செயற்கை நுண்ணறிவு எனப்படும் ஏஐ தொழில்நுட்பம் நாளுக்கு நாள் வேகமாக வளர்ந்து வருகிறது. மனிதர்கள் செய்யும் பல்வேறு பணிகளை குறைந்த நேரத்தில் செய்து முடிப்பது, மருத்துவம், கல்வி, அறிவியல் உள்ளிட்ட துறைகளில் புதிய வாய்ப்புகளை உருவாக்குவது என ஏஐ பல்வேறு மாற்றங்களை ஏற்படுத்தி வருகிறது. அதே நேரத்தில், இந்த தொழில்நுட்பத்தை தவறான நோக்கத்துடன் பயன்படுத்தினால் மிகப்பெரிய ஆபத்துகள் ஏற்படலாம் என்ற எச்சரிக்கைகளும் அதிகரித்து வருகின்றன.

இந்த சூழலில், மைக்ரோசாப்ட் இணை நிறுவனர் பில்கேட்ஸ் ஏஐ தொடர்பாக வெளியிட்டுள்ள புதிய எச்சரிக்கை உலகளவில் கவனம் பெற்றுள்ளது. அமெரிக்காவின் NBC செய்தி நிறுவனத்தின் ‘Meet the Press’ நிகழ்ச்சிக்காக அளித்த பேட்டியில், ஏஐ தொழில்நுட்பம் 100 கோடி உயிரிழப்புகளை ஏற்படுத்தக்கூடிய நிகழ்வுகளை உருவாக்கும் அளவுக்கு சக்திவாய்ந்ததாக இருக்கலாம் என்று அவர் தெரிவித்துள்ளார்.

குறிப்பாக, மேம்பட்ட ஏஐ கருவிகளை தீய நோக்கம் கொண்டவர்கள் பயன்படுத்தும்போது அதன் விளைவுகள் மிகவும் கடுமையாக இருக்கலாம் என்று பில்கேட்ஸ் எச்சரித்துள்ளார். இதுபோன்ற சூழ்நிலையில் ஏஐ தொழில்நுட்பத்தை உருவாக்கும் நிறுவனங்கள் தங்களுக்குள் விதிகளை அமைத்துக்கொள்வது மட்டும் போதாது என்றும் அவர் கூறியுள்ளார்.

இதையும் படிங்க: ஏஐ.யை ஆயுதமாக்காதீங்க! தொழில்நுட்பத்தை ஆயுதமாக்கினால் முன்னேற்றம் பாதிக்கும்! பிரிக்ஸ் மேடையில் மோடி அதிரடி!

அரசுகள் மற்றும் சட்ட அமலாக்க அமைப்புகளும் இந்த விவகாரத்தில் தலையிட்டு பாதுகாப்பு விதிமுறைகளையும் கண்காணிப்பு நடைமுறைகளையும் கட்டாயப்படுத்த வேண்டும் என வலியுறுத்தியுள்ளார்.

ஏஐயின் வேகமான வளர்ச்சி வேலைவாய்ப்புகள், இணையப் பாதுகாப்பு உள்ளிட்ட பல துறைகளில் ஏற்படுத்தக்கூடிய பாதிப்புகள் குறித்தும் பில்கேட்ஸ் ஏற்கனவே கவலை தெரிவித்துள்ளார். உலக அரசுகள் ஏஐ ஏற்படுத்தக்கூடிய மாற்றங்களுக்கு போதுமான அளவில் தயாராகவில்லை என்றும் அவர் சமீபத்தில் கூறியிருந்தார்.

அதே நேரத்தில், ஏஐ தொழில்நுட்பம் மனிதர்களுக்கு மிகப்பெரிய நன்மைகளையும் வழங்கக்கூடியது என்றும் பில்கேட்ஸ் தொடர்ந்து வலியுறுத்தி வருகிறார். குறிப்பாக சுகாதாரம், கல்வி, விவசாயம் போன்ற துறைகளில் ஏஐயின் பயன்பாட்டை விரிவுபடுத்துவதற்காக கேட்ஸ் அறக்கட்டளை அடுத்த இரண்டு ஆண்டுகளில் 100 கோடி டாலர் முதலீடு செய்ய திட்டமிட்டுள்ளது.

இதனால் ஏஐ வளர்ச்சியை தடுக்காமல், அதன் ஆபத்துகளை கட்டுப்படுத்தும் வகையில் கடுமையான பாதுகாப்பு விதிமுறைகளை உருவாக்க வேண்டும் என்ற விவாதம் தற்போது உலக அளவில் தீவிரமடைந்துள்ளது.

இதையும் படிங்க: ஓடும் ரெயிலில் பயணிகளை தள்ளி கொன்ற ‘சைக்கோ கில்லர்’! போலி போலீசாக நடித்து வந்தவர் கைது!!