தமிழ்நாட்டிற்கு நீட் தேர்வு வேண்டாம் என்பதில் அரசு உறுதியாக உள்ளது என்றும், அதை எந்தக் காலத்திலும் அனுமதிக்க மாட்டோம் என்றும் நிதியமைச்சர் மரிய வில்சன் தெரிவித்துள்ளார். சென்னை ஆர்.கே. நகர் தொகுதிக்குட்பட்ட வ.உ.சி நகரில், மக்களுக்கான அடிப்படைச் சிக்கல்களைத் தீர்க்கும் வகையில் சிறப்பு முகாம் சென்னை மாவட்ட ஆட்சியர் மாலதி ஹெலன் முன்னிலையில் நடைபெற்றது. இம்முகாமில் பட்டா மாறுதல், புதிய ரேஷன் கார்டு, சான்றிதழ்கள் என 1,500-க்கும் மேற்பட்ட பொதுமக்கள் விண்ணப்பித்திருந்த நிலையில், 160 பயனாளிகளுக்கு உடனடித் தீர்வாகச் சான்றிதழ்களை அமைச்சர் மரிய வில்சன் வழங்கினார்.

செய்தியாளர்களைச் சந்தித்த அமைச்சர் மரிய வில்சன் பேசுகையில், தமிழ்நாட்டிற்கு நீட் தேர்வு வேண்டாம் என்பதில் மிகவும் உறுதியாக இருக்கிறோம்; இதில் மாற்றுக்கருத்துக்கே இடமில்லை. அதேபோல் மாநிலத்தில் மின் தட்டுப்பாடு இருப்பதாகத் தெரியவில்லை; இருப்பினும் துறை சார்ந்த அமைச்சரிடம் பேசி நேரில் ஆய்வு செய்துவிட்டுத் தெரிவிக்கிறேன் எனக் கூறினார்.

தொடர்ந்து பட்ஜெட் குறித்துப் பேசிய அவர், முதலமைச்சர் கடந்த 15 நாட்களாகத் தினமும் 6 முதல் 7 மணி நேரம் வரை அனைத்துத் துறைகள் குறித்தும் விரிவான ஆலோசனைகளில் ஈடுபட்டு வருவதாகவும், ஆகஸ்ட் 5 வரை பொறுத்திருந்து பார்த்தால் பட்ஜெட்டில் மக்களுக்குப் பயனுள்ள சிறந்த அறிவிப்புகள் இடம்பெறும் என்றும் தெரிவித்தார்.

இதையும் படிங்க: கடந்த ஆட்சி கால முறைகேடுகள் குறித்து முதலமைச்சர் ஆய்வு செய்து முடிவெடுப்பார்: நிதி அமைச்சர் மரிய வில்சன்!

மேலும், முதலமைச்சரைத் தரக்குறைவாகப் பேசும் திமுக மூத்த நிர்வாகிகளின் கீழ்த்தரமான அரசியலை இன்றைய ஜென் ஜி தலைமுறை மற்றும் படித்த இளைஞர்கள் ஏற்றுக்கொள்ள மாட்டார்கள் என்றும், வரவிருக்கும் உள்ளாட்சி மற்றும் இடைத்தேர்தல்களில் மக்கள் அவர்களுக்குத் தகுந்த பாடம் கற்பிப்பார்கள் என்றும் விமர்சித்தார். ஆந்திராவில் சிறைபிடிக்கப்பட்டுள்ள காசிமேடு மீனவர்களை மீட்க ஆந்திர அதிகாரிகளுடன் பேசி வருவதாகவும் விரைவில் நல்ல தீர்வு கிடைக்கும் என்றும் உறுதியளித்தார்.

இதையும் படிங்க: வெள்ளை அறிக்கையால் எதிர்க்கட்சியினர் கடுமையாகப் பாதிக்கப்பட்டுள்ளனர் - நிதி அமைச்சர் மரிய வில்சன் அதிரடி!