தமிழக வெற்றிக் கழகத்தில் (த.வெ.க.) புதிய புயல் உருவாகியுள்ளது. அ.தி.மு.க.வில் இருந்து விலகி வரும் தலைவர்களை வரவேற்கும் நிலையில், முன்னாள் அமைச்சர் விஜயபாஸ்கரை கட்சியில் இணைப்பதற்கு கட்சிக்குள் கடும் எதிர்ப்பு எழுந்துள்ளது.

அ.தி.மு.க. அதிருப்தி அணியைச் சேர்ந்த நான்கு எம்.எல்.ஏ.க்கள் ஏற்கனவே ராஜினாமா செய்து த.வெ.க.வில் இணைந்த நிலையில், விராலிமலை தொகுதி எம்.எல்.ஏ.வும் முன்னாள் அமைச்சருமான விஜயபாஸ்கர் த.வெ.க.வில் இணைய ஆலோசனை நடத்தி வருகிறார். அமைச்சர்கள் ஆனந்த், செங்கோட்டையன், ஆதவ் அர்ஜுனா உள்ளிட்டோர் வழியாக அவர் தீவிரமாக முயற்சி எடுத்து வருவதாகக் கூறப்படுகிறது.

ஆனால் த.வெ.க.வின் மூத்த நிர்வாகிகள் இதற்கு கடும் எதிர்ப்பு தெரிவித்துள்ளனர். ஒரு மூத்த நிர்வாகி கூறியதாவது: “விஜயபாஸ்கர் மீது குட்கா ஊழல் வழக்கு, சொத்து குவிப்பு வழக்கு உள்ளிட்ட பல ஊழல் வழக்குகள் நிலுவையில் உள்ளன. கேரளாவில் நடக்கும் முக்கிய வழக்கிலும் சி.பி.ஐ. விசாரணையில் அவர் இருக்கிறார். அவரைச் சேர்த்தால் அவரது ஊழல் மூட்டையை த.வெ.க.வும் சுமக்க வேண்டிய நிலை வரும். தூய சக்தியுடன் அரசியல் செய்யும் எங்கள் கட்சிக்கு இது பெரும் பின்னடைவை ஏற்படுத்தும்” என்றார்.

இதையும் படிங்க: “தவெகவில் இணையப்போறீங்களா?”... சி.விஜயபாஸ்கர் ஒரே வார்த்தையில் ரிப்ளை..!!

த.வெ.க. தலைமை மக்கள் மத்தியில் “தூய்மையான அரசியல்” என்ற பிம்பத்தை கட்டமைத்து வரும் நிலையில், விஜயபாஸ்கரை இணைப்பது கட்சிக்கு சேதாரத்தை ஏற்படுத்தும் என உள்ளூர் தலைவர்கள் அழுத்தம் கொடுத்து வருகின்றனர். எனவே நான்கு எம்.எல்.ஏ.க்களை உடனடியாக இணைத்த தலைமை, விஜயபாஸ்கர் விவகாரத்தில் மிகவும் யோசித்து வருவதாகத் தெரிகிறது.

இதற்கிடையில், அமைச்சர் ஆதவ் அர்ஜுனா “த.வெ.க.தான் உண்மையான அ.தி.மு.க.” எனக் கூறியிருப்பது பலரது கண்டனத்துக்கு உள்ளாகியுள்ளது. முன்னாள் அமைச்சர் ‘அக்ரி’ கிருஷ்ணமூர்த்தி இதை விமர்சித்துள்ளார்.

விஜயபாஸ்கர் தரப்பு தொடர்ந்து காய் நகர்த்தி வருகிறது. தேவைப்பட்டால் எவ்வளவு செலவும் செய்யத் தயார் என உறுதியளித்துள்ளதாகவும் தகவல்கள் வெளியாகியுள்ளன. த.வெ.க. தலைமை இறுதியாக என்ன முடிவு எடுக்கும் என்பது அரசியல் வட்டாரத்தில் பெரும் எதிர்பார்ப்பை ஏற்படுத்தியுள்ளது. 

இந்த சர்ச்சை த.வெ.க.வின் உள்கட்சி இயக்கத்தையும், புதிய உறுப்பினர்களை ஏற்பதில் கட்சி கடைப்பிடிக்கும் கொள்கையையும் பொதுமக்கள் உன்னிப்பாக கவனித்து வருகின்றனர். 

இதையும் படிங்க: #TNElectionResults2026: அதிமுகவுக்கு முதல் வெற்றி... விராலிமலையில் வெற்றியை தட்டித்தூக்கிய சி.விஜயபாஸ்கர்... இத்தனை ஆயிரம் வாக்குகள் வித்தியாசத்திலா?