தமிழ்நாட்டின் புதிய முதலமைச்சராக நடிகர் தலைமையிலான தமிழக வெற்றிக் கழகம் (தவெக) சார்பில் விஜய் இன்று பொறுப்பேற்றுக் கொண்டார். பதவியேற்ற உடனேயே அவர் மூன்று முக்கிய கோப்புகளில் கையெழுத்திட்டார். இதனைத் தொடர்ந்து மக்கள் மன்றத்தில் உரையாற்றிய அவர், தன் வாழ்க்கைப் பயணத்தையும், மக்களின் அன்பையும், எதிர்காலத் திட்டங்களையும் உணர்ச்சிப் பூர்வமாகப் பகிர்ந்து கொண்டார்.

விஜய் தன் உரையில், “சினிமாவில் உதவி இயக்குநராகக் கஷ்டப்பட்ட ஒருவரின் மகன் நான். வறுமை, பசி ஆகியவற்றின் சுவையை வாழ்க்கையில் நன்கு அறிந்தவன். மன்னர் பரம்பரையில் இருந்து வரவில்லை. உங்களுடைய குடும்பத்தின் ஒரு அங்கமாகவே என்னை உணர்கிறேன்” என்று கூறினார். சினிமாவில் மக்கள் தனக்கு அளித்த பெரும் ஆதரவை நினைவுகூர்ந்த அவர், அந்த அன்புக்கு நன்றிக்கடன் செலுத்தும் விதமாக அரசியலுக்கு வந்ததாகவும் விளக்கினார்.

அரசியல் பயணத்தில் தான் சந்தித்த கஷ்டங்கள், அவமானங்கள் பற்றியும் அவர் பேசினார். “என்னுடன் நின்ற உங்களுக்கும் அந்தக் கஷ்டங்கள் ஏற்பட்டன. ஆனால் நீங்கள் ஒருபோதும் அதைப் பொருட்படுத்தவில்லை. இன்று சி.ஜோசப் விஜய் என்னும் என்னை உண்மையாக்கியிருக்கிறீர்கள்” என்று மக்களுக்கு நன்றி தெரிவித்தார். தன்னை ஒரு சாதாரண மனிதனாகவே பார்க்க வேண்டும் என்று வலியுறுத்திய விஜய், “நான் தேவதூதன் அல்ல. பொய் வாக்குறுதிகளை அளிக்க மாட்டேன். எது முடியுமோ அதை மட்டுமே செய்வேன்” என்று தெளிவுபடுத்தினார். 

இதையும் படிங்க: #BREAKING: ஆட்சி அமைக்கிறது தவெக..! புதிய அரசுக்கு மு.க. ஸ்டாலின் வாழ்த்து..!

தமிழ்நாடு அரசின் தற்போதைய நிதி நிலைமை குறித்தும் அவர் மக்களிடம் பகிர்ந்து கொண்டார். “கஜானாவை சுத்தமாகக் காலி செய்துவிட்டுச் சென்றிருக்கிறார்கள். இந்த நிலையில் தான் தவெக அரசு பொறுப்பேற்றுள்ளது. விரைவில் மாநிலத்தின் உண்மையான நிதி நிலைமை குறித்த வெள்ளை அறிக்கை வெளியிடப்படும்” என்று அறிவித்தார். 

மக்களுக்கு உரையாற்றிய விஜய், “நான் சொன்ன அனைத்து வாக்குறுதிகளையும் படிப்படியாக நிறைவேற்றுவேன். கொஞ்சம் அவகாசம் கொடுங்கள். இது உங்கள் ஆட்சி” என்று உறுதியளித்தார். புதிய அரசு மக்களின் பிரச்னைகளுக்கு உடனடி தீர்வு காணும் என்ற எதிர்பார்ப்பு தமிழ்நாடு முழுவதும் நிலவுகிறது.

இதையும் படிங்க: #BIG BREAKING: முதல்வராகிறார் விஜய்..! கிரீன் சிக்னல் காட்டிய திருமா..! விசிக ஆதரவு கடிதத்தை பெற்ற ஆதவ்..!