தமிழ்நாடு அரசால் அமைக்கப்பட்ட 'மத்திய - மாநில உறவுகள்' குறித்த உயர்நிலைக் குழுவின் முதல் அறிக்கை தொடர்பாகக் கர்நாடக முதலமைச்சர் சித்தராமையா தெரிவித்த ஆதரவிற்கு, தமிழக முதலமைச்சர் மு.க. ஸ்டாலின் இன்று தனது நெகிழ்ச்சியான நன்றியைத் தெரிவித்துக் கொண்டுள்ளார்.

முதலமைச்சர் மு.க. ஸ்டாலின் தனது எக்ஸ் (X) தளப் பதிவில், மாண்புமிகு கர்நாடக முதலமைச்சர் சித்தராமையா அவர்களே, தமிழ்நாடு அரசு அமைத்த உயர்நிலைக் குழுவின் முதல் அறிக்கைக்குத் தாங்கள் அளித்துள்ள கனிவான மற்றும் ஆக்கபூர்வமான ஆதரவிற்கு எனது மனமார்ந்த நன்றிகள் எனத் தெரிவித்துள்ளார்.

கூட்டாட்சியை வலுப்படுத்துவது என்பது ஒரு தனி மாநிலத்தின் கோரிக்கை அல்ல, அது அனைத்து மாநிலங்களின் கூட்டு முயற்சியாக இருக்க வேண்டும் என்ற சித்தராமையாவின் கருத்தை முதலமைச்சர் ஸ்டாலின் வழிமொழிந்துள்ளார்.

இதையும் படிங்க: கூட்டாட்சியை காக்க தமிழகத்துடன் கைகோர்ப்போம்..! மு.க. ஸ்டாலினுக்கு சித்தராமையா கடிதம்!

சித்தராமையா தனது கடிதத்தில் குறிப்பிட்டிருந்த, இந்தியா போன்ற பன்முகத்தன்மை கொண்ட ஒரு குடியரசில் ஒற்றுமை என்பது சீரான தன்மையால் அல்ல, அரசியலமைப்பு ரீதியான நம்பிக்கையால்தான் நிலைபெறுகிறது" என்ற வரிகளை மேற்கோள் காட்டிய முதலமைச்சர் ஸ்டாலின், இந்தப் புரிதலே தேசத்தின் ஒருமைப்பாட்டிற்கு அடிப்படை என நெகிழ்ந்துள்ளார்.

நிதிப் பகிர்வு மற்றும் அதிகாரப் பரவலாக்கல் தொடர்பாகத் தென் மாநிலங்கள் சந்திக்கும் சவால்களை ஒன்றிணைந்து எதிர்கொள்ளவும், 'மாநிலங்களுக்கு இடையேயான கவுன்சில்' போன்ற அமைப்புகளை வலுப்படுத்தவும் இரு முதலமைச்சர்களும் ஒரே நேர்க்கோட்டில் பயணிப்பது தேசிய அரசியலில் பெரும் கவனத்தைப் பெற்றுள்ளது.

கர்நாடகா மற்றும் தமிழ்நாடு ஆகிய இரு பெரிய மாநிலங்களின் முதலமைச்சர்கள், அரசியலமைப்புச் சட்டம் வழங்கியுள்ள மாநில உரிமைகளைப் பாதுகாக்க இவ்வாறு கரம் கோர்த்திருப்பது, இந்தியக் கூட்டாட்சித் தத்துவத்தின் ஒரு புதிய அத்தியாயமாகப் பார்க்கப்படுகிறது.

இதையும் படிங்க: எந்த நெருக்கடியிலும் சித்தராமையாவுடன் நிற்பேன்..!! டி.கே சிவகுமார் உறுதி..!!