மத்திய அரசின் முக்கிய திட்டங்கள் மற்றும் அரசாணைகளை மக்கள் தங்கள் தாய்மொழியில் நேரடியாக அறிந்துகொள்ளும் வகையில் ஒரு வரலாற்றுச் சிறப்புமிக்க நடவடிக்கையை மத்திய வீட்டு வசதி மற்றும் நகர்ப்புற விவகாரங்கள் அமைச்சகம் எடுத்துள்ளது. இதுவரை ஆங்கிலம் மற்றும் இந்தி மொழிகளில் மட்டுமே இயங்கி வந்த இந்த அமைச்சகத்தின் அதிகாரப்பூர்வ இணையதளம் தற்போது தமிழ் உள்ளிட்ட 22 இந்திய மொழிகளில் கிடைக்கும் வசதியைப் பெற்றுள்ளது.
இந்த மாற்றம் நாடு முழுவதும் உள்ள பொதுமக்கள், குறிப்பாக இந்தி பேசாத மாநிலங்களைச் சேர்ந்தவர்கள், மாநில அரசுகள் மற்றும் உள்ளாட்சி அமைப்புகளுக்கு பெரும் நிவாரணமாக அமையும் என்று எதிர்பார்க்கப்படுகிறது. முன்பு இணையதளத்தின் முகப்புப் பக்கத்தில் வலது மேல் மூலையில் மொழி மாற்றி (Language Toggle) வசதி இருந்தாலும், முக்கிய அரசாணைகள், வழிகாட்டி நெறிமுறைகள், சுற்றறிக்கைகள், திட்ட விவரங்கள் போன்ற ஆவணங்கள் பெரும்பாலும் ஆங்கிலத்தில் மட்டுமே பதிவேற்றம் செய்யப்பட்டிருந்தன. இதனால் தமிழ்நாடு உள்ளிட்ட பல மாநிலங்கள் தங்கள் சொந்த மொழியில் தகவல்களைப் பெற முடியாமல் சிரமப்பட்டன.
இந்நிலையில், தேசிய மொழிபெயர்ப்பு இயக்ககத்தின் (National Translation Mission) அதிநவீன AI தொழில்நுட்பமான பாஷினி (Bhashini) மூலம் இந்த மொழிப் பல்வகைமை சாத்தியமாகியுள்ளது. தமிழ், தெலுங்கு, கன்னடம், மலையாளம், பெங்காலி, மராத்தி உள்ளிட்ட பிராந்திய மொழிகள் மட்டுமின்றி, சமஸ்கிருதம், உருது, நேபாளி உள்ளிட்ட மொழிகளிலும் இணையதளத்தை முழுமையாகப் பார்வையிட முடியும். இந்த வசதி மக்களுக்கு மட்டுமல்ல, மாநில வீட்டு வசதி வாரியங்கள், நகர்ப்புற உள்ளாட்சி அமைப்புகள் மற்றும் பல்வேறு அரசுத் துறை அதிகாரிகளுக்கும் பெரிதும் உதவியாக இருக்கும்.
இதையும் படிங்க: யு.பி.ஐ. பரிவர்த்தனைகளுக்கு புதிய கட்டணம்..?? மத்திய அரசு ஆலோசனை..!!
இந்த நடவடிக்கைக்குப் பின்னணியில் பல்வேறு மாநிலங்களில் இருந்து, குறிப்பாக சென்னை உள்ளிட்ட இடங்களில் இருந்து வந்த தொடர் கோரிக்கைகளும், ஆட்சேபங்களும் முக்கியப் பங்கு வகித்துள்ளன. “மத்திய அரசின் திட்டங்களைப் புரிந்துகொள்ள மக்கள் ஆங்கிலம் அல்லது இந்தி தெரிந்திருக்க வேண்டும் என்பது அநீதி” என்ற குரல்கள் வலுத்தன. இந்தக் கோரிக்கைகளுக்கு செவி சாய்த்த மத்திய அரசு, இப்போது இந்த மாற்றத்தை நடைமுறைப்படுத்தியுள்ளது.
இந்த முயற்சி வெற்றிகரமாக அமைந்தால், வீட்டு வசதி அமைச்சகத்தைத் தொடர்ந்து பிற மத்திய அமைச்சகங்களின் இணையதளங்களும் 22 மொழிகளில் கிடைக்கும் வாய்ப்பு உள்ளது. இதன்மூலம் ‘ஒரே நாடு - ஒரே மொழி வசதி’ என்ற கோட்பாட்டை நடைமுறைப்படுத்தி, சாதாரண பாமர மக்களும் மத்திய அரசின் நலத்திட்டங்கள், பிரதம மந்திரி ஆவாஸ் யோஜனா, அம்ருத் மிஷன், ஸ்மார்ட் சிட்டீஸ் போன்ற திட்டங்களை தங்கள் தாய்மொழியில் புரிந்துகொண்டு பயன்பெற முடியும்.
இந்த மொழிப் பன்மை நடவடிக்கை இந்திய அரசியலமைப்பின் மொழி உரிமைகளைப் பாதுகாக்கும் முக்கிய அங்கமாகவும், டிஜிட்டல் இந்தியா இலக்கை நோக்கிய மற்றொரு படியாகவும் பார்க்கப்படுகிறது.
இதையும் படிங்க: பைக் டாக்ஸியை தடை செய்! கோவையில் சிஐடியு ஆட்டோ தொழிலாளர்கள் ஆர்ப்பாட்டம்!