கோவை தெற்கு தொகுதியில் மூன்று கோடீஸ்வர வேட்பாளர்கள் போட்டியிடுகின்றனர். இதில் தவெக சார்பில் போட்டியிடும் வி.செந்தில்குமார், திமுக, அதிமுக வேட்பாளர்களைக் காட்டிலும் தன்னிடம் அதிக சொத்துகள் இருப்பதாகத் தெரிவித்துள்ளார்.
அம்மன் கே.அர்ச்சுணன்:
அதிமுக சார்பில் போட்டியிடும் அம்மன் கே.அர்ச்சுணன், வியாபாரம் செய்து வருவதாகத் தெரிவித்துள்ள நிலையில், அவர் கடந்த 2021 தேர்தலில் கோவை வடக்கு தொகுதியில் போட்டியிட்டபோது தன்னிடம் ரூ.59.70 லட்சம் மதிப்பிலான அசையும் சொத்துகள் இருப்பதாகவும், ரூ.1.98 கோடி மதிப்பிலான அசையா சொத்துகள் இருப்பதாகவும் தெரிவித்திருந்தார்.
இதையும் படிங்க: விடிந்ததுமே தடாலடி மாற்றம்... விஜய்க்கு கிடைத்தது அனுமதி... தவெக தொண்டர்களுக்கு ஹேப்பி நியூஸ்...!
இந்நிலையில் தற்போது தன்னிடம் தனியாக ரூ.55.80 லட்சம் மதிப்பிலான 400 கிராம் தங்கம் இருப்பதாகவும், தனது நிறுவனத்துக்காக வாங்கப்பட்ட 2,697 கிராம் தங்கத்தில் ரூ.1.07 கோடி மதிப்பிலான 899 கிராம் தங்கம் இருப்பதாகவும், ஒட்டுமொத்தமாக ரூ.5.76 கோடி மதிப்பிலான அசையும் சொத்துகள் இருப்பதாகத் தெரிவித்துள்ளார். மேலும் தன்னிடம் தற்போது ரூ.2.74 கோடி மதிப்பிலான அசையா சொத்துகள் இருப்பதாகவும், ரூ.4.45 கோடி கடன் இருப்பதாகவும் தெரிவித்துள்ளார்.
கட்சிக்கு கடன்பட்ட செந்தில் பாலாஜி:
கோவை தெற்கு தொகுதியில் போட்டியிடும் வி.செந்தில் பாலாஜி, தான் விவசாயம், பொது சேவையில் ஈடுபட்டு வருவதாகத் தெரிவித்துள்ளார். கடந்த 2021 தேர்தலில் தன்னிடம் ரூ.97.93 லட்சம் மதிப்பிலான அசையும் சொத்துகள் இருப்பதாகவும், ரூ.1.10 கோடி மதிப்பிலான அசையா சொத்துகள் இருப்பதாகவும், ரூ.9.05 லட்சம் வங்கிக் கடன் இருப்பதாகவும் தெரிவித்திருந்த நிலையில், தற்போது தன்னிடம் ரூ.1.12 கோடி அசையும் சொத்துகள் இருப்பதாகவும், ரூ.1.35 கோடி மதிப்பிலான அசையா சொத்து இருப்பதாகவும் தெரிவித்துள்ளார்.
தன்னிடம் ரூ.85 ஆயிரம் மதிப்புள்ள கைத்துப்பாக்கி ஒன்று இருப்பதாகத் தெரிவித்துள்ள அவர், கடந்த 2021 தேர்தலில் கரூர் தொகுதியில் போட்டியிட்டபோது தேர்தல் செலவுகளுக்காக திமுக கட்சித் தலைமை வழங்கிய தொகையில், செலவுகள் போக ரூ.9.35 லட்சம் கடனை திமுகவுக்கு கொடுக்க வேண்டியிருப்பதாகத் தெரிவித்துள்ளார். மேலும் ரூ.24.65 லட்சம் வருமான வரி பாக்கி இருப்பதாகவும், வரி விதிப்பை எதிர்த்து மேல் முறையீடு தாக்கல் செய்யப்பட்டிருப்பதால் நிலுவையில் இருப்பதாகவும் தெரிவித்துள்ளார்.
கோடீஸ்வர தவெக வேட்பாளர்:
கோவை தெற்கு தொகுதியில் தவெக சார்பில் போட்டியிடும் தொழிலதிபர் வி.செந்தில்குமார், தன்னிடம் 400 கிராம் தங்கம் உள்ளிட்ட ரூ.1.46 கோடி மதிப்பிலான அசையும் சொத்துகளும், ரூ.10.06 கோடி மதிப்பிலான அசையா சொத்துகளும், ரூ.2.88 கோடி கடன் இருப்பதாகவும் தெரிவித்துள்ளார்.
தெற்கு தொகுதியில் மேற்கண்ட மூன்று கோடீஸ்வர வேட்பாளர்களை எதிர்த்து போட்டியிடும் நாம் தமிழர் கட்சியின் 25 வயது இளம் வேட்பாளர் வீ.பேரறிவாளன், தன்னிடம் கையிருப்பாக ரூ.20 ஆயிரம், வங்கிக் கணக்கில் ரூ.8 ஆயிரம், ரூ.30 ஆயிரம் மதிப்பிலான இருசக்கர வாகனம் என மொத்தம் 58,134 ரூபாய்க்கு மட்டுமே சொத்து இருப்பதாகவும் தன்னிடம் அசையா சொத்துகள் ஏதும் இல்லை என்று தெரிவித்துள்ளார்.
இதையும் படிங்க: விஜய்க்கு அடி மேல் அடி... கால் வைத்த இடமெல்லாம் கண்ணிவெடி...தவெகவினருக்கு வெளியானது அதிர்ச்சி செய்தி...!!