தமிழக சட்டமன்றத்தில் பரந்தூர் விமான நிலைய விவகாரம் மீண்டும் ஒரு பெரும் காரசார விவாதத்தை ஏற்படுத்தியது. முந்தைய தினம் முதலமைச்சர் விஜய் விதி 110-ன் கீழ் அந்தத் திட்டத்தை கைவிடுவதாக அறிவித்ததைத் தொடர்ந்து, அடுத்த நாள் மானியக் கோரிக்கை விவாதத்தின் போது ஆளும் தமிழக வெற்றிக் கழகத்தினரும் எதிர்க்கட்சியான திமுகவினரும் மாறி மாறி குற்றச்சாட்டுகளை முன்வைத்து அவையைக் கொந்தளிப்பாக்கினர்.முந்தைய திமுக ஆட்சியில் சென்னைக்கு இரண்டாவது பசுமை விமான நிலையம் அமைக்க காஞ்சிபுரம் மாவட்டம் பரந்தூர் மற்றும் அதைச் சுற்றியுள்ள பதின்மூன்று கிராமங்களில் சுமார் ஐயாயிரத்து எழுநூறு ஏக்கர் நிலம் தேர்வு செய்யப்பட்டிருந்தது.

மத்திய அரசின் கொள்கை ஒப்புதலும் கிடைத்திருந்தது. ஆனால் உள்ளூர் விவசாயிகளும் குடியிருப்பாளர்களும் விளைநிலங்கள், நீர்நிலைகள் பாதிக்கப்படும், வாழ்வாதாரம் அழியும் என்று நீண்ட நாட்களாகப் போராடி வந்தனர். தேர்தலுக்கு முன்பே அந்தப் போராட்டத்தில் கலந்துகொண்ட விஜய், ஆட்சிக்கு வந்த பிறகு தனது வாக்குறுதியை நிறைவேற்றித் திட்டத்தைக் கைவிடுவதாக அறிவித்தார். மாற்று இடம் தேர்வு செய்யப்படும், மீனம்பாக்கம் விமான நிலையமும் விரிவாக்கம் செய்யப்படும் என்றும் கூறினார். இந்த அறிவிப்புக்குப் பரந்தூர் பகுதி மக்கள் பெரும் கொண்டாட்டம் நடத்தினர்.

ஆனால் திமுக தரப்பு இது தமிழகத்தின் தொழில் வளர்ச்சியைப் பின்னோக்கி இழுக்கும் முடிவு என்று கடுமையாக விமர்சித்தது.அவைக்குள் நடைபெற்ற விவாதத்தில் திமுக உறுப்பினர்கள் பரந்தூர் திட்டத்தை ரத்து செய்ததால் முதலீட்டாளர்கள் விலகிவிடுவார்கள், தொழில் வளர்ச்சி பாதிக்கப்படும் என்று குற்றம் சாட்டினர். ஆளும் கட்சி அமைச்சர் ஆதவ் அர்ஜூனா பதிலளிக்கையில், விமான நிலையமா அல்லது விவசாயிகளின் கண்ணீரா என்றால் முதலமைச்சர் விஜய் விவசாயிகள் பக்கம்தான் நிற்பார் என்று உறுதியாகக் கூறினார். ஏரிகளையும் விவசாய நிலங்களையும் பாதுகாப்பதற்காகவே திட்டம் கைவிடப்பட்டதாக அவர் விளக்கினார். ஊழலற்ற ஆட்சியால் ஐந்தாண்டுகளில் பொருளாதாரம் பல மடங்கு வளரும் என்றும் அவர் வாதிட்டார்.அதிமுக தரப்பில் எடப்பாடி பழனிசாமி கையகப்படுத்தப்பட்ட நிலங்களை என்ன செய்யப்போகிறீர்கள் என்று கேள்வி எழுப்பினார். இதற்குச் சட்ட அமைச்சர் நிர்மல்குமார் பதிலளிக்கையில், மொத்தம் தேவைப்பட்ட நிலத்தில் தொண்ணூறு சதவீதம் கையகப்படுத்தப்பட்டதாகச் சொல்லப்படுவது உண்மையல்ல, சுமார் ஆயிரத்து எழுநூறு ஏக்கர் அளவுக்குத்தான் கையகப்படுத்தப்பட்டுள்ளது என்று தெரிவித்தார்.

இதையும் படிங்க: இஸ்லாமியர்களை தீவிரவாதிகள் என அழைப்பதா..? பேரவையில் கண்ணீர் விட்ட எம்எல்ஏ பக்ருதீன்.!!

அதேநேரம் பரந்தூர் பகுதியில் திட்ட அறிக்கை வெளியாகும் முன்பே பெரும் அளவில் நிலங்களை வாங்கிக் குவித்தவர்கள், கருப்புப் பணம் சேர்த்தவர்கள் தான் திட்டத்தை எதிர்க்கின்றனர் என்றும், ஜி ஸ்கொயர் மாப்பிள்ளைக்காக அப்படி நிலம் வாங்கப்பட்டது என்றும் அவர் குறிப்பிட்டார். இந்தக் குறிப்பு அவையில் சலசலப்பை ஏற்படுத்தியது.திமுக உறுப்பினர் தங்கம் தென்னரசு உடனடியாக எதிர்வினையாற்றினார். ஜி ஸ்கொயர் மாப்பிள்ளை என்று நீங்கள் சொல்கிறீர்கள் என்றால், வேறு எந்த லாட்டரி மருமகனுக்காகப் புதிய விமான நிலையம் அமைக்க இருக்கிறீர்கள் என்று நான் கேட்கட்டுமா என்று கேட்டார். அதே நாணயத்தில் நாங்களும் பதிலடி கொடுக்க முடியும் என்றும் அவர் சேர்த்துக் கொண்டார். இந்தப் பதிலடி அவையில் மேலும் கொந்தளிப்பை உருவாக்கியது.

ஆளும் தரப்பும் எதிர்க்கட்சி தரப்பும் ஒருவரையொருவர் தனிப்பட்ட குறிப்புகளால் தாக்கும் நிலை உருவானது.தங்கம் தென்னரசு தொடர்ந்து பேசுகையில், பல இடங்களை ஆய்வு செய்த பின்பே பரந்தூர் தேர்வு செய்யப்பட்டது, எந்த இடத்தில் அமைத்தாலும் விவசாய நிலங்கள் இருக்கும், மக்களை இடமாற்றம் செய்யாமல் நிலம் கையகப்படுத்த முடியாது என்று வாதிட்டார். அமைச்சர் கீர்த்தனா தரப்பில் கையகப்படுத்தப்பட்ட நிலங்களை மக்களைப் பாதிக்காத வகையில் பயன்படுத்தும் திட்டங்கள் கொண்டு வரப்படும் என்றும், மத்திய அரசு அனுமதி இருந்தும் முந்தைய ஆட்சி மீனம்பாக்கம் விமான நிலையத்தை விரிவாக்கம் செய்யவில்லை என்றும் குற்றம் சாட்டினார்.இவ்வாறு பரந்தூர் விமான நிலைய விவகாரம் சட்டமன்றத்தில் ஆளும் கட்சிக்கும் எதிர்க்கட்சிக்கும் இடையே கடுமையான கருத்து மோதலாக உருவெடுத்தது.

இதையும் படிங்க: சட்டப்பேரவையில் இபிஎஸ் ஆவேசம்.. பொறுமையா பேசுங்க.. சபாநாயகர் அறிவுறுத்தல்.!