தமிழ்நாட்டின் புதிய முதலமைச்சராக பதவியேற்ற ஜோசப் விஜய், அரசியல் அரங்கில் மட்டுமல்லாமல் தனது உடைத் தேர்வினாலும் பெரும் கவனத்தை ஈர்த்துள்ளார். இதுவரை தமிழ்நாட்டின் முதலமைச்சர்கள் பெரும்பாலும் வெள்ளை வேட்டி-சட்டை அணிந்து பதவியேற்றுக் கொண்ட நிலையில், கருப்பு நிற கோட்-சூட்டில் பதவியேற்று புதிய அடையாளத்தை உருவாக்கிய முதல் முதலமைச்சராக விஜய் பேசப்பட்டு வருகிறார்.

பதவியேற்பு விழாவில் வெள்ளைச் சட்டை மற்றும் கருப்பு கோட்-சூட்டில் தோன்றிய விஜய், இன்று நடைபெற்ற 17வது சட்டப்பேரவையின் முதல் கூட்டத் தொடரிலும் அதே பாணியில் வந்திருந்தார். அவரது தோற்றம் அரசியல் வட்டாரங்களிலும், சமூக ஊடகங்களிலும் பரபரப்பாக பேசப்பட்டு வருகிறது. தேர்தல் முடிவுகள் வெளியான பிறகும் கூட்டணி அமைப்பில் தவெக தீவிரமாக ஈடுபட்டிருந்த நிலையில், முதல்வர் பதவியேற்புக்கான கோட்-சூட் தயாரிப்பு எப்போது துவங்கியது என்ற கேள்வியும் எழுந்தது.

இதுகுறித்து வெளியான தகவலின்படி, தேர்தல் முடிவுகள் அறிவிக்கப்பட்ட அன்றே கருப்பு நிற கோட்-சூட் தயாரிக்க ஆர்டர் வழங்கப்பட்டதாக கூறப்படுகிறது. இந்த உடையை பிரபல ஆடை வடிவமைப்பாளர் ஸஃபிர் அகமது வடிவமைத்துள்ளார். விஜய் நடித்த ‘பீஸ்ட்’ திரைப்படத்தில் அவர் தோன்றிய தோற்றத்தை அடிப்படையாகக் கொண்டு இந்த ஆடை வடிவமைக்கப்பட்டதாகவும் தகவல் வெளியாகியுள்ளது.

இதையும் படிங்க: நாடு போற்றும் மூன்றெழுத்து மந்திரம் விஜய்! முதல்வருக்கு தற்காலிக சபாநாயகர் புகழாரம்!!

கோட் நிறத்தை தேர்வு செய்வதில் விஜயே நேரடியாக ஆர்வம் காட்டியதாக கூறப்படுகிறது. அதிகாரம், ஆளுமை மற்றும் தனித்துவத்தை பிரதிபலிக்கும் நிறமாக கருப்பை அவர் விரும்பியதாக அவரது நெருங்கிய வட்டாரங்கள் தெரிவித்துள்ளன. அந்த ஆடை விஜய்க்கு மிகச்சரியாக பொருந்தும் வகையில் இரண்டு நாட்கள் தனிப்பட்ட முறையில் சீர் செய்யப்பட்டதாகவும் கூறப்படுகிறது.

தமிழ்நாட்டின் அரசியல் கலாசாரத்தில் உடை என்பது முக்கிய அடையாளமாக இருந்து வந்துள்ளது. கருணாநிதியின் மஞ்சள் துண்டு, எம்ஜிஆரின் வெள்ளை தொப்பி, ஜெயலலிதாவின் கேப் ஸ்டைல், ஸ்டாலினின் வெள்ளை சட்டை போன்றவை தனித்துவமாக பேசப்பட்டன. தற்போது கருப்பு கோட்-சூட்டின் மூலம் விஜயும் தனக்கென புதிய அரசியல் பிம்பத்தை உருவாக்கியுள்ளார். அவரது முதல் உரையும் திரைப்பட வசன பாணியில் இருந்ததால், “தமிழக அரசியலில் புதிய தலைமுறை அரசியல் தொடங்கிவிட்டது” என ரசிகர்கள் சமூக ஊடகங்களில் பதிவிட்டு வருகின்றனர்.

இதையும் படிங்க: தொடங்கியது விஜய் ஆட்டம்!! அதிகாரிகள் மாற்றம்!! முதன்மை செயலராக செந்தில்குமார் ஐ.ஏ.எஸ் நியமனம்!