சென்னை சர்வதேச விமான நிலையத்தின் உள்நாட்டு முனையமான டெர்மினல் 1-ல் வந்து இறங்கும் பல்லாயிரக்கணக்கான பயணிகள் நீண்ட தூரம் நடக்காமல், வாடகை கார்கள் மற்றும் பிற வாகனங்களை மிக எளிதாக அணுகிப் பயணிக்கும் வகையில், ரூ.22.88 கோடி மதிப்பீட்டில் அதிநவீன உள்கட்டமைப்புடன் உருவாக்கப்பட்டுள்ள பிக்கப் பாயிண்ட் பிளாசா வசதியை மத்திய விமானப் போக்குவரத்துத்துறை அமைச்சர் ராம்மோகன் நாயுடு இன்று (செப்டம்பர் 13) காணொலிக் காட்சி வாயிலாக முறைப்படி திறந்து வைத்தார்.
சென்னை விமான நிலையத்தின் டெர்மினல் 1-க்கு முன்பகுதியில் தரைத்தளத்தில் இந்த பிக்கப் பிளாசா கட்டமைக்கப்பட்டுள்ளது. விமான நிலையத்தின் முகப்புப் பகுதியில் தொடர்ந்து நிலவி வந்த கடுமையான வாகன நெரிசலைக் குறைக்கவும், பயணிகளை ஏற்றிச் செல்லும் டாக்சிகள் மற்றும் தனியார் வாகனங்களின் இயக்கத்தை முறையாக ஒழுங்குபடுத்தவும் இத்திட்டம் கடந்த 2023-ஆம் ஆண்டு செப்டம்பர் மாதம் தொடங்கப்பட்டது. 2024 அக்டோபருக்குள் பணிகளை முடிக்கத் திட்டமிடப்பட்டிருந்த போதிலும், நிர்வாகக் காரணங்களால் தாமதமாகி இந்த ஆண்டு ஜனவரியில் பணிகள் முழுமையடைந்தன. இதனையடுத்து, மத்திய அரசின் அனைத்து அனுமதிகளும் பெறப்பட்டு இன்று முதல் மக்கள் பயன்பாட்டிற்கு இது அர்ப்பணிக்கப்பட்டுள்ளது.
டெர்மினல் 1 நுழைவு வாயிலிலிருந்து வெறும் 30 மீட்டர் தொலைவில் அமைந்துள்ள இந்த நவீன பிளாசாவில், தலா 7 மீட்டர் அகலம் கொண்ட 3 தனித்தனி பிரத்யேகப் போக்குவரத்து வழித்தடங்கள் அமைக்கப்பட்டுள்ளன. இதில் லேன் 'ஏ' மற்றும் லேன் 'பி' ஆகிய இரண்டும் பயணிகளை ஏற்றிச் செல்லும் வாகனங்களுக்காகவும், லேன் 'சி' வாகனங்கள் தடையின்றி வெளியேறும் வழித்தடமாகவும் மாற்றப்பட்டுள்ளன. மேலும், வாகனங்கள் நெரிசலின்றித் திரும்பிச் செல்ல யூ-டர்ன் வசதியும் செய்யப்பட்டுள்ளது. லேன் ஏ மற்றும் பி ஆகிய இரண்டு வழித்தடங்களிலும் ஒரே நேரத்தில் சுமார் 28 வாகனங்களை நிறுத்திப் பயணிகளை உடனடியாக ஏற்றிச் செல்ல முடியும் என்பதால், முனையத்தின் முன்பகுதியில் வாகனங்கள் நீண்ட நேரம் அணிவகுத்து நிற்பது முற்றிலுமாகத் தவிர்க்கப்படும்.
இதையும் படிங்க: சுங்கத்துறையிடம் வசமாக சிக்கிய தங்க பசை! கடத்தல் பயணி தப்பியோட்டம்! சென்னை ஏர்போர்ட்டில் பரபரப்பு!
