தமிழக அரசியலில் பெரும் எதிர்பார்ப்பை ஏற்படுத்திய திருப்பூர் மாவட்டம் தாராபுரம் (தனி) சட்டமன்றத் தொகுதி இடைத்தேர்தலில், ஆளும் தமிழக வெற்றிக் கழகத்தின் (தவெக) சார்பில் போட்டியிட்டு மகத்தான வெற்றி பெற்ற சத்யபாமா, தேர்தல் முடிவுகள் அதிகாரப்பூர்வமாக அறிவிக்கப்பட்ட பின்னர் செய்தியாளர்களுக்குப் பேட்டியளித்தார்.

அப்போது, "எதிர்க்கட்சிகள் திட்டமிட்டுப் பரப்பிய பொய்ப் பிரச்சாரங்கள் மற்றும் பலவித இடையூறுகளுக்கு மத்தியிலும் மக்கள் அளித்த இந்த வெற்றியை நமது முதல்வர் விஜய்க்கும், தவெக தலைமைக்கும் நன்றியோடு காணிக்கையாக்குகிறேன்" என உருக்கமாகத் தெரிவித்தார்.இன்று நடைபெற்ற பரபரப்பான வாக்கு எண்ணிக்கையின் முடிவில், தவெக வேட்பாளர் சத்யபாமா மொத்தம் 66,841 வாக்குகளைப் பெற்று, தன்னை எதிர்த்துப் போட்டியிட்ட திமுக வேட்பாளர் சுகன்யாவை (57,370 வாக்குகள்) விட 9,471 வாக்குகள் வித்தியாசத்தில் அபார வெற்றியைப் பதிவு செய்தார்; அதிமுக வேட்பாளர் பானுமதி 45,280 வாக்குகள் பெற்று மூன்றாம் இடத்திற்குத் தள்ளப்பட்டார்.   

வெற்றிச் சான்றிதழைப் பெற்ற பின்னர் செய்தியாளர்களைச் சந்தித்துப் பேசிய தவெக எம்.எல்.ஏ சத்யபாமா கூறியதாவது:"தாராபுரம் சட்டமன்றத் தொகுதி வாக்காளப் பெருமக்களுக்கு எனது நெஞ்சார்ந்த நன்றியைத் தெரிவித்துக் கொள்கிறேன். இந்த தேர்தல் களம் எளிதானதாக அமையவில்லை; தேர்தல் அறிவிக்கப்பட்ட நாள் முதல் வாக்கு எண்ணிக்கை வரை எதிர்க்கட்சிகள் எங்களை நோக்கி எத்தனையோ ஆதாரமற்ற குற்றச்சாட்டுகளையும், வீடியோ அவதூறுகளையும், பல்வேறு இடையூறுகளையும் கட்டமைக்க முயற்சி செய்தன. 

இதையும் படிங்க: தாராபுரம் இடைத்தேர்தல்: 2-ம் இடம் பிடித்த சுகன்யாவுக்கு மு.க.ஸ்டாலின் தொலைபேசியில் ஆறுதல்!

ஆனால், அந்தத் தடைகளையும் சதிகளையும் தாராபுரம் மக்கள் தங்களது ஓட்டுப் பதிவு மூலம் தகர்த்தெறிந்துள்ளனர்.இந்த வெற்றி என்பது தனிப்பட்ட எனக்கான வெற்றி அல்ல; தமிழகத்தில் கடந்த சில மாதங்களாக முதலமைச்சர் விஜய் தலைமையிலான அரசு ஆற்றி வரும் நல்லாட்சிக்கும் மக்கள் நலத் திட்டங்களுக்கும் பொதுமக்கள் வழங்கிய நற்சான்றிதழ் ஆகும். 

எத்தனையோ இடையூறுகள், அவதூறுகள் இருந்தாலும் மக்கள் இந்த அரசை எந்த அளவிற்கு மனதார நேசிக்கிறார்கள், ஆதரிக்கிறார்கள் என்பதற்கு இந்தத் தேர்தல் முடிவு ஒரு மிகச்சிறந்த உதாரணமாகும்.   தாராபுரம் மக்களின் குறைகளையும் தேவைகளையும் நான் நன்கு அறிவேன்; குறிப்பாக இப்பகுதியில் நிலவும் குடிநீர்ப் பற்றாக்குறை மற்றும் விவசாயப் பாசனப் பிரச்சனைகளுக்குத் தீர்வு காண்பதே எனது முதன்மையான இலக்கு. இதற்காக மாண்புமிகு முதலமைச்சர் மற்றும் துறை சார்ந்த அமைச்சர்களுடன் இணைந்து தேவையான அனைத்து நலத்திட்டங்களையும் அரசுப் பணிகளையும் போர்க்கால அடிப்படையில் முன்னெடுப்பேன். தாராபுரம் மக்களுக்கு முழுநேர ஊழியராக இருந்து சேவை செய்ய எப்போதும் காத்திருக்கின்றேன்" என்று தெரிவித்தார்.

கொங்கு மண்டலத்தில் முக்கிய எதிர்க்கட்சிகளான அதிமுக மற்றும் திமுக ஆகிய இரு அணிகளின் பலமான சவால்களையும் முறியடித்து, தவெக தனது இருப்பை நிரூபித்து வெற்றிக் கொடி நாட்டியுள்ளது அக்கட்சியின் தொண்டர்கள் மத்தியில் எல்லையற்ற உற்சாகத்தை ஏற்படுத்தியுள்ளதுடன், கோட்டை வட்டாரங்களிலும் அரசியல் நோக்கர்கள் மத்தியிலும் தவெகவின் தேர்தல் உத்திகளுக்குக் கிடைத்த மாபெரும் அங்கீகாரமாகப் பார்க்கப்படுகிறது.

இதையும் படிங்க: தாராபுரத்தில் தடுமாறும் அதிமுக..!! 2ம் இடமும் போச்சு..!! அசுர வேகத்தில் முன்னேறும் திமுக!!