தமிழ்நாட்டின் புண்ணியத் தலமான ராமேஸ்வரத்திற்கு நேரடி விமான இணைப்பு வழங்கும் முக்கியத் திட்டம் இறுதி கட்டத்தை நெருங்கியுள்ளது. ராமநாதபுரம் மாவட்டம் மாணிக்கநேரி பகுதியில் சுமார் 600 ஏக்கர் நிலப்பரப்பில் புதிய விமான நிலையம் அமைக்கத் தமிழக அரசு முடிவு செய்துள்ளது. 

தமிழக தொழில் வளர்ச்சி நிறுவனமான டிட்கோ, மத்திய சிவில் விமானப் போக்குவரத்து அமைச்சகத்திடம் ‘சைட் கிளியரன்ஸ்’ அனுமதி கோரி விரைவில் விண்ணப்பிக்க உள்ளது. 2025-இல் மு.க.ஸ்டாலின் தலைமையிலான அரசு இத்திட்டத்தை அறிவித்தது. பழங்குளம், தேவிப்பட்டினம், கும்பரம், களரி, மாணிக்கநேரி ஆகிய ஐந்து இடங்கள் ஆய்வுக்கு உட்படுத்தப்பட்டன. 

நில அமைவு மற்றும் அணுகுமுறை அடிப்படையில் கும்பரம் மற்றும் மாணிக்கநேரி தேர்வு செய்யப்பட்டன. இந்திய விமான நிலையங்கள் ஆணையம் (AAI) கள ஆய்வு செய்தபின், மாணிக்கநேரியை இறுதி செய்தது. இது ராமநாதபுரம் ரயில் நிலையத்திலிருந்து சுமார் 10-17 கி.மீ. தொலைவிலும், ராமேஸ்வரம் ராமநாதசுவாமி கோயிலிலிருந்து சுமார் 70 கி.மீ. தொலைவிலும் அமைந்துள்ளது.

இதையும் படிங்க: சென்னை ஏர்போர்ட் தனியார்மயமா..? சூடு பிடிக்கும் விவகாரம்... டிடிவி தினகரன் சரமாரி கேள்வி.!!

தற்போது வடமாநிலங்கள் மற்றும் வெளிநாடுகளிலிருந்து வரும் பக்தர்கள் மதுரை அல்லது தூத்துக்குடி விமான நிலையம் வழியாக வந்து, 3-4 மணி நேரம் சாலைப் பயணம் மேற்கொள்ள வேண்டியுள்ளது. பாம்பன் பாலம் பராமரிப்பின்போது ரயில் சேவை பாதிக்கப்படும் சூழலிலும் இது மாற்றாக அமையும். ராமநாதசுவாமி கோயில், தனுஷ்கோடி, அரிச்சல்முனை, அப்துல் கலாம் நினைவிடம் உள்ளிட்ட இடங்களுக்கு சுற்றுலாப் பயணிகள் எளிதாக வர முடியும்.

ராமநாதபுரம் மற்றும் சிவகங்கை மாவட்டங்களில் இருந்து வெளிநாடுகளில் பணிபுரியும் ஆயிரக்கணக்கானோர் நேரடியாகத் தங்கள் ஊருக்கு வர வசதியாகும். விமான நிலையம் அமைந்தால் உணவகங்கள், தங்கும் விடுதிகள், போக்குவரத்து மற்றும் கைவினைப் பொருள் விற்பனை அதிகரித்து, ஆயிரக்கணக்கான வேலைவாய்ப்புகள் உருவாகும். 

இப்பகுதிகளின் வறட்சி காரணமாகப் பின்தங்கிய பொருளாதாரத்தை மேம்படுத்தும். இலங்கை எல்லை பாதுகாப்பு மற்றும் கடல்சார் வணிகப் பார்வையிலும் முக்கியத்துவம் வாய்ந்த இத்திட்டத்திற்கு மத்திய அரசும் முன்னுரிமை அளித்து வருகிறது. நிலம் கையகப்படுத்தும் பணிகள் நடைபெற்று வருகின்றன. அனுமதி கிடைத்தவுடன் பணிகள் வேகமடையும் என எதிர்பார்க்கப்படுகிறது.
 

இதையும் படிங்க: ராகுல் வருகை... .60 லட்சம் செலவு!! கல்லா கட்டும் காங்கிரஸ்? எம்.பி., எம்.எல்.ஏ.க்களிடம் வசூல்?