தொடக்கக் கட்டமாக, உபேர், ஓலா, ரேபிடோ, பாஸ்ட்ராக், ரெட் டாக்சி, டபிள்யூ.டி.ஐ மற்றும் முன்கூட்டியே பதிவு செய்யப்படும் ப்ரீபெய்ட் டாக்சி உள்ளிட்ட முன்னணி நிறுவனங்களின் வாடகை கார்கள் இந்த பிக்கப் பிளாசாவைப் பயன்படுத்த அனுமதிக்கப்பட்டுள்ளன. புதிய நடைமுறைகள் சீரமைக்கப்பட்ட பின்னர், சாதாரண மஞ்சள் நிற பதிவு பலகை கொண்ட பாரம்பரிய டாக்சிகளையும் அனுமதிக்க நடவடிக்கை எடுக்கப்பட்டு வருகிறது. மேலும், பிளாசா வளாகத்தில் ஒரே நேரத்தில் 150 பயணிகள் அமரும் வகையில் சொகுசு இருக்கைகள், சுத்திகரிக்கப்பட்ட குடிநீர் வசதி மற்றும் விமானங்களின் வருகை-புறப்பாடு விவரங்களை உடனுக்குடன் அறிய உதவும் டிஜிட்டல் தகவல் திரைகளும் நிறுவப்பட்டுள்ளன.
பிக்கப் பிளாசாவைத் திறந்து வைத்து உரையாற்றிய மத்திய அமைச்சர் ராம்மோகன் நாயுடு, "ஒரு நகரத்திற்கு வரும் பயணிகளுக்கும், அங்கிருந்து புறப்படுபவர்களுக்கும் விமான நிலையமே முதல் மற்றும் இறுதித் தொடர்புப் புள்ளியாகும். பயணிகளின் சிரமத்தைக் குறைக்கும் வகையில் சென்னை விமான நிலையம் அதிநவீன எதிர்காலத் தேவைகளுக்கு ஏற்பத் தயாராகி வருகிறது. டெர்மினல் 4 முதல் மல்டிலெவல் பார்க்கிங் வரை ஒளிரும் தகவல் பலகைகள், 105 பயணிகள் வழிகாட்டும் உதவியாளர்கள், கூடுதலாக 20 'மே ஐ ஹெல்ப் யூ' பணியாளர்கள், முனையங்களுக்கு இடையே பயணிக்க 15 பேட்டரி கார்கள் மற்றும் பாதுகாப்பு சோதனைக்குப் பிந்தைய பயன்பாட்டிற்கு 100 நவீன தள்ளுவண்டிகள் வழங்கப்பட்டுள்ளன. மேலும், 124 'டிஜி பட்டீஸ்' உதவியால் சென்னை விமான நிலையத்தில் டிஜி யாத்ரா பயன்பாடு 12 சதவீதத்திலிருந்து 35 சதவீதமாக உயர்ந்துள்ளதுடன், அவசர மருத்துவ உதவிக்காக 13 தானியங்கி ஏ.இ.டி கருவிகளும் பொருத்தப்பட்டுள்ளன" என்று பெருமிதத்துடன் குறிப்பிட்டார்.
இதுகுறித்துச் செய்தியாளர்களிடம் பேசிய சென்னை விமான நிலைய இயக்குநர் ராதாகிருஷ்ணன், டெர்மினல் 1-ல் இருந்து டாக்சியைப் பிடிப்பதற்காக இதுவரை பயணிகள் சுமார் 600 மீட்டர் தூரம் வரை தங்களது கனரக உடைமைகளுடன் மல்டிலெவல் பார்க்கிங் பகுதிக்கு நடந்து செல்ல வேண்டிய கட்டாயம் இருந்தது. தற்போது டெர்மினல் வாசலிலிருந்து வெறும் 30 மீட்டரிலேயே பிக்கப் பிளாசா அமைக்கப்பட்டுள்ளதால், முதியவர்கள், மாற்றுத்திறனாளிகள், கர்ப்பிணிகள் மற்றும் பச்சிளம் குழந்தைகளுடன் வரும் பயணிகளுக்கு இது ஒரு வரப்பிரசாதமாக அமையும். இதன்மூலம் தினசரி சுமார் 5,000 மஞ்சள் நிற போர்டு கொண்ட வாடகை கார்களைக் கையாள முடியும் என்று மகிழ்ச்சியுடன் தெரிவித்தார்.
இதையும் படிங்க: வீல் சேரில் வந்து போதைப்பொருள் கடத்தல்! சென்னை விமான நிலையத்தில் ரூ.3 கோடி மதிப்பிலான கஞ்சா பறிமுதல்!