சென்னை புறநகர் பகுதியான படப்பையை அடுத்த கரசங்கால் பகுதியில், காவல்துறையினரை கத்தியால் தாக்கிவிட்டு தப்ப முயன்றதாகக் கூறப்படும் ரவுடி சதாம் உசேனை போலீசார் துப்பாக்கியால் சுட்டுப்பிடித்துள்ளனர்.

காவல்துறையினர் மேற்கொண்ட நடவடிக்கையின்போது சதாம் உசேனின் இடது காலில் குண்டு பாய்ந்ததாகவும், காயமடைந்த அவர் சென்னை ராஜீவ்காந்தி அரசு பொது மருத்துவமனையில் சிகிச்சைக்காக அனுமதிக்கப்பட்டுள்ளதாகவும் தெரிவிக்கப்பட்டுள்ளது.

காவல்துறையினரை தாக்கிவிட்டு தப்ப முயற்சி: 

படப்பை அருகே கரசங்கால் பகுதியில் ரவுடி சதாம் உசேன் நடமாடுவதாக காவல்துறையினருக்கு தகவல் கிடைத்ததாக கூறப்படுகிறது. இதையடுத்து அவரை பிடிப்பதற்காக போலீசார் சென்றபோது, சதாம் உசேன் காவல்துறையினரை கத்தியால் தாக்கிவிட்டு தப்ப முயன்றதாகக் கூறப்படுகிறது.

இதையும் படிங்க: விடிந்ததுமே அதிரடி ஆக்‌ஷன்... பெண் ஊழியரை பெட்ரோல் ஊற்றி கொல்ல முயன்ற கொடூரனை சுட்டுப்பிடித்த போலீஸ்...!

இதையடுத்து, தற்காப்பு நடவடிக்கையாக போலீசார் துப்பாக்கிச்சூடு நடத்தியதில் சதாம் உசேனின் இடது காலில் குண்டு பாய்ந்ததாக தெரிவிக்கப்பட்டுள்ளது.

காயமடைந்த சதாம் உசேனை போலீசார் மீட்டு மருத்துவமனைக்கு அழைத்துச் சென்றுள்ளனர். தற்போது அவர் ராஜீவ்காந்தி அரசு பொது மருத்துவமனையில் சிகிச்சை பெற்று வருகிறார்.

20 வழக்குகள் நிலுவை:

சதாம் உசேன் மீது கொலை, கொலை முயற்சி உள்ளிட்ட பல்வேறு குற்ற வழக்குகள் நிலுவையில் இருப்பதாகவும், மொத்தம் 20 வழக்குகள் அவர் மீது இருப்பதாகவும் காவல்துறை தரப்பில் தெரிவிக்கப்பட்டுள்ளது.

இதனால், அவர் நீண்டகாலமாக காவல்துறையின் கண்காணிப்பில் இருந்த குற்றப் பின்னணி கொண்ட நபரா என்பது குறித்தும் விசாரணை நடைபெற்று வருகிறது.

ரவுடிகள் மீது தொடரும் கண்காணிப்பு: 

தமிழ்நாட்டில் சரித்திரப் பதிவேடு குற்றவாளிகள், தொடர் குற்றவாளிகள், சமூக விரோதிகள் மற்றும் தலைமறைவு குற்றவாளிகளை கண்காணித்து, அவர்களின் குற்றச் செயல்களைத் தடுக்கும் வகையில் காவல்துறை பல்வேறு நடவடிக்கைகளை மேற்கொண்டு வருகிறது.

கடந்த ஜூலை மாதம் தமிழ்நாடு முழுவதும் நடத்தப்பட்ட சிறப்பு நடவடிக்கையில் 24,025 சரித்திரப் பதிவேடு ரவுடிகள் மற்றும் குற்ற குணத்தாரிடம் சோதனை மேற்கொள்ளப்பட்டதாக டிஜிபி அலுவலகம் தெரிவித்திருந்தது. அந்த நடவடிக்கையில் குற்றச் செயல்களில் ஈடுபட்டதாகக் கண்டறியப்பட்ட 949 பேர் கைது செய்யப்பட்டு நீதிமன்றக் காவலில் அடைக்கப்பட்டனர். இதே காலகட்டத்தில் பிணையில் வெளிவர முடியாத பிடியாணைகள் 2,385 நிறைவேற்றப்பட்டதாகவும் காவல்துறை தெரிவித்திருந்தது.

தொடர் குற்றவாளிகள் மீண்டும் குற்றச் செயல்களில் ஈடுபடுவதைத் தடுக்கும் வகையில், வழக்கமான சோதனைகள், கண்காணிப்பு மற்றும் தடுப்பு நடவடிக்கைகளை தொடர்ந்து மேற்கொள்ள அதிகாரிகளுக்கு அறிவுறுத்தப்பட்டுள்ளதாகவும் டிஜிபி அலுவலகம் தெரிவித்துள்ளது குறிப்பிடத்தக்கது. 

இதையும் படிங்க: சீறி பாய்ந்த தோட்டா... சிறுமியை சீரழித்த காம மிருகத்தை சுட்டுப்பிடித்த போலீஸ்... கோவையில் நடந்தது என்ன?