மருத்துவக் கனவைச் சிதைத்த நீட் தேர்விற்கு எதிராக உயிர்த்தியாகம் செய்த அரியலூர் மாணவி அனிதாவின் 9-ஆம் ஆண்டு நினைவேந்தல் நிகழ்ச்சி சென்னை பெசன்ட் நகர் கடற்கரையில் நீட் எதிர்ப்புக் கூட்டியக்கம் சார்பில் உணர்ச்சிப் பெருக்குடன் நடைபெற்ற நிலையில், மத்திய அரசுக்கு எதிரான தங்களின் போராட்டத்திற்கு இடையே முதலமைச்சர் விஜய் வர வேண்டாம் என அனிதாவின் சகோதரர் மணிரத்னம் திட்டவட்டமாகத் தெரிவித்துள்ளார்.

நீட் தேர்வால் தங்களது மருத்துவக் கனவு பறிபோய் தற்கொலை செய்து கொண்ட மாணவி அனிதா உள்ளிட்ட அனைத்து மாணவச் செல்வங்களின் நினைவாக, நீட் எதிர்ப்புக் கூட்டியக்கம் சார்பில் பெசன்ட் நகர் கடற்கரையில் இன்று பிரம்மாண்ட நினைவேந்தல் மற்றும் வீரவணக்க நிகழ்வு ஒருங்கிணைக்கப்பட்டது.

இந்நிகழ்வில் மறைந்த அனிதாவின் சகோதரர் மணிரத்னம், சமூகச் செயற்பாட்டாளர்கள், கல்லூரி மாணவர்கள் மற்றும் பொதுமக்கள் எனப் பலரும் திரளாகப் பங்கேற்று அனிதாவின் திருவுருவப் படத்திற்கு மலர்தூவி, மெழுகுவர்த்தி ஏந்தி வீரவணக்கம் செலுத்தினர். தொடர்ந்து, பொதுப்பட்டியலில் உள்ள கல்வியை உடனடியாக மாநிலப் பட்டியலுக்கு மாற்ற வேண்டும் எனவும், ஏழை எளிய மாணவர்களின் உயிரைக் குடிக்கும் நீட் தேர்வை மத்திய அரசு உடனடியாக ரத்து செய்ய வேண்டும் எனவும் விண்ணதிர முழக்கங்கள் எழுப்பப்பட்டன.

இதையும் படிங்க: ட்ரம்ப்-க்கே டஃப்..! அமெரிக்கா அதிபர் விஜய்..!! பிரதமர் விவகாரத்தில் கிண்டலடித்த EPS..!

நிகழ்ச்சியின் போது செய்தியாளர்களைச் சந்தித்த மாணவி அனிதாவின் அண்ணன் மணிரத்னம் பேசுகையில், நீட் தேர்விற்கு எதிராக எங்கள் தங்கை அனிதா தொடங்கி வைத்த போராட்டம் இன்னும் ஓயவில்லை. மத்திய அரசின் பாராமுகத்திற்கு எதிராக நாங்கள் தொடர்ந்து நீதி கேட்டுப் போராடி வருகிறோம். இந்தச் சூழலில், மத்திய அரசுக்கு எதிரான எங்களது போராட்டக் களத்திற்கு இடையில் தமிழ்நாடு முதலமைச்சர் விஜய் வர வேண்டாம். மாணவர்கள் நலனைக் காக்க நீட் தேர்வை முழுமையாக ஒழிக்கும் வரை எங்களது குரல் ஓயாது என்று ஆவேசத்துடன் குறிப்பிட்டார்.

இதையும் படிங்க: "கண்ணாடி போடுங்கம்மா"..! முதல்வரை கொஞ்சிய பாட்டி.! விஜயின் கியூட் ரியாக்ஷன்..!!