நா.த.க. தரப்பு கடுமையாக விமர்சித்து வந்தது. சீமான் பிரசார மேடைகளில் விஜய்யை நேரடியாகத் தாக்கிப் பேசினார்.

இதையும் படிங்க: ஒரு ஓட்டு வித்தியாசத்தில் வெற்றியா? தமிழகத்தில் குறைந்த, அதிக ஓட்டு வித்தியாசத்தில் வெற்றி பெற்றவர்கள் லிஸ்ட்!

அக்கட்சியின் நிர்வாகி துரைமுருகன் ‘சாட்டை’ யூடியூப் சேனல் மூலம் தவெக-வை தொடர்ந்து குறிவைத்தார். இந்த எதிர்மறைப் பிரசாரம் தவெக தொண்டர்கள் மற்றும் விஜய் ரசிகர்களிடையே பெரும் அதிருப்தியை ஏற்படுத்தியது. இதன் விளைவாக நா.த.க.க்கு எதிரான எதிர்வினை வாக்குகளாக மாறியது.

காரைக்குடி தொகுதியில் சீமான் தானே போட்டியிட்டார். நான்கு முனை போட்டி நிலவிய இந்தத் தொகுதியில் தவெக வேட்பாளர் டாக்டர் பிரபு 1,01,358 ஓட்டுகளுடன் 46,074 ஓட்டுகள் வித்தியாசத்தில் வெற்றி பெற்றார். சீமான் 30,793 ஓட்டுகளுடன் நான்காவது இடத்துக்கு தள்ளப்பட்டு டெபாசிட் இழந்தார்.

முன்பு மூன்றாவது பெரிய கட்சியாக இருந்த நா.த.க. இப்போது அந்த அந்தஸ்தை இழந்துள்ளது. விஜய் மற்றும் தவெக-வுக்கு எதிரான தீவிர எதிர்ப்பு பிரசாரம் தங்களுக்கே பின்னடைவை ஏற்படுத்தியதாக அரசியல் பார்வையாளர்கள் கருதுகின்றனர். 

இந்தத் தேர்தல் முடிவு நா.த.க. தலைமைக்கு பெரும் சவாலாக அமைந்துள்ளது. எதிர்கால அரசியல் உத்திகளை மறுபரிசீலனை செய்ய வேண்டிய நிலைக்கு கட்சி தள்ளப்பட்டுள்ளது.

இதையும் படிங்க: அதிமுக கூட்டணியின் பெரிய தலைக்கே ஆப்பு வைத்த சசிகலா!! நயினார் நாகேந்திரன் தோற்க காரணம் யார் தெரியுமா?