தமிழகத்தில் கோவில்களுக்கு வரும் பக்தர்களுக்கு தேவையான அடிப்படை வசதிகளை எந்த குறையும் இல்லாமல் செய்து தர வேண்டும் என இந்து சமய அறநிலையத்துறை அதிகாரிகளுக்கு முதல்வர் விஜய் உத்தரவிட்டுள்ளதாக தகவல் வெளியாகியுள்ளது. பக்தர்களின் சிரமங்களை குறைத்து, ஆன்மிக பயணம் சிறப்பாக அமையும் வகையில் கோவில் நிர்வாகத்தில் பல்வேறு நடவடிக்கைகள் மேற்கொள்ள வேண்டும் என அறிவுறுத்தப்பட்டுள்ளது.

சென்னை தலைமைச் செயலகத்தில் கோவில் நிர்வாகம் மற்றும் இந்து சமய அறநிலையத்துறையின் செயல்பாடுகள் தொடர்பான உயர்நிலை ஆலோசனை கூட்டம் நடைபெற்றது. இதில், கோவில்களில் பக்தர்களுக்கு வழங்கப்படும் வசதிகள், நிர்வாக நடவடிக்கைகள் மற்றும் மேம்பாட்டு பணிகள் குறித்து ஆலோசிக்கப்பட்டதாக தெரிவிக்கப்பட்டுள்ளது.

கூட்டத்தில் பேசிய முதல்வர் விஜய், ஆன்மிக பயணம் மேற்கொள்ளும் பக்தர்கள் எந்தவித சிரமமும் இல்லாமல் சாமி தரிசனம் செய்து திரும்புவதை அரசு உறுதி செய்ய வேண்டும் என வலியுறுத்தியதாக அதிகாரிகள் தெரிவித்தனர்.

இதையும் படிங்க: கோவில் அறங்காவலர் பதவிகளை பெற போட்டா போட்டி! அமைச்சர் ரமேஷை சுத்து போடும் ஆளும் கட்சி நிர்வாகிகள்!

குறிப்பாக, அதிக அளவில் பக்தர்கள் வருகை தரும் கோவில்களில் போதுமான எண்ணிக்கையில் கழிவறை வசதிகள் அமைக்க வேண்டும் என்றும், அவற்றை தொடர்ந்து தூய்மையாக பராமரிக்க தேவையான பணியாளர்களை நியமிக்க வேண்டும் என்றும் அறிவுறுத்தப்பட்டுள்ளது.

மேலும், கோடை காலம் மற்றும் முக்கிய விழா நாட்களில் நீண்ட நேரம் வரிசையில் காத்திருக்கும் பக்தர்களுக்கு சுத்திகரிக்கப்பட்ட குடிநீர் கிடைக்க ஏற்பாடு செய்ய வேண்டும் எனவும் தெரிவிக்கப்பட்டுள்ளது. இதன் மூலம் வெப்பம் மற்றும் கூட்ட நெரிசலால் பக்தர்கள் எதிர்கொள்ளும் சிரமங்களை குறைக்க முடியும் என எதிர்பார்க்கப்படுகிறது.

முதியோர், மாற்றுத்திறனாளிகள் மற்றும் குழந்தைகளுடன் வரும் தாய்மார்களுக்கு சிறப்பு கவனம் செலுத்த வேண்டும் என்றும், அவர்கள் எளிதாக தரிசனம் செய்யும் வகையில் தனி வழிகள் அமைக்க வேண்டும் என்றும் முதல்வர் அறிவுறுத்தியதாக கூறப்படுகிறது.

அதேபோல், கோவில் வளாகங்கள் எப்போதும் தூய்மையாக பராமரிக்கப்பட வேண்டும் என்றும், பக்தர்களுக்கு நல்ல அனுபவத்தை வழங்கும் வகையில் அனைத்து வசதிகளும் மேம்படுத்தப்பட வேண்டும் என்றும் அதிகாரிகளுக்கு உத்தரவிடப்பட்டுள்ளது.

தமிழகத்தில் முக்கிய கோவில்களுக்கு தினசரி ஆயிரக்கணக்கான பக்தர்கள் வருகை தரும் நிலையில், இந்த உத்தரவுகள் மூலம் பக்தர்களுக்கான அடிப்படை வசதிகள் மேலும் மேம்படும் என எதிர்பார்க்கப்படுகிறது. கோவில் நிர்வாகங்களில் புதிய நடைமுறைகள் எப்போது அமல்படுத்தப்படும் என்பது குறித்து அடுத்தகட்ட அறிவிப்புகள் வெளியாகும் என கூறப்படுகிறது.

இதையும் படிங்க: ஆசிரியர்களுக்கு முதல்வர் விஜய் 'கிரீன் சிக்னல்'... நிறைவேறும் முக்கிய கோரிக்கைகள் என்ன? வெளியான சூப்பர் தகவல்!