"நாட்டின் அரசியலமைப்புச் சட்டம் மற்றும் ஜனநாயகத்தின் தூண்களாக விளங்கும் தன்னாட்சி அமைப்புகளைச் சீர்குலைத்து அழிப்பதே காங்கிரஸ் கட்சியின் பிரதான நோக்கமாக உள்ளது; தேர்தல் ஆணையத்தைத் தொடர்ந்து காங்கிரஸ் கட்சியின் அடுத்த இலக்கு இந்திய நீதித்துறைதான்" என்று மத்திய நாடாளுமன்ற விவகாரங்கள் துறை அமைச்சர் கிரண் ரிஜிஜூ (Kiren Rijiju) மிகக் காட்டமாகக் குற்றம் சாட்டியுள்ளார்.  

தலைமைத் தேர்தல் ஆணையர் மற்றும் வாக்காளர் பட்டியல் விவகாரத்தை முன்வைத்து, ராகுல் காந்தி தலைமையில் 'இந்தியா' கூட்டணிக் கட்சிகள் உச்ச நீதிமன்றத்தை நோக்கிப் பேரணி நடத்தியதைக் கடுமையாகச் சாடிப் பேசிய மத்திய அமைச்சர் கிரண் ரிஜிஜூ தெரிவித்ததாவது:"2014-ஆம் ஆண்டு முதலே காங்கிரஸ் கட்சியும் ராகுல் காந்தியும் தொடர்ந்து இந்த நாடகத்தை அரங்கேற்றி வருகின்றனர். 

ஒரு ஜனநாயக நாட்டில் மக்களுக்கு உண்மையாக உழைத்துச் சேவை செய்தால் மட்டுமே மக்களின் நன்மதிப்பையும் ஆதரவையும் பெற முடியும். ஆனால், தேர்தலில் மக்களின் நம்பிக்கையைப் பெறத் தவறி படுதோல்வி அடையும் போதெல்லாம் தேர்தல் ஆணையத்தை ஊழல் நிறைந்தது என வசைபாடுவதை இவர்கள் வாடிக்கையாக வைத்துள்ளனர்.   மறுபுறம் உச்ச நீதிமன்றம் மன்னிப்புக் கேட்க உத்தரவிடும் போது அங்குப் பவ்யமாக மன்னிப்புக் கேட்கிறார்கள்; பின்னர் அதே உச்ச நீதிமன்றத்தை விமர்சித்து, தங்களுக்கு நீதித்துறையின் மீதே நம்பிக்கையில்லை எனக் கூறுகிறார்கள்.

இதையும் படிங்க: வாக்காளர் தரவுகள் யார் கட்டுப்பாட்டில்.? வெளிப்படைத்தன்மை எங்கே.? செல்வப்பெருந்தகை கொந்தளிப்பு..!!

 ஜனநாயக அமைப்புகளைத் திட்டமிட்டு அவதூறு செய்யும் இவர்களின் அடுத்த குறி நீதித்துறைதான். 55 ஆண்டுகள் நாட்டை ஆண்ட காங்கிரஸ் கட்சி, அவசர நிலையைப் பிரகடனப்படுத்தி அரசியலமைப்பின் முகப்புரையையே மாற்றிய வரலாற்றுப் பின்னணியைக் கொண்டது. எனவே, அவர்கள் இப்போது ஜனநாயகம் குறித்துப் பேசுவது வேடிக்கையானது.   

தங்களுக்காக அல்லாமல் நாட்டு மக்களுக்காக தன்னலமின்றி உழைக்கும் பிரதமர் மோடியிடமும், பாஜக தொண்டர்களிடமும் ராகுல் காந்தி அரசியல் பாடம் கற்க வேண்டும். அரசியலமைப்பு அமைப்புகள் மீது அவதூறு பரப்பி, தினமும் நாடகம் போடுவதை விட்டுவிட்டு ஆக்கப்பூர்வமாக மக்களுக்குச் சேவை செய்ய முன்வர வேண்டும்" என்று அவர் ஆணித்தரமாகத் தெரிவித்துள்ளார். உச்ச நீதிமன்றத்தை நோக்கி எதிர்க்கட்சிகள் பேரணி நடத்திய தருணத்தில் கிரண் ரிஜிஜூ முன்வைத்துள்ள இந்தக் குற்றச்சாட்டுகள் தேசிய அரசியல் களத்தில் பெரும் விவாதத்தை ஏற்படுத்தியுள்ளன.

இதையும் படிங்க: ஒரே நாளில் ரூ.1,280 சரிந்த தங்கம் விலை: சென்னையில் ஆபரணத் தங்கம் அதிரடி வீழ்ச்சி!