காந்தியடிகளின் 157-வது பிறந்த நாளை முன்னிட்டு முதலமைச்சர் விஜய் பதிவு செய்திருக்கிறார். அகிம்சை என்னும் பேராயுதத்தால் உலகையே வியக்க வைத்து இந்தியாவுக்கு விடுதலை பெற்றுத் தந்தவர் என்று தனது எக்ஸ் தளத்தில் பதிவு செய்திருக்கிறார்.

1869 அக்டோபர் 2-ஆம் தேதி குஜராத்தின் போர்பந்தரில் பிறந்த மகாத்மா காந்தியின் பிறந்தநாள் ஆண்டுதோறும் காந்தி ஜெயந்தியாக அனுசரிக்கப்படுகிறது. இந்திய விடுதலைப் போராட்டத்தில் காந்தி முன்னெடுத்த சத்தியம், அகிம்சை, சத்தியாகிரகம், சுயசார்பு மற்றும் சமூக நல்லிணக்கம் போன்ற கொள்கைகளை நினைவுகூரும் நாளாக இது கடைப்பிடிக்கப்படுகிறது. அக்டோபர் 2 இந்தியாவின் தேசிய விடுமுறை நாட்களில் ஒன்றாகவும் உள்ளது.

மேலும், காந்தியின் அகிம்சை கொள்கையை உலகளவில் நினைவுகூரும் வகையில், ஐக்கிய நாடுகள் சபை அக்டோபர் 2-ஐ சர்வதேச அகிம்சை தினமாக அறிவித்துள்ளது.

இதையும் படிங்க: ஆசிய போட்டியில் பதக்கம் வென்ற ஆடவர் ஸ்குவாஷ் வீரர்கள்: தலா ரூ.30 லட்சம் பரிசு அறிவித்தார் முதல்வர் விஜய்!

 பிரதமர் மோடி மரியாதை:

இன்று காலை டெல்லி ராஜ்காட்டில் உள்ள மகாத்மா காந்தியின் நினைவிடத்தில் பிரதமர் நரேந்திர மோடி மலர்தூவி மரியாதை செலுத்தினார். அங்கு நடைபெற்ற சர்வ சமயப் பிரார்த்தனையிலும் அவர் பங்கேற்றார்.

அதேபோல், அக்டோபர் 2-ஆம் தேதி பிறந்தநாள் கொண்டாடும் முன்னாள் பிரதமர் லால் பகதூர் சாஸ்திரியின் நினைவிடமான விஜய் காட்டிலும் பிரதமர் மோடி மரியாதை செலுத்தினார்.

டெல்லி முதலமைச்சர் ரேகா குப்தா, துணைநிலை ஆளுநர் தரஞ்சித் சிங் சந்து, மத்திய அமைச்சர் மனோகர் லால் கட்டார், மக்களவைத் தலைவர் ஓம் பிர்லா உள்ளிட்டோரும் ராஜ்காட்டில் காந்தியடிகளுக்கு மரியாதை செலுத்தினர்.

குடியரசுத் தலைவர்  வாழ்த்து:

காந்தி ஜெயந்தியை முன்னிட்டு குடியரசுத் தலைவர் திரௌபதி முர்மு நேற்று வெளியிட்ட செய்தியில், காந்தியடிகளின் 157-வது பிறந்தநாளில் நாட்டின் சார்பில் மரியாதை செலுத்துவதாகத் தெரிவித்துள்ளார்.

உலகின் பல பகுதிகளில் போர் மற்றும் மோதல்கள் நிலவி வரும் சூழலில், காந்தியின் அமைதி மற்றும் அகிம்சைச் செய்தி மேலும் முக்கியத்துவம் பெறுகிறது என்று அவர் குறிப்பிட்டுள்ளார். அனைவரின் நலனையும் உள்ளடக்கிய காந்தியின் ‘சர்வோதயா’ கொள்கையை முன்னிறுத்தி, 2047-க்குள் வளர்ச்சியடைந்த இந்தியாவை உருவாக்கும் பயணத்தில் அனைவரும் பங்களிக்க வேண்டும் என்றும் குடியரசுத் தலைவர் தெரிவித்துள்ளார்.

நாடு முழுவதும் நிகழ்ச்சிகள்:

காந்தி ஜெயந்தியை முன்னிட்டு நாடு முழுவதும் பல்வேறு நிகழ்ச்சிகள் நடைபெற்று வருகின்றன. டெல்லி ராஜ்காட்டில் சர்வ சமயப் பிரார்த்தனைக் கூட்டம் நடைபெற்றது. அரசு அமைப்புகள், கல்வி நிறுவனங்கள் மற்றும் பல்வேறு அமைப்புகள் சார்பில் காந்தியின் கொள்கைகளை நினைவுகூரும் நிகழ்ச்சிகளும் ஏற்பாடு செய்யப்பட்டுள்ளன.

காந்தியின் தூய்மை குறித்த கருத்துகளை நினைவுகூரும் வகையில், பல்வேறு பகுதிகளில் தூய்மைப் பணிகள் மற்றும் தன்னார்வப் பணிகளும் நடைபெற்று வருகின்றன.

சி.எம்.விஜய் வாழ்த்து: 

முதலமைச்சர் ஜோசப் விஜய் தனது எக்ஸ் தளப் பக்கத்தில் புகழஞ்சலி செலுத்தியிருக்கிறார்.

அந்தப் பதிவில், “அகிம்சை என்னும் பேராயுதத்தால் உலகையே வியக்க வைத்து, இந்தியத் திருநாட்டிற்கு விடுதலை பெற்றுத் தந்த மாபெரும் தலைவர், நமது தேசத் தந்தை மகாத்மா காந்தியடிகளின் பிறந்த நாளில், அவரது தேசப்பற்றையும் தியாக வாழ்வையும் போற்றி வணங்குகிறேன்” என்று குறிப்பிட்டிருக்கிறார்.

மேலும், “எளிமை, நேர்மை, மனிதநேயம், சமத்துவம், சமூக நல்லிணக்கம் ஆகியவற்றை தனது வாழ்வின் நெறிகளாகக் கொண்டு, உலகம் முழுவதும் அன்பையும் சகோதரத்துவத்தையும் பரப்பி மாமனிதராகத் திகழ்ந்தவர் மகாத்மா காந்தியடிகள்.

அவரது கனவுகளை நனவாக்கி, அமைதியும், நல்லிணக்கமும், சகோதரத்துவமும் தழைத்திடும் சமூகத்தை உருவாக்கி, நாட்டின் ஒற்றுமையையும் உரிமைப்பாட்டையும் பாதுகாத்து, அவர் காட்டிய அறவழியில் நமது பயணத்தைத் தொடர்வோம்” என்று தமிழ்நாடு முதலமைச்சர் விஜய் தனது பதிவில் குறிப்பிட்டிருக்கிறார்.

இதையும் படிங்க: முதல்வர் விஜய்க்கு தடுமாற்றம் வந்துள்ளது! தாராபுரம் பேச்சு குறித்து நயினார் நாகேந்திரன் விமர்சனம்!