ஆந்திரப் பிரதேச மாநிலத்தின் கலை, கலாச்சாரம், ஆன்மீகம் மற்றும் பாரம்பரியப் பெருமைகளை உலகறியச் செய்யும் வகையில் விஜயவாடா புன்னமி காட் (Punnami Ghat) பகுதி மைதானத்தில் நடைபெற்ற பிரம்மாண்ட 'விஜயவாடா உத்சவ்' கலாச்சாரத் திருவிழாவில், ஆந்திர முதல்வர் நாரா சந்திரபாபு நாயுடுவுடன் சிறப்பு விருந்தினராகத் தமிழக முதல்வர் விஜய் பங்கேற்றார்; அப்போது மேடையில் பேசிய ஆந்திர முதல்வர் சந்திரபாபு நாயுடு, "கட்சி தொடங்கிய வெறும் இரண்டு ஆண்டுகளிலேயே ஆட்சியைப் பிடித்து முதலமைச்சரானவர் நம் தளபதி விஜய்" எனப் புகழ்ந்துரைத்த போது, மைதானத்தில் திரண்டிருந்த பல்லாயிரக்கணக்கான மக்கள் ஆர்ப்பரித்துக் கைதட்டி வரவேற்றனர்.

கிருஷ்ணா நதிக்கரையில் அமைந்துள்ள புன்னமி காட் மைதானத்தில் ஆந்திரப் பிரதேச அரசின் சார்பில் இந்த ஆண்டு 'விஜயவாடா உத்சவ்' விழா மிக விமரிசையாக ஏற்பாடு செய்யப்பட்டிருந்தது. ஆந்திராவின் பாரம்பரியக் கலை நிகழ்ச்சிகள், ஆன்மீக நிகழ்வுகள் மற்றும் பண்பாட்டுப் பெருமைகளை ஒருங்கிணைத்த இந்த மெகா திருவிழாவிற்குத் தமிழக முதலமைச்சர் விஜய்க்கு ஆந்திர அரசு சார்பில் பிரத்யேக அழைப்பு விடுக்கப்பட்டிருந்தது.விழா மேடையில் இரு மாநில முதல்வர்களும் ஒன்றாகக் கைகோர்த்து மேடையேறிய போது அரங்கமே கரவொலியால் அதிர்ந்தது. தொடர்ந்து விழாப் பேருரையாற்றிய ஆந்திர முதலமைச்சர் நாரா சந்திரபாபு நாயுடு பேசியதாவது:

"இன்று ஆந்திர மண் ஒரு தனித்துவமான வரலாற்றுத் தலைவரை வரவேற்றுப் பெருமை கொள்கிறது. அரசியல் வரலாற்றில் பலரும் பல தசாப்தங்களாகப் போராடிப் பெறும் உயரத்தை, மக்கள் மீது கொண்ட அசைக்க முடியாத நம்பிக்கையாலும் அளப்பரிய மக்கள் செல்வாக்கினாலும் கட்சி ஆரம்பித்த இரண்டே ஆண்டுகளில் சாத்தியமாக்கி, மக்களால் தேர்ந்தெடுக்கப்பட்ட தமிழகத்தின் முதலமைச்சராகப் பொறுப்பேற்றவர் நமது தளபதி விஜய்.தமிழ்நாடு முதலமைச்சர் தளபதி விஜய் அவர்களின் வரலாற்றுச் சிறப்புமிக்க இந்த வருகையால் நமது விஜயவாடா நகரமே விழாக்கோலம் பூண்டு அதிர்ந்து கொண்டிருக்கிறது. 

இதையும் படிங்க: 'ரீல்ஸ் போடுவதில் மட்டுமே கவனம்...': தவெக அரசை கடுமையாக விமர்சித்த நயினார் நாகேந்திரன்!

இரு மாநிலங்களின் கலை, பண்பாடு மற்றும் மக்களின் நல்லுறவை மேலும் வலுப்படுத்த அவரது வருகை புதிய பாலமாக அமைந்துள்ளது" என்று சந்திரபாபு நாயுடு பேசப் பேச, மைதானம் முழுவதும் திரண்டிருந்த இளைஞர்களும் பொதுமக்களும் முழக்கமிட்டு பெரும் உற்சாகத்தை வெளிப்படுத்தினர்.திரைத்துறையைத் தாண்டி அரசியல் களத்திலும் தென்னிந்தியா முழுவதும் தனக்கென தனிப்பெரும் ஈர்ப்பைப் பெற்றுள்ள தமிழக முதல்வர் விஜய், ஆந்திர முதல்வருடன் இணைந்து ஒரே மேடையில் பங்கேற்ற இந்த நிகழ்வு, தமிழகம் மற்றும் ஆந்திர அரசியல் வட்டாரங்கள் மட்டுமின்றி ஒட்டுமொத்த தென்னிந்திய அரசியல் அரங்கிலும் பெரும் பரபரப்பான விவாதத்தையும் கவனத்தையும் ஈர்த்துள்ளது.

இதையும் படிங்க: மின்மிகை மாநிலத்திற்கு இந்த அவலமா?: ரூ.35 மின் கொள்முதலுக்கு பிரேமலதா கண்டனம்